1 TIMOTEO 5
5
Mashora Akwaani Irundwa Mbakristo
1Kulakyeemyi nndu mmiku-fo mmbo kumwiikimbaa sha ndoo, na vakoo sha vanavamau, 2vaka vakuu kuvaikimbe sha mau, na vana va kyika sha vamfwamau, kutani indo na waarya nnu. 3Indya nnu vaka va ding'u yewo vatiri wiindi. 4Kyaindi kwankooya nka wa ding'u atiri vana ao vashuku, yeva vakuloshe itana efyo fivasumanyi efo kyeny kwawo veni, varundye vamiku vawo. Mashika ekyi nkyo kyisenyi kwa Iruva. 5Na yeto akee nka wa dingu deny karewa muni, yeto we mmbo avikye Iruva nsia, kavesinda etereva na yeererya Iruva kio na nsanyiny. 6Kyaindi yeto nalakuvavaraa muni mmbo afiiye na kyikava akee na muu. 7Naakwa ni efi fivavasye, naambo valawoni kiteve. 8Lyo nndu yeto nalalolaa vandu vakwe, mmbo yewo va kyeny kwakwe muni, yeto mmbo amina iirikyo, kooka-fo kava nkasha ngota nndu nalakee nkristo. 9Nka wa ding'u nalafitye myaaka makumi arindaru nalavaangwa nka wa ding'u-fo nawe nave ekee nka wa mmi umwi-nsi. 10Nawe nkuti nakooye akureekyo mesha, kwakooya alerosa vana, neyaambya veny neesangya veele marende, na yeekya velyiswa ukyiva, neetana findo fisha etiri usau. 11Lyo vaka va ding'u vakee vakoo kulavawarye-fo, mashika elyi vatirwa llango valalatya Kristo mmbo vashelangaa yoorwa. 12Nawo mmbo vakaa uvingony mashika elyi vara kyikusiryo kyawo kya mbee. 13Na kya mmwasi mmbo vakulosha iva varoko, vakaringitya efo neefo mmba ku mmba, nta nshi vakee varoko-da-fo mmbo vavikya vengyi ureeree needola mbony ta vandu, vakooka-fo vakarera urere. 14Kyasiany mmbo shaamba vaka yewo va ding'u valandenkwa, vaorwa vaire vana, vaidimi ikallya kyeny kwawo, naambo valasheelekeiya nkiduva yeto mwaanya wa ivautya kiteve. 15Mashika kwiifo vengyi valemmaa iinduka vakasora mmbishwa. 16Nka nkristo, kwakooya atiri vaka va ding'u, naveekye we muni, maambo Siri ilasheerovyo; naambo yo siri yeekye yewo vakee vaka va ding'u deny.
17Vamiku yewo vakallya findo nisha vendyo nnu kavii kararu, mmwasi yewo vekwaatara ivambisa mbony neelosha. 18Mashika mareiyo mmbo aamba, “Ng'umbe ikapaa nganu nnyivaa ifinga kana-fo.” Na kingyi-se, “Mwiirunda mmbo asumani weesi lwakwe.” 19Kulawarye mwaandu wa nndu akeesalala na mmiku-fo, nkuti mbele kukee-u vakureekyi vavii vararu indi. 20Valya vakeengera itana ulyamari vakyeemyi yoo mbee ya woose, naambo vengyi vaute-u iiryaa. 21Mmbo shakuvavasya mbee ya Iruva, na mbee ya Kristo Yesu, na mbee ya vasu vakwe veele, salallya findo efyo nta kulaute uvingo uviny, nta kulatani kindo kweekundya-fo. 22Kulaekyerye nndu maako kuladeesye nisha-fo, nta kulaange ulyamariny lwa vandu vengyi-fo. Kuringe kumuni kuve mwaarya deny. 23Kipookya ulaalu kulani mura mweni-fo sanda-u mfinyo mwaangu kimaruma kyeevavyo nndeu, ando amwi na ndwari yeto takwaatara llya na llya.
24Ngyulyamari ta vandu vengyi mmbo timanyikye paa, tikoora shaasa tikeerwaa vandu uvingony, vengyi ngyulyamari tawo tikavasora. 25Kiwo indo na mashora mesha mmbo amanyikye paa, nta filya filalollyo paa mfishiidimaa ikusuruma-fo.
Currently Selected:
1 TIMOTEO 5: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
