1 SAMUELI 8

Vandu Vatereva Iniingwa Mangyi

1Samweli ekikwa mmbo alevika vana valya vakwe vavii vave valeti va Israeli. 2Wa mbee ni Yoeli, na wa kavii ni Abiya. Nawo vakakaa Beer-sheba. 3Lyo vana yeva mmbaletana sha ndeye-fo, vakailashika, llya valelanga iwuura neeniingwa findo filasumani, vakeeveta usumanu.

4Llyo vamiku woose va Israeli valevika shila, vakallatya Samweli kulya Rama, 5vakammbia, “Ulaalu yewe mmbo kwammmikwa, na vana vafo mmbakeetana shaasa kulevalosha-fo. Kyasia luvikyeny mangyi sha vandu vengi naambo nalushillye.” 6Lyo irero elyo llyilesenya Samweli-fo, elyi valeamba, “luvikye mangyi.” Naasa Samweli katereva Nndumi Iruva. 7Naasa Nndumi Iruva kavia Samweli, “Vaniingye wo kindo vakundye. Mashika nshi yewe vakeekulema-fo, ni yeny naambo shilave mangyi waawo.” 8Shaasa valeshitannya yen uka llya shilewoota. Misri vakava veerundya maruva engi, niindo ulaalu vakeekutanya yewe. 9Naasa vaaranyi ninsha, lyo kuvaikimbe nnu deny, kuvavie na mikaaye ya vamangyi yewo vashevashillyaa.

10Nalyo Samweli kavia vandu yewo marero yoo moose a Nndumi Iruva. 11Kavavia, “Nndu mangyi yeto ashillya mmbo akee indi, mmbo ashiipoo vana vany vandekaa kwakwe, valole mitika akwe, vaveva veekallya farasi takwe, na isongosya mitika akwe.” 12Mmbo ashevavikaa vasalallye vandu fiku five, ao makumi mave, vengi vareme nrema takwe, na yuulula fimu fyakwe, vasongosye na fisha fyakwe fya fira, na fiiya fya mitika akwe. 13Na vefu vany navevaipoo vandesongosya findo fifwaamaa nng'u marashi, vaveva vekora shoonga na mikate. 14Na marema any, na minda ya misababu, na ya miri ya mafura yoo asenyi mmwasi naniinge mashinga akwe. 15Nookefo nawarye kodi ya fimu kwany na ya misabibu noote-fo kyeeniinga veesalallya vakwe na varundi vakwe. 16Mmbo ashiipoo vasero vany na fishinga fyany, na ng'umbe tany eto shisha nnu, na mishungu yaany navarwaa mashoreny akwe muni. 17Efo marondeny any a makumi mmbo ashemutosaa usanu, muve sha mashinga akwe. 18Neeni mmbo musheiyaa kyeendo mmangyi yaany mulensauwa. “Nawe Nndumi Iruva nta nnyashemwaauwaa-fo.” 19Llyo nta vandu yewo mmbaleiranya Samweli-fo, vakaamba, “Nshi indofo-te, yese mmbo lukundye itira mangyi tupu, 20naambo neese luve sha vandu va masanga engi, na lyingi naambo mangyi yeeru nalusalallye neeluleta neekapana fira teru.” 21Samweli kaaranya marero moose yoo a vandu yewo kandearuuya Nndumi Iruva. 22Nndumi Iruva kavia Samweli “Aranya unyanga lwawo kwavavikya mangyi.” Llyo Samweli evia vandu va Israeli, “Wo nndu neende kyeny kwakwe ulaalu.”

Currently Selected:

1 SAMUELI 8: MAS2

Highlight

Compare

Copy