1 TIMOTEO 3
3
Fisongoru Mwiindyeny
1Nkindo kya dede, kwakooya nndu alanga iva askofu mmbo alanga ishora isha. 2Kyasiany kindo kikooye askofu ni iva nndu nalarerwa kikasha, nndumi wa nka umwi, nave wa mwiiyanu na araiye urango, naveva nndu mwaarya, mwiambya vandu naveva nndu eeshi ilosha; 3nta nalave nndu wa wari ao mwiikapana; lyo nave nndu mfoo; nta nalave nndu mwiillya ulai na vandu, nta nalave nndu mwiikunda fesa-fo; 4naveva mwiisalallya kyeny kwakwe nisha neelosha vana vakwe vatire vyo; 5(mashika lyo le, nndu nalashidimaa isalallya mmba yakwe muni, mmbo ashidimaa inda ivavara siri ya Iruva?) 6Nta nalave nndu aangye siriny mikonu ya kufii, nalasheekurosa nawe uvingony lwa yeto nkumbi. 7Lyingyi mmbo kisumani nave nndu akureekyo mesha mmbandu vengyi; naambo nalasheewa uvingony na nreiyony wa yeto nkumbi. 8Kiwo na mashemasi nawo vave vandu vavaa iindyo; valatiri ulumi lwa ntambo, nta valave veena nnu mfinyo-fo, nta valalangaa fesa ya ntambo. 9Vatire ngata ya iirikyo vekee na nrima nsaari. 10Yeva nkuti valolwa mbele, llyo varundeny mashora a ushemasi, elyi vammaa imanyika mmbatiri kyiteve. 11Na vaka vawo naawo, vave vasaari, nta valave vevikya vengyi ureeree, vave va mwiiyanu, vave vaarya findony fyoose. 12Mashemasi nkuti vave vomi va nka umwi, vesalallya vana vawo nisha, na poo kwawo. 13Mashika yewo veerunda mashora a ushemasi nisha mmbo vashewonisaa nnduma nsha, neewona ukaari usongovisi lwa iirikyo valuuta efo kwa Kristo Yesu.
14Efi mmbo shafikureiya lyo shiivikye nsia wesha kwafo mikonu ya kufii. 15Lyo kwallollya shakyeeyo, lyo manya-da shaasa kisumanyi vandu ikaa efo mmba ya Iruva, ikee nnyo siri ya Iruva muni muu, kaveva mmbwe ngo na uvasha lwa dede. 16Na kyama yekyo kya weele nkiniini.
Iruva mmbo aleorwa paa kwi ngata ya mwiili
na ngata yeyo ya mumuyo ikammanya mmbo akee nsumanu.
Kalollyo mmbasu kavambiswa masangeny,
kavikwa nsia kunu masangeny.
Kavikwa uwe efo itumbeny.
Currently Selected:
1 TIMOTEO 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
