2 MBONY TA FYEERI 12
12
Mmisri Alyingillya Yuda
(1 Vam 14:25-28)
1Kyeeri ushilyi lwa Rehoboamu lwevanga na itira finya, we amwi na vandu vakwe Israeli vakara-u yiindya mavavaso a Nndumi Iruva. 2Kwikee mwaka wa karaanu wa ushilyi lwakwe, Yerusalemu ikakapwa ni Shishali mangyi ya Misri, kyimaruma kya ilema yiindya Iruva. 3Mmbo yesha mitika kyiku na makumi avii vesaama frasi; fiku makumi arindaru na vaskari veengyi nnu valatiri yeekyena. Wooka Misri veryani nawe: wooka Libya, Vasukina Veesopia 4Katira miri itiri finya ya Yuda kutani afika Yerusalemu. 5Naasa nkisuku Shemaya kyeengya mangyi Rehoboam na vaniini va Yuda, valya vekusangyirya Yerusalemu kundo verishya nafo vekutirishaa Shishaki, kammbia, “Nndumi Iruva aamba indi, ‘Kimmba muleshira yeny, na yeny, mmbo shamura na imurambikya maakony a Shishaki.’” 6Llyo vaniini va Israeli amwi na mangyi, vakakunyiisa vakaamba, “Nndumi Iruva, mmbwa usumanu.” 7Nndumi Iruva ekilollya sheelyi vakunyiisa, karera lyingyi na nkisuku Shemaya, kammbia, “Kimmba vakunyiisa, nshikivamamitaa-fo, mmbo shivakapannya na ivakira. Nshishelyamara muri wa Yerusalemu kwa voko lwa Shishaki-fo. 8Indilyo ni kuti vandunndye naambo vaidimi imanya songosiny mbusha yiifo ya ishirunndya yeny na irundya vamangyi va ulana.” 9Naasa mangyi Shishaki wa Misri, kakapa muri wa Yerusalemu kaipoo-fo umasi lweifo loose yefo mmba ya Nndumi Iruva, na kulya mmba ya ushilyi, amwi na ngawo ta saabu tilya tesongosywa ni mangyi Solomon. 10Ando a ngawo yeto, mangyi Rehoboamu, kasongosya-se ngao ta arera na itivika sumbai ya uringyi lwa veeringa alya mwaangony wa mmba ya ushilyi. 11Wo kyeeri mangyi ekeyeenda kulya mmba ya Nndumi Iruva, varingyi mmbo veshangaa veerye ngao yeto, na numa ya vayo ishetiviira kulya mmba ya uringyi. 12Kyeeri alekunyiisa, Nndumi Iruva mmbo alensarya na uruka lwa Yuda lukawuya iva usha.
Mbony ta ushilyi lwa Rehoboamu kwa kifii
13Naasa mangyi Rehoboamu kakusongosya nisha kulya Yerusalemu kaidima ishilya Yuda. Kyeeri etiri myaaka makumi aana na umwi. Nawe kashillya Yerusalemu ando a myaaka ikumi na mfungare 14Rehoboamu kakusara fya urango lwakwe muni karekywa nndumi Iruva na illyamarya. 15Mashora moose a mangyi Rehoboamu a mapookyony kufike masiiyony a ufyari mmbo akee mareiye yefo kyitabuny kya nkisuku Shemaya na nkisuku Iddo, kyeeri yekyo kyoose mmbo kweifo fira nnang'ani ya Rehoboamu na Yeroboamu filatiri umando. 16Naasa Rehoboamu kashefwa, kasherikwa kulya muri wa Davidi, na mwana wakwe Abiya kashillya ando akwe.
Currently Selected:
2 MBONY TA FYEERI 12: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
