1 TIMOTEO 2
2
Uramba lwa Mwiindye
1Naasany kindo kya mbee kive ni fyeerero na fiterewo neeterevya vengyi Iruva ando amwi na fyaanu, efyo mufitani kimaruma kya vandu woose. 2Kimaruma kya vamangyi neewo woose vatiri ushilyi, naambo luwoni suku shisha na ta urilalyi, lukee na waarya na utele. 3Ekyi ni kindo kisha kikakundika neefo kwa Iruva akee Mwikira weeru. 4Nawe mmbo akundye vandu woose vakirwa neekooya imanya ekyo kyikee kya dede. 5Kimmba Iruva ni umwi, na nsandi wa Iruva na vandu ni umwi, mmbwe Mwana yeto wa Nndu we Kristo Yesu; 6mmbwe yeto alekurambikya-u we muni nave ukiro kwa woose, na ukiro elo mmbo lushevikyoo ukureekyi elyi kyeeri kya vayo kifikaa. 7Na kimaruma kya vayo mmbo shilevikwa shive mwiivambisa na nrumi (mmbo sharera dede nta nshi wongo-fo), shive llori wa vandu va masanga efo kikusiryony kya dede.
8Kimmba ni indo, mmbo shikundye vomi vaate miindye wo ando, veshiipoo maako awo vavikye vandu mbora kulaiyo ulai nta unyafi. 9Na kiwo vaka, nawo vakushope na masara esikya mwiili ando amwi na wiindi usha, na nrima wa mwiiyanu, utore lwawo lulave lwa yooka fii, nta lweekwaamba mafura a wuuru ao lwa soori ta wuuru uniini. 10Lyo luve lwa mashora mesha, shaasa kisumanyi vaka valya vatirye Iruva vyo. 11Nndu nka nave mwaarannya sau needimi ikulosha findo, nave mfoo kyeeri kyoose, 12Nndu nka nalaniingwa mwaanya wa ilosha-fo, nta ishillya nndumi-fo, namalallye sau. 13Mashika Adamu mmbwe alepooka yuumbwa na Eva kasorya. 14Nta nshi Adamu alelembwa-fo, lyo nka mmbo alelembwa deny kaanga urekweny. 15Lyo mmbo ashekirwa kimuukya efo vaniny vakwe, kwakooya vasinda iirikyony na ukundiny na ikwiilyisa, ando amwi na nrima wa mwiiyanu.
Currently Selected:
1 TIMOTEO 2: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
