1 TIMOTEO 1
1
1Yeny Paulo, nrumi wa Kristo, kwi ivavaso lya Iruva akee Mwiikira weeru na Kristo Yesu akee ekyo luvikye nsia, 2shakureiya yewe Timoteo, mwana-kwa efo kikusiryony. Isarya lya Iruva lyikee neewe, na ilyillyo, na urilalyi luukye kwa Iruva Nde na kwa Kristo Yesu Nndumi weeru.
3Shaasa shilekutereva kukae Efeso, kyeeri kilya shekeenda Makedonia, naambo kwiikimbe vengyi valashelosha ngyufundo tingyi; 4nta valeshearanya ngyuraawe na ng'anu-ng'anu tilatiri umando, tishendee makusaro meengyi nta tilaryani na uvavaso lwa Iruva lwa iirikyo, naasa vaikimbe indo. 5Na kyeefinga ivavaso elyo ni ukundi luukye nriminy nsha na makusaro mesha, na iirikyo lyilatiri ukunang'ari. 6Vandu vengyi vakanra valalatya efi mmbo vankaa marerony a ing'ana. 7Vakalanga iva veelosha va mavavaso, lla elyi valaishi songosiny efyo vakeerera. 8Lyo lwiishi sheelyi uvavaso ni usha kwakooya nndu arunda nalo kya usumanu. 9Navemanya irero elyi, sheelyi uvavaso llutiri mwaandu na nndu nsumanu-fo, kuuta yewo veerenga veni, neewo valakee vaarya, valaishi Iruva, valyamari, na vatefusu, neewo valashinndyaa Iruva, na veekapa vandeye vawo, na veekapa vamaye vawo, na vewaa. 10Na vatuusi, vasodomi na veiiva vandu, vaongo, veelya mboo kya wongo; na kwakooya kwiiyo kindo kingyi kilaryani na ufundo lutiri muu. 11Shaasa kyikee kirere efo Nruminy ya Nsia ya itumbe lya Iruva yeto akee iitikiswa, yeyo shilerambikywa.
12Neeny mmbo shaana Kristo Yesu akee Nndumi weeru, yeto aleshisimba finya mashika aleshilollya shikee mwaarya kashivika efo urundiny lwakwe. 13Na kyikava elyo mbee shekee nndu mwaarara, shafuluta vandu vengyi, shava nndu llyang'a, lyo shawonisa ilyillyo, mashika elyi shetana indo kyikee kya urung'ani neelyi kulore shetiri kikusiryo. 14Na isarya lya Nndumi weeru mmbo lyileng'ana nnu kweru ando amwi na kyikusiryo na ikunda yelyo lyuukye kwa Kristo Yesu. 15Ni irero lyisumani iirikywa nalyo mmbo lyisumani ikusiryo deny, nalyo llyo elyi, Kristo Yesu mmbo alesha ulaniny nashekira valyamari, na wa mbee waawo ni yeny. 16Lyo kimaruma kya vayo mmbo shilewona ilyillyo, naambo shikee yeny ni yeto wa mbee, Yesu Kristo noore-u usisiryo lwakwe loose, shiveva na kyaaso kyeelola kwa yewo vashenkusiryaa numa, naambo vawonise muu wa llung'anu. 17Naasany ulaalu Mangyi yeto wa llung'anu, nalashidimaa ifwa, nta nalalolyoo mmiso, akee Iruva we muni, nawoni iindyo na nnduma mmbwakwe llung'anu na llung'anu. Amen.
18Mwana-kwa Timoteo, mmbo shakurambikya ivavaso elyi kulyiringe kimaruma kya irero lya ukisuku llwa lulenkusongoya, naambo kimaruma kya vayo kukooye ikapana fira yeyo sheele; 19kuraa kyikusiryo na nrima nsha, efyo vandu vengyi valafisarye nawo vakarumaka elyi vauwa kikusiryo. 20Nnang'ani ya yewo ni Himenayo na Iskanda, neewo mmbo shilevaniinga mmbishwa naambo navaloshe valasheyaarara-se Iruva.
Currently Selected:
1 TIMOTEO 1: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
