1 SAMUELI 6
6
Isanduku lya Kyaasa Lyaviirwa
1Isanduku elyo lya Nndumi Iruva mmbo lyilekaa kwa Vafilisti ando a miiri mfungare, 2Vafilisti vakavaanga vakohani vawo na vasavi vawo vakaamba, “Alukatana inda na isanduku elyi lya Nndumi Iruva?” Luvieny shaasa lulyiviiraa kwa vayo. 3Nawo vakaamba, Mukammbiira isanduku elyo lya Iruva wa Israeli mulalyiviire ruu-fo. Nkuti musandeu na firaso fya urekwa, llyo mukyaa mumanyi na kimaruma woko lwa Iruva lukamurovya. 4Nawo vakavesa, “A firaso efyo fya urekwa lurwaa mfya ngataki?” Nawo vakaamba, “Lusongosye mafwanu a moore a sahabu araanu, na makokoi a sahabu araanu, sha yeekyena lya vakohani Vakifilisti, mashika llya saka ya makokoi ilemusheya moose.” 5Nkyo songosieny mafwanu yoo a moore na a makokoi fya filelyamara uruka, indo llyo musheng'anisaa Iruva yeto wa Israeli, nawe kive llyo asheelelisaa ngapo yeyo ya woko lwakwe, kive kyeni kweru na kwa maruva eru na uruka lweru. 6A nkiki elyi mukeyuumisa mirima yaany sha Vamisri na Farao waawo, llya valemaa isisya Vaisraeli lyo nta valakunde ivara veende? 7Kyasia ulaalu songosien yikari, mwiipoo na ng'umbe ivii ta malela tilandeomwe ikumbi lyeerema, to ngashe ta vayo mutire-fo, 8llyo mukamareny ikari elyo lya Nndumi Iruva mulyivike efo ikariny ando amwi na findo efyo fya sahabu efyo fya kiraso kya urekwa, murwaa ando amwi na isanduku elyo, lyiluuke-te. 9Na kwakooya ikari lyarwa na shia ya nnyanuny yeenda Betshemeshi, naasa lumanyi mmbwe Iruva wa Israeli yeto alelutannya uravi yelo uniini, lyo kyanra kilava indo, llyo lumanyaa nshi woko lwakwe-fo, ekyo mmbo kyekee nkindo kya nrenga-da.
10Naasa vandu valya vakatana indo. Vakeepoo ng'umbe ivii tikeekamwa, ngashe tikarewa mmba. Vakafingya ng'umbe tilya ikariny. 11Vakavika isanduku llya ikariny ando amwi na mafwanu alya a moore na makokoi. 12Nato ng'unde yeto tikasora shia ya Bethshemeshi to sheni, tikasora shia shoorotu tiishaanaa kulore tosangya taari yei ao yei na makohani va Vafilisti vakavasora numa fika alya Beth-shemeshi. 13Na vandu va Beth-shemeshi veevyaa nganu kulya imungony llya valelollya isanduku llya vakafura nnu. 14Nalyo ikari llya lyikafika ireminy lya Yosua wa Beth-shemeshi, lyikasalalau kweni iweny iniini. Vakababara firi fya ikari llya, vakaipoo ng'umbe tilya tikava kiraso kyeekora na muro kwa Nndumi Iruva. 15Naasa Valevi vakasota isanduku lya Nndumi Iruva ando amwi na findo filya fya sahabu fyeekee nalyo, fyo vakafivika yoo uwe ya iwe llya iniini, nalyo vandu va Beth-shemeshi vakoota firaso fyeekora na muro, vakashishya Nndumi Iruva kiraso nkonu yeto mweni. 16Nawo vashilyi yewo varaanu va Vafilisti veekilollya efyo, vakawuya na Ekron nkonu yeto mweni.
17Elyi llyo yeekyena lya mafwanu alya a moore Vafilisti valoota ave kiraso kya urekwa. Ashdoni vakarwaafo lyimwi, Gaza lyimwi, Ashikeloni lyimwi, Gati lyimwi, na kwa Ekron lyimwi. 18Na makokoi alya na sahabu kimwi na yeekyena lya miri ya Vafilisti ya vashilyi valya varaanu: Nayo yekee miri itiri turuve. Na iwe elyo iniini yoo valevika isanduku lya Nndumi Iruva nng'u lyikai fika inu alya ireminy lya Yosua wa Beth-shemeshi.
19Naasa Nndumi Iruva kawaa vandu va Beth-shemeshi, mashika elyi valelola kulya isandukuny lya Nndumi Iruva vakafwa vandu makumi mfungare. Na vandu va Beth-shemeshi vakakapa kiiyokimaruma kya elyi Nndumi Iruva alevarumata king'ani indo.
Isanduku lya Mavavaso kulya Kiriath Jearim
20Vakaamba, “Ni vi ashidimaa isalala mbee ya Nndumi Iruva yeu akee Iruva mweele? A mmbi arumwaa namuute kweru?” 21Naasa vakaruma varumi veende kwa vandu va Kiriath-yearimu, vavavie, “Vafilisti valya vammbiira isanduku llya lya Nndumi Iruva, kyasia sokeny mushelyoondwa.”
Currently Selected:
1 SAMUELI 6: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
