2 MBONY TA FYEERI 10
10
Masanga a Taari ya Ndoo Aanta Kituuru
(1 Vam 12:1-20)
1Naasa Rehoboamu keenda Shekemu, kundo Vaisraeli woose veekusangirya naambo vashemmbika nave mangyi. 2Nawe Yeroboamu mwana wa Nebati ekiita mbony yeti, kawuya kyeny mashika enrishya Misri llya erisha Solomon. 3Navo Vaisraeli vakanrumya nrumi. Naasa we na Vaisraeli woose vakalatya Rehoboamu, vakammbia, 4“Nde wafo mmbo elurika irio iroo. Kweekyo lwaangure irio yelyo na yese lukurundye.” 5Rehoboamu kavarouwa kavavia, “Wuyeny kwakwa ando a mikonu iraru,” Naasa vakawuya. 6Naasa Rehoboamu kakunda imanya makusaro a vamiku, valya vekee ngyama ta ndeye Solomon kyeeri ekee mangyi, kavavesa, “A shaasa ni makusaro-kyi mwashiniinga kya irouwa vandu yeva?” 7Vamiku valya vakammbia, “Kwakooya kwa lyilya vandu yeva, kwavatannya mesha, na irera nawo marero mesha, mmbo vasheva varundi vafo fyeeri fyoose.” 8Indi-we Rehoboamu nalakyikunda ilatya makusaro a vamiku valya, kilasha kya vayo kandekwaanannya na vakoo vengyi kavaallwa ngyama takwe. 9Nawe kavavesa, “Yeni, mmakusaro-ki mukeshiniinga naambo shiidimi irouwa vandu yeva valeshivia angura irio yelyo ndoo alelurika?” 10Vakoo valya vanrouwa, “Vandu yewo valekuvia, ‘Ndoo alelurika irio iroo, indi yewe lwaangure;’ yewe vavie indi: Nni yeu wakwa muunnywa wa kishengele, mmbo ukee mmbongye ngota mwiina yeto wa nde-yakwa. 11Irio lya nde-wakwa mmbo lyekee iroo, indi irio lyakwa mmbo lyivaa iroo mmwasi. Nde-yakwa mmbo emukapa na ngova, indi yeny mmbo shimukapa na ngova titiri miinga.” 12Naasa kwikee nkonu wa kararu Yeroboamu amwi na vandu woose vakawuya kwa Rehoboamu shaasa emmaivavia. 13Nawe mangyi Rehoboamu kawarouwa kwa unyaasi, kilasha na makusaro alya a vamiku. 14Kalatya makusaro a vakoo valya vakee-sha-we. Naasa kavavia, “Nde wakwa mmbo emurika irio iroo, indi yeny mmbo shilyallwa lyive iroo mmwasi. Nde wakwa mmbo emukapa na ngova, indi yeny mmbo shimukapa na ngova titiri miinga.” 15Kweekyo mangyi nnyesara kya vandu yeva-fo mashika ni kindo kyeendwa ni Iruva naambo Nndumi Iruva nainutye irero lyakwe emmiimbya Yeroboamu, mwana wa Nebati, kyeendwa ni nkisuku Ahiya wa Shilo. 16Indi vandu va Israeli woose vekilollya sheelyi mangyi ammbeela vakammbia,
“Mmbwaavi-ki lutiri kwa Davidi?
Llutiri dingu kwa mwana wa Yese-fo
Wo nndu awuye na kyeny
kwakwe
yeni vandu va Israeli.
Salallya mmba yafo kumuni yewe Davidi.”
Na vandu va Israeli woose vakawuya kwawo.
17Indi Rehoboam mmbo eshillya vandu va Israeli valya vekee kulya miriny ya Yuda. 18Naasa llya mangyi Rehoboamu eruma Hadoramu ulya ekee mwiisallya nniini wa mashora a nsarakambo, vandu va Israeli mmbo venkapa na mawe vakammbwa. Llyo Rehoboamu esaama ikari lyakwe karishya Yerusalemu. 19Kufike inu vandu va Israeli mmbo vatiri kiduva na ushilyi lwa ufyari lwa Davidi.
Currently Selected:
2 MBONY TA FYEERI 10: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
