2 MBONY TA FYEERI 11
11
Ukisuku lwa Shemaya
(1 Vam 12:21-24)
1Rehoboamu ekifika kulya Yerusalemu, mmbo esangirya vasikari yeva veeshi fira fiku iyana na makumi nyanya va mmba ya Yuda na Benyaminy, naambo aidimi ikapana na Israeli na iviira ushilyi loose maakony akwe we muni. 2Indi nrumi ya Iruva ikasheya Shemaya nndu va Iruva ikaamba: 3“Via Rehoboamu mwana wa Solomon mangyi ya Yuda, na Israeli shoose sheelyi Yuda na Benyaminy 4yeny Nndumi Iruva mmbo shaamba mulaende, nta mulasheekapana veni na muveni-fo. Wuyeny wo nndu kyeny kwakwe, mashika yekyo kyautika ni indo shemma ivika uramba.” Naasa vakainndya nrumi ya Nndumi Iruva vakawuya kyen valakikapani-se na Yeroboamu.
Rehoboamu avangisa miri
5Rehoboamu kakaa kulya Yerusalemu itana wiiya na ivangisa miri ilya yekee urukeny lwa Yuda; nayo ni 6Betilehemu, Etamu, Tekoa, 7Bet-suri, Sokko, Adulamu, 8Gati, Maresha, Safu, 9Adoraimu, Lakishi, Aseka, 10Sora, Ayaloni, na Hebron, Miri yei itiri finya, ni kulya Yuda na Benyaminy ikai. 11Mmbo evangisa miri yei na yefo ulalen kavika-fo vesalallya na mmba teevika shoonga, mafura na mfinyo. 12Yefo miriny yeyo kavika-fo ngao na mafumu, kayaallwa miri itiri finya nnu, nayo myoose, Yuda na Benyaminy ikava kwasi ya ushilyi lwakwe.
Vakohani na Valevi vasamya Yuda
13Vakohani woose na Valevi vekee kulya urukeny lwa Israeli mmbo vesamya Yuda wooka urukeny lwawo. 14Valevi vakaisityou findo fyawo fya mmba, na marema awo, mashika we Yeroboamu na vana vakwe mmbevaniinga muumu wa ifurukannya Nndumi Iruva shaasa kyikwaani-fo. 15Yeroboamu kasauwa vakohani vakwe muni vafurukannya maruva a wongo amwi na yiindya mafwanu a ngashe yoo alesongosya muni. 16Vandu woose valya venrummbwa shila kya yiindya Nndumi Iruva, Iruva wa Israeli, yewo va isanga lya Israeli koose vakeenda amwi na Valevi fika Yerusalemu, naambo vandekooya yuutya-fo kiraso kya Nndumi Iruva, Iruva wa vasaawoye. 17Kwa shia ya umangyi lwa Yuda lukatira finya, na ando a myaaka iraru vakakulunga na ushilyi lwa Rehoboamu mwana wa Solomon, vakatira finya, vakakaa sumbai ya ushilyi lwakwe, sha llya lya ushilyi lwa mangyi Davidi na mangyi Solomon.
Va mmba ya Rehoboamu
18Irina lya nka wa Rehoboamu ni Mahalati mfu wa Yeremoti mwana wa Davidi: Maye ekee Abihaili mfu wa Eliabu, mwana wa Yese. 19Yeto mmbwe emmbonnya vana vararu; Yeushi, Shemaria, na Sahamu. 20Nka ungyi ni Maaka mfu wa Absalomo, nawe kammbonnya Abiya, Atai, Sisa, na Shelomiti. 21Rehoboamu mmbo oora vaka ikumi na nyanya na vaka va shia makumi arindaru, kawona vana va kyuumi makumi avii na vaana na vakyen makumi arindaru. Nnang'ani a vaka vakwe woose sanda na valya va shia Maaka mfu wa Absalomo mbwe enkunndye mmwasi. 22Kweekyo kasauwa Abiya mwana wa Maaka nave nsongoru nnang'ani ya valya vengyi, mashika mmbo ekunndye imwallwa nave mangyi. 23Rehoboamu katana kindo kya makusaro mesha, vana vakwe maata kavakwaanisa kulya urukeny loose lwa Yuda na Benyaminy, kavavika miriny myoose itiri finya. Vekee kulya kavaniinga shoonga nkuka na ivaorya vaka veengyi.
Currently Selected:
2 MBONY TA FYEERI 11: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
