2 MBONY TA FYEERI 9
9
Kyaaro kya Malkia wa Sheba
(1 Vam 10:1-12)
1Malkia wa Sheba ekiita mbony ta Solomon shaasa tikee shisha mmbo efinga kyaaro keenda Yerusalemu naambo akooye ivika Solomon fyeesony, fya immbesa fiveso fyuumu. Mmbo eenda aryani na nsemu wa vandu, amwi na ngamula tikurikye mafura afwaamaa nisha, saabu shiingyi nnu amwi na mawe a wuuru uniini. Na kyeeri efika kwa Solomon mmbo emmbya fyoose yefyo etiri nriminy mbwakwe. 2Solomon mmbo erouwa fiveso fyoose kuleefoo kimwi kyemweengye tamba. 3Malkia wa Sheba ekilollya urilalyi lwa Solomon na mmba ilya emaitana 4na mmwasi ekilollya shoonga ilya vemmuvikya meseny yakwe, kalollya na vesalallya vakwe shaasa vakwaallye meseny, na varundi valya veefurukannya veny shaasa varee soori shisha, na varundi vengyi woose, na kiraso kyeemamitwa kilya kyeniingywa kulya mmba ya Iruva, kyeeri elollya findo yefyo fyoose mmbo ooma ang'any. 5Naasa kavia mangyi, “Fyoose shilemmiita kulya urukeny lwakwa kya mashora afo, na urango lwafo ni dede! 6Indi nsheedima yiirikya mbony tawo-fo, kutani yelyi shafika ilola na miso akwa shimuni; ate mmbo shevywa findo kyenga-nsi, urango lwafo, na wiidimi lwafo ni mmwasi ya yefyo shevywa. 7Vaka vafo vatiri ngoma! Amwi na varundi vafo woose yewo vakekufurukannya na yaarannya seu tafo mikonu myoose. 8Nndumi Iruva, Iruva wafo narumishwa yeto kulennsenya, kutani akuvika kitiminy kyakwwe kya umangyi kuve mangyi ando a Nndumi Iruva, Iruva wafo. Mashika Iruva wafo mmbo alekunda Vaisraeli kavaniinga finya ilatiri umando, kakuseleesa yewe kuve mangyi uwe yaawo, kusalallye yewe usumanu na wiindi.” 9Naasa kaniinga mangyi mmwasi ya kilo fiku fiina fya saabu na mafura mesha afwaamaa na mawe a wuuru uniini. Mafura yoo Malkia wa Sheba eniinga mangyi Solomon mmbo ekee mafura a ngata ya kyaanya deny. 10Varundi va mangyi Huramu na mangyi Solomon valya veende saabu yuuka Ofiri, veende na miri misha deny ya mbau amwi mawe a wuuru uniini. 11Solomon mmbo erunda na mbau tilya kasongosya kai ka mmba ya Nndumi Iruva na mmba ya ushilyi, kasongosya fivale na finanda fyeeimmbya Iruva. Mbony ta ngata yei ntilelollyo tusu kunu urukeny lwa Yuda-fo. 12Nawe mangyi Solomon kaniinngya Malkia wa Sheba wo kindo kilya nrima wakwe welanga; wo kindo aletereva mmbo alenniinga kuuta-fo filya aleengye mangyi Solomon. Mafurumyony Malkia mmbo ekwipoo kawuya urukeny lwakwe aryani na varundi vakwe
Umasi lwa mangyi Solomon
(1 Vam 10:14-25)
13Wo mwaaka mangyi Solomon mmbo ekewarya saabu kufii tani fiku makumi avii na firaanu. 14Kilasha na ilya ekewarya yuuka kwa vekapa mbusha vandu vaniini; na ingyi yuuka kwa vamangyi va Arabia na vaniini va fyuungo yefi finiini fyoose fya Israeli. 15Mangyi Solomon kasongosya ngao yeti shiniini mayana avii; na wo imwi ikaambwa kilo mfungare ta saabu shisangye. 16Kasongosya ngao tingyi shidu mayana araru nato tikaambwa kilo isaru ta saabu wo imwi, naasa mangyi kandetivika mmba ivaangwa ngorosho ya Lebanoni. 17Mangyi keengera kasongosya kitima kya umangyi kiniini, kakyaamba saabu shisha. 18Kitma yekyo mmbo kyeetiri fitere firindaru, na kitima kya yeekerya marende kya saabu, fyoose yefyo mmbo fyekee filungye yefo kiminy kya umangyi, na wo taari mmbo kweiyo ando kwa yeekyerya maako, kweiyo mafwanu a miiso avii yoo kufii na ando kwa yekyerya maako. 19Kweiyo mafwanu a miiso ikumi na avii asalalyi yoo masiyyony a fitere. Nkwiifo umangyi lungyi loose lwensongosya kitima kya ngata yei-fo. 20Maleseri moose a mangyi Solomon mmbo ekee a saabu, na findo fingyi fyoose yefyo fyekee yefo mmba yei ya ngorosho ya Lebanoni mmbo fyekee fya saabu shisha. Fesa nnyekee kindo kya toki kyeeri kya ushilyi lwa Solomon-fo. 21Solomon mmbo etiri merikebu teshendaa kufike Tarshishi na varundi va Huramu, ando a myaaka iraru mmbo vewuyaa veerye saabu, fesa, mbembe mafuwe na tausi. 22Mangyi Solomon mmbo ekee isimba kailannya vamangyi vengyi woose ulaniny kava nndu atiri seu na umasi. 23Na vamangyi va ngyuruka tingyi toose mmbo veshendaa kwa mangyi Solomon ikunda imwaarannya seu takwe yeto Iruva anniinngye. 24Na wo mangyi eshendaa kwakwe mmbo enrwaaya findo fya pya, fya fesa, fya saabu, soori, fisha fya fira, mafura afwaamaa nisha, frasi na matiko. 25Mangyi Solomon mmbo etiri masara fiku fiina aivika frasi na mitika, na vasikari vesaama frasi fiku ikumi na fivii, yeva woose kavavika miriny itiri fiteshe fya mitika a frasi na kulya Yerusalemu. 26Mmbo eshillya vamangyi woose veifo kupookya mura wa Efrate kundefika urukeny lwa Vafilisti na miriny ya Misri. 27Kyeeri kya ushilyi lwa Solomon kulya Yerusalemu fesa ntekee kindo kyeeruya-fo mmbo teishwe shapu sha mawe kataallwa sha mbau ta mieresi na makuu ya Shefela. 28Solomon mmbo engyo frasi tuuka Misri na kundo kungyi koose.
Mbony ta ushilyi lwa Solomon kwa Kifii
(1 Vam 11:41-43)
29Mbonyi tingyi ta Solomon uka mapookyony fika mafurumyony a ushilyi lwakwe mmbo tikeeshireiye kyitabuny kya mbony ta nkisuku Natani yefo ukisukuny lwa Ahiya wa Shilo, kasanda-fo na nkisuku Ido Mwilola yeto alereiya mbony ta Yoroboam mangyi ya Israeli. 30Solomon mmbo aleshillya uruka lwa Israeli shoose ando a myaaka makumi aana. 31Nawe Solomon kafwa karikwa kulya muriny wa Davidi we ndeye; Na mwana wakwe Rehoboamu kashillya ando akwe.
Currently Selected:
2 MBONY TA FYEERI 9: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
