1 TIMOTEO 6
6
1Valya woose vakee vafinge vakava mashinga, vairikye vanndumi vawo na ivaniinga wiindi loose, naambo irina lya Iruva lyilaararwa ando amwi na kiloshyo kyeru. 2Na valya vanndumi vawo vakee Vakristo valavamini-fo; nkyeni vengere ivarundya, mashika yewo vakeefura kya urundi lwawo mmbo vatiri iirikyo lyeru vakaveekundwa. Losha findo efi na iikimba deny.
Kilosshyo kya Wongo na Lango ya Masaa
3Kwakooya nndu moose alosha ufundo lungyi neera nalairikya irero elyo lya muu lya Nndumi weeru Yesu Kristo na ufundo yelo lusheendee weele, 4yeto mmbo ankurosa; nalaishi nta kindo, mmbo alyamarikye nrwe vakakusara mbony ta ivesa-vesa, na ulai lwa marero, neefo mfo kuukaa usuvanu, myaandu, na fyaararo, na nyinyira shikasha; 5na ulai lwa vandu mirwe yaawo ilasongovye vakatura fya dede vakakusara sheelyi usaari ni shia ya iwonisa mbusha. 6Kyaindi usaari na ira ifwaiya mmbusha niini. 7Mashika llulesha na kindo yaa ulaniny-fo, nta llushukaa-u na kindo-fo; 8lyo kwakooya lutiri shoonga na soori teeraa mmbo lufuraa nafyo, 9Indi yewo valangaa itira masaa mmbo vawee nreiyony na fyeesony, na langony shiingyi tilatiri nrwe, tivavisaa, yeto tirwaa vandu uretiny na urumatony. 10Mashika kimayeny kyiwi ni kya uravi lwa wo ngata ni ikunda fesa, nayo elyi vengyi vanyiilanga nnu vakalakana na iirikyo, neekwaatara na mavavyo meengyi.
11Lyo yewe, kukee nndu wa Iruva, kutirishe findo efyo; kusore usumanu, usaari, iirikyo, ukundi, usisiryo, ufoo. 12Kapana fira yeyo sheele ya iirikyo, tira muu eto wa llung'anu kukee mmbaangye, kutani kulekureeka ukureekyi llwa usha mbee ya vakureekyi veengyi. 13Mmbo shakuvavasa na irina lya Iruva, yeto aniinga fyuumbe fyoose muu, na lya Kristo Yesu, ulya alekureeka ukureekyi llwa usha mbee ya Pontio Pilato. 14Ringa ivavaso elyi nisha, kulaiyo kiteve, kutani nkonu yeto Nndumi Yesu Kristo asheorwaa paa. 15Nawe elyi kyeeri kyakwe kifikaa eshekooraa paa, niwe yeto akee iindyo, kava mmbwe muni wiidimi, kaveva Mangyi ya vamangyi, na Nndumi wa woose; 16mmbwe muni nalasheywaa ni ufu, mmbo akee itumbeny lyilavaa ifikya, nta kulaifo nndu alemmulollya na miso yaa, nta nalashidimaa illollya. Wiindi na wiidimi llwakwe fika llung'anu. Amen.
17Yewo vakee masimba yaa ulaniny yelu vavie valakushope-fo, nta valakusirye usimba elo lulakee lwa dede-fo, kyaindi vavike Iruva nsia yeto aluniinga findo fyoose shapu naambo lurunde nafyo neefura. 18Vavie vatani mesha, vave masimba kyeetana mesha, vavetira maako iniingya masaa awo, vasange na vandu vengyi veetiri nrima mwaa. 19Ni indo vasurumi umasi usha efo lukeenda nafo, vashewonisaa muu yeto ukee wa dede deny.
20Ewe Timoteo, ringa nnu isaa elyo; kukwiise na marero alakee a ki-Iruva, alatiri urango, na fiwakyanu fya urango lulakee urango dede, 21na vengyi elyi vakeisora vakara kyikusiryo kya dede. Isarya lya Iruva lyimukaye.
Currently Selected:
1 TIMOTEO 6: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
