1 SAMUELI 9
9
Sauli Akwaanannya na Samweli
1Naasany kweefo nndu umwi wa ufyari lwa Benyaminy evaangwaa Kiishi, mmwana wa Abieli wa Serori wa Bekorati wa Afia wa Mbenyaminy, ekee nndu nkaari atiri finya. 2Nawe mmbo eetiri mwana wakwe, eevaangwaa Sauli, mwana nkoo asenyi, nta efo vaneny va Israeli nkweefo nndu asennyi ngota Sauli-fo. Nawe mmbo akee mwaasha kairya vandu woose. 3Naasa mishungu ya Kishi we ndeye wa Sauli mmbo yenreka. Kishi kavia Sauli, “Ipoo nsoro umwi-te kunderuuya mishungu yeyo.” 4Naasa kanderwa na kulya urukeny lwa fidooro lwa Efraimu, na kulya urukeny lwa Shalisha, lyo valaikooye. Naasa vakeengera yeenda urukeny lwa Shaalimu, nta nalaikooye, na urukeny lwa Vabenyamin-da nta valaikooye. 5Lyo kyeeri valefika urukeny lwa Sufe Sauli kavia nsoro ulya wakwe eeriani nawe, “Nnde luwuye ulaalu, mashika baba ulaalu mmbo akusaraa neese mmbo lwanreka.” 6Nawe kammbia, “Kwiishi, kunu muriny yeu mmbo kwiifo nndu wa Iruva eerikyo mmbandu woose, na kindo ammaamba mmbo kivee dede, naasa lweendeny kwakwe naambo nandeluvia ngata ya kyaaro kyeru.” 7Na Sauli kammbia, “A elyi lusheendaa nkyoki lunrwaayaa? Mashika lwammeelya findo lweerye, nta llukirye kindo kivaa irwaaya nndu yeto wa Iruva-fo.” 8Nsoro yeto kammbia, “Yeny shitiri kiparwe kya shekeli, nnywo lusheningya nndu yeto wa Iruva naluvie ngata ya kyaaro kyeru.” 9(Elyo kasha kyeeri nndu alendevesa Iruva kindo kulya Israeli, mmbo veshaambaa, “Ndifo kwa nndu mwiilollya.” Mashika nndu yeto avaangwaa Nkisuku ulaalu mmbo evangwaa mwiilollya elyo mbee.) 10Llyo Sauli alevia nsoro yeto wakwe, “Naasa nkisha, ndifony.” Vakeenda vakandefika muriny wa nndu yeto wa Iruva.
11Kyeeri vekeerwa na kulya muriny vakakwaananya na vana va kyeny wooka mureny, vakavavesa, “Mwiilollya nkwiakai yaa?” 12Nawo vakavavia, “Ekakoolya kulya mbee yaany, angusyeny, mashika mmbo asheye na kunu miriny mashika inu vandu mmbo vakundye yuuta firaso yoo ando eele.” 13Kwakooya mwaanga neefo muriny nkuti munkooye-fo, kulore ammeenda na yoo ando eele nandelya shoonga, mashika vandu mmbashidimaa ilya kulore asha nashevikya firaso mbora-fo, llyo vandu yewo vasha valyaany shoonga rweny nafo ulaalu indi llyo mushenkooyaa. 14Naasa vakarwa nafo. Llya vafika indi vakakooya Samweli eerwaa na ando yoo kweele.
15Nawe Nndumi Iruva mmbo emmwoora Samweli elyo lya ukwaau kulore Sauli ammusheya, kammbia, 16“Ndesi fyeeri sha efi mmbo nshekweengyee nndu umwi wa ufyari lwa Benyaminy neewe kansha mwaambe mafura nave mangyi ya vandu vakwa va Israeli, mmbwe yeto ashevakiraa maakony a Vafilisti, mashika shallola vandu vakwa shalollya kiiyo kyawo.” 17Naasa llya Samweli alelollya Sauli indi, Nndumi Iruva kammbia, “Ekau, mmbwe yeu shilesongwa ikuvia mbony takwe, mmbwe asheshillyaa vandu vakwa.” 18Nawe Sauli kaangusya isora Samweli yoo ngiriny ya muri, kammbia, “Mmbo shakutereva kushoore mmba ya mwiilollya.” 19Samweli kammbia, “Mwiilollya mmbwe yeny. Naasa irany mbee yakwa kundefika ando kweele, mashika mushelyaa shoonga kwakwa, neelyi kwiikyaa shikure kukweengye, shammaa ikuvia fyoose fikutinnyi nriminy. 20Na kya mishungu ilya yaany irekye kilakurovye nriminy-fo, mashika ilekooyo. Na findo fisha fyoose kunu Israeli mmbi yeto akee ndeese kulore nnyewe? Nshi yewe na va mmba ya ndoo?” 21Llyo Sauli alemmbia, “A yeny nshi wa ufyari lwa Benyaminy lukee udu lukairya ngyufyari toose ta Israeli? Na mmba yeyo yeeru nshi ikee shidu ngota mmba toose ta Benyaminy? A mmbo kyava inda kwashivia indo?”
22Nalyo Samweli kawarya Sauli na nsoro ulya eeriani nawe, kavaata yoo kiryeny kyeekaa, kavavika irembo lya mbee yoo vanduny yewo veeiyo vafikye makumi araru. 23Naasa Samweli kavia nkori yeto wakwe, “Ende waavi lulya shakuvia suruma” 24Naasa llyo nkori yeto aleende kisouwa na uvaa lwa vayo, kikavikwa yoo Sauli akai. Samweli kaamba, “Elo llo waavi lweesurumyo, kulyiiye, mashika mmbo kwensurumyo kyeeri kya vayo kishe, mashika mmbo shaamba, Vakeeshisheya veny.” Naasa niindo Sauli alelya ando amwi na Samweli nkonu yeto. 25Naasa veekyuuka ando yoo kweele neefika kulya muriny, Samweli karera na Sauli kyaanya vekee kulya kai.
Samweli Aamba Sauli Mafura Nave Mangyi
26Elyi kulekya ngama Samweli mmbo alevaanga Sauli kulya kai, kammbia, “Nnde shikuviire kyeny,” Sauli kasalala, vakasomuka vee vavii we na Samweli. 27Veeshoolokaa vauka kulya muriny, Samweli kavia Sauli, “Via nsero eto wafo nasonngwe, nawe kasonngwa, neewe kusalale yaa shikuvie irero lyooka kwa Iruva.”
Currently Selected:
1 SAMUELI 9: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
