1 SAMUELI 7
7
1Na vandu yewo Kiriath-yearimu vakashoondwa isanduku llya lya Nndumi Iruva vakalyifita mmba kwa Abinadabu ando a ifumbu-u, nawo vakasauwa mwana wakwe evaangwaa Elieseri naambo naringe isanduku llya lya Nndumi Iruva.
Samweli Ashillya Israeli
2Uka nkonu isanduku lyilekaa Kiriath-yearimu kileva kyeeri kyaasha, myaaka makumi avii sele. Na Vaisraeli woose vakaiya na Nndumi Iruva. 3Naasa Samweli kavia Vaisrali woose, “Kwakooya mwawuiya Nndumi Iruva na mirima yaany myoose, na yuuta-fo maruva yoo mutiri, nng'u Maashtoreti alakani neeni, muniingye Nndumi Iruva mirima yaany nenndundya we muni, nawe mmbo ashemutaa maakony a Vafilisti.” 4Nalyo Vana va Israeli vakootafo mabaali na Maashitoreti, vakarundya Nndumi Iruva muni.
5Samweli kaamba, Sang'iryeny Vaisraeli woose kulya Mispa naambo shiimuterevye kwa Nndumi Iruva. 6Vakakusang'irya-fo, vakaraa mura vakeende mbee ya Nndumi Iruva, vakakootoya, vakaamba, “Mmbo lulelyamarya Nndumi Iruva.” Samweli kavaterevya kulya Mispa. 7Vafilisti vekiita Vaisraeli nkulya Mispa vakai woose, vashilyi vawo vakarwa naambo vandekapana na Vaisraeli. Nawo vana va Israel veekiita vakairyaa Vafilisti. 8Vana va Israeli vakavia Samweli, “Luterevye Nndumi Iruva weeru nalwaauwe maakony a Vafilisti.” 9Naasa Samweli keepoo ngurana ya suva kootya Nndumi Iruva kiraso kyeekora na muro. Samweli katerevya Israeli, nawe Nndumi Iruva kamwaaranya. 10Kyeeri Samweli ekeeyuuta kiraso ekyo, Vafilisti vakakooya vansha kufii ishekapa Vaisraeli. Nalyo Nndumi Iruva keende iruruma lya ntiri nnu, kasaveesa Vafilisti nnu, vakasarunnya Vaisraeli veelollye 11Vaisraeli vakooka alya Mispa vakavingya Vafilisti, vakavakapa vakavafuna vakavafita Beth-kari.
12Naasa Samweli keepoo iwe kalyisaleesa alya nnang'ani ya Mispa na Sheni kalyivaanga “Eben-ezeri,” nkyo kyaamba, “Fikainu ni Nndumi Iruva alelweekya.” 13Naasa Vafilisti vakavingwa neerumbuya deny isora Israeli urukeny lwawo. Nawe Nndumi Iruva karovya Vafilisti nnu kyeeri kyoose kya Samweli. 14Nayo miri ilya myoose Vafilisti vensoka Vaisraeli ikaviirwa, pookya Ekron fika Gathi, neevasoka minyanu myoose ventira. Na kyo kyeeri eki kukavekaafo ufoo kwa Vaisraeli na Vaamori. 15Nawe Samweli kaleta Israeli kyeeri kyoose kya muu wakwe. 16Wo mwaaka kava ashendaa Betheli na Gilgali na Mispa, kaleta Vaisraeli efo koose. 17Kafika Rama nng'u kyeny kwakwe alekaa eeshillyaa Israeli, nafo katannya-fo Nndumi Iruva ando eerasya.
Currently Selected:
1 SAMUELI 7: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
