1 SAMUELI 3
3
Nndumi Iruva Asheya Samweli
1Nawe mwana ulya Samweli karundya Nndumi Iruva eekee na Eli. Nawo vandu mmbeishi irero lya Nndumi Iruva nisha kyeeri kilya-fo, nta mmbensukuyo vakamanya nisha-fo. 2Naasa nkonu umwi kyeeri Eli eelele (na miso akwe mmbo empooka ifwa nalaidimi-se ilollya), 3nalyo nkwemmiila-fo, lyo we Samweli enndelala kulya mmba ya Nndumi Iruva, kufii na isanduku llya mavavaso. 4Nalyo Nndumi Iruva kavaanga Samweli, nawe kammbia, Ekakau shikee yaa, 5Samweli kasora Eli kammbia, “Ekakau shansha.” Eli kammbia, “Nshalekuvaanga-fo, endelala.” Keenda kandelala. 6Naasa Nndumi Iruva kammbaanga lya kavii, “Samweli, Samweli-ro!” Nawe kakupoo kandesora Eli lyingi, kammbia, “Ekakau shansha elyi kwashivaanga.” Nawe kammbia, “Nta nshi yeny shakuvaangafo mwanakwa, kweengye kwandelala.” 7Nalyo kyeeri eki Samweli nnyemmanya Nndumi Iruva-fo nta irero lyakwe llyenkoora nawe-fo. 8Naasa Nndumi Iruva kammbaanga lya kararu, nawe kakupoo kavesora Eli-da, kavemmbia, “Ekakau shansha elyi kwashivaanga.” Naasa llyo Eli alesukukyo neemanya yeto ni Nndumi Iruva ekevaanga mwana ulya. 9Naasa llyo Eli alevia Samweli, “Endelala, na kwakooya akuvaanga lyingi kummbie, kwaambaye Nndumi Iruva, nsero wafo ekau eetye.” Naasa Samweli kandelala-se 10Nalyo Nndumi Iruva kasha lyingi kammbaanga sha llya mbee, “Samweli, Samweli.” Llyo Samweli aleamba, “Kwaambaye Nndumi Iruva, nsero wafo ekau eetye.” 11Nalyo llyo Nndumi Iruva alevia Samweli, “Kwiishi, mmbo nkundye itana kitere kunu Israeli, neeto moose ashiitaa kya vayo navavyo. 12Llyo kyeeri nsheinutyaa filya fyoose shilerera kya mmba ya Eli, fyoose fiinukye. 13Mashika shilemmbia mmbo nshekabaa mmba yeyo yakwe llung'anu, kyeendwo ni uravi lulya nawe muni alwiishi, mashika vasero vakwe mmbo valekweengye kidengo wo veni, lyo we nalakunde nta ivaikimba. 14Neeny shallya mboo kya mba ya Eli, sheelyi nta firaso na fyeekora murony mfimaa isangya na yuuta uravi yelo-fo, fika llung'anu.”
15Naasa Samweli kalala kukakya elyi lya ndesi, karua mmba ya Nndumi Iruva. Lyo Samweli nalakare ivia Eli mbony yeto alevyo. 16Nalyo Eli kavaanga Samweli kammbia, “Samweli mwanakwa.” Nawe kammbia, “Ekakau shikee yaa.” 17Kammbesa, “A mmbony-ki alekuvia? Mmbo shakutereva nnu na irina lya Iruva kulashisurumi nta irero lyimwi-fo lya yoo alerera neewe-fo.” 18Naasa llyo Samweli alemmbia findo fyoose Nndumi Iruva alemmbia. Nawe Eli kaamba, “Nawe Nndumi Iruva, navekutanya shaasa kyammusenya.”
19Samweli keengera itumaa eekayo ni Nndumi Iruva, nta nalare irero lyakwe lyimwi. 20Nawo Vaisraeli woose uka ndoo Dani fika Beer-sheba kulya sinde vakamanya sheelyi Samweli mmbo akee nkisuku wa Nndumi Iruva. 21Nalyo kulya Shilo vandu vakapooka yiiryaa Nndumi Iruva mashika elyi Nndumi Iruva alekoora-fo na Samweli. Nawo Israeli vakaaranya Samweli nisha.
Currently Selected:
1 SAMUELI 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
