1 TIMOTEO 4
4
Valori va Wongo
1Naasany Mumuyo mmbo arera paa deny kyeyaamba sheelyi fyeeri fya ifurumya vandu vengyi mmbo vashelakanaa na iirikyo, vakutire na mimuyo yeyo ilembaa, na ngyufundo ta varumu; 2veeriwa ni ukunang'ari lwa vandu va wongo, mirima yaawo ikorwaa mmuro; 3veshiima vandu valaore vaka, neevavikya ishingo lya shoonga eto Iruva aletivika-fo naambo lutiwarye lumwaani neewo vatiri kyikusiryo vengere imanya dede yeyo. 4Mashika lyo wo kyuumbe kya Iruva mmbo kyikee kisha, nta nkwiifo kivaa ilema-fo kuuta ni ifiwarya lwishaanaa. 5Mashika mmbo kyikee kyiilyise ni irero lya Iruva na fiterewo. 6Kumbura Vakristo mbony yeto, neewe llyo kushevaa nndundi nsha wa Kristo Yesu, kuvemanya nisha ufundo lwa iirikyo ando amwi na ufundo lwa dede llwa kuleloshwa. 7Lyo ngyuraawe ta kimiku tilakee ta siri, nkuti kutilemi, kuvekwiishivira iva nsaari. 8Mashika ikwiishivira iwona finya ya mwiili nkisha-da kyaindi usaari mmbo lukee usha kyeeri kyoose, mmbo lukee uvikye kyaasa kya muu wa ulaalu na ulya ushaa numa.
9Ni irero lyeevikyo nsia, nalyo lyisumani iirikyo deny; 10mashika mmbo lukee ikuvinisa nekwaatara kimaruma kya efi, mashika elyi lukusirye Iruva yeu muni muu, yeu avekee Mwiikira wa vandu woose, mmwasi yewo vakusirye.
11Vavasya mbony yeti neetilosha. 12Lola nndu moose nalasheemina ukoo lwafo-fo, mashika nkuti kuve kyaaso kwa yewo vakusirye, kwiireraa na kwiitanaa, na yoora ikunda na kyikusiryo kisha. 13Kutani elyi nshaa, kutakure isoma na iikimba neelosha. 14Kulare kularunda na simbo yeyo kulesimbwa, nkimaruma kya ukisuku neelyi kuleekeryo maako a vamiku. 15Swaangya nnu efyo, kukutire nafyo; naambo ivesyo lyafo lyikooye ilollyo mmbandu woose. 16Kuringe kumuni kutire ufundo lwafo. Kusinde ufundony yelo mashika kwatana indo mmbo kusheashuka yewe kumuni ando amwi na yewo vekwaaranya.
Currently Selected:
1 TIMOTEO 4: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
