1 SAMUELI 4
4
Vasokwa Isanduku lya Kyaasa
1Naasa kyeeri kilya Vafilisti vakakuumbya vandekapa Israeli. Nawo Vaisraeli vakakwipo vandekapana fira yei, vakandekusang'irya alya kufii na Ebenezeri, Vafilisti vakakaa alya Afeki. 2Vafilisti vakapooka ikapana na Vaisraeli nawo Vaisraeli vakakapwa vakawaawa vandu vafikye fiku fiina. 3Naasa kyeeri vandu valya valefika kulya ulaleny vakaamba, “A nkiki-dwa alyi Nndumi Iruva alukapa Vafilisti veelollye? Nndeny lundeende isanduku llya lya mavavaso lyuuka Shilo lulyeende kunu, llyo lyishelwaauwa maakony a vakiduva yeva veru.” 4Naasa vakaruma vandu vakeenda Shilo indeende isanduku llya lya mavavaso a Nndumi Iruva llyimbi va findo fyoose vana vallya va Eli wo Hofni na Finehasi mfo kundo veekai kulya Shilo na isanduku elyo lya Nndumi Iruva vave vakasha. 5Nalyo kyeeri isanduku elyo lyilefitwa alya ulaleny, Israeli woose vakakapa ukoru na finya kutani sumbai yarerema! 6Kyeeri Vafilisti valeeta kyoorongye kilya vakasavaa veeshambaa, “A nkyoki ekyo kingani indo kyasheya Veebrania yewo?” Llyo valeetumuso ni isanduku llya lya Nndumi Iruva waawo lyammeendwo. 7Vafilisti llyo valeiryaa vakamanya yeto ni Iruva ansha ulaleny kwawo. Vakaamba, “Oshiny lweru, mashika uka elyo nkiletanyike kindo kiro-fo.” 8Oshiny lweru, a ni vi asheluutaa maakony a maruva yoo a finya? Yoo nng'u maruva alya alekapa Vamisri kikasha nnu kulya kasa. 9Kaaryeny kyuumi yeni Vafilisti, mulasheeva mashinga a Vaebrania yewo shaasa wo valemmba mashinga eru. Shamuvia kaaryeny kyuumi mukapani nawo. 10Vafilisti llyo valekapana na Vaisraeli, vakavakapa, Vaisraeli vakarishywa wo nndu yeemeny lyakwe, vakawaawa vandu veengi nnu, itorito lya Israeli veenda na marende valefwa ni 30, 000, nawo Hofni na Finehasi wo vana va Eli vakawaiyofo, 11vakasokwa na isanduku llya lya mavavaso a Nndumi Iruva.
Ufu lwa Eli
12Nalyo nndu umwi wa ufyari lwa Benyaminy kookau eerishaa, kandefika Shilo nkonu yeto mweni, nato soori takwe mmbo temba ngosha, nawe muni katefuka tefu. 13Afika indi we Eli mmbo ekee rembo kitiminy kyakwe yoo mbai ya shia, etirwa ni usau nnu kimaruma kya isanduku lya mavavaso a Iruva. Kyeeri nndu yeu alefika kulya murin mmbo aleamba shaasa kyava, muri moose ukakapa kiiyo neesavaa. 14Kyeeri Eli aleeta kyoorongyekya kiiyo ekyo, kakuvesa muni, “A nkyoki ekyo? Nndu ulya kaangusya kandenruuya mbony tilya.” 15Nawe Eli ekee wa myaaka makumi kyeenda na nyanya nawe emfwa miso. 16Nndu ulya kavia Eli, “Yeny mmbo shooka fireny.” Nawe kammbia, “Mmbo kyeenda inda?” 17Nawe kammbia, “Vaisraeli mmbo varisha na vandu veengi nnu vakawaawa sanda na vana vafo vavii Hofni na Finehasi, nawo vakasokwa isanduku llya lya mavavaso a Iruva.” 18Llya alesenda isanduku lya mavavaso indi, Eli kawa na numa ekee kiriny, kafika nria kafwa, mashika emmikwa nnu kava nroo. Eli mmbo ensalallya Vaisraeli ando a myaaka makumi aanaa.
Ufu lwa Nka wa ding'u wa Finehasi
19Na mwalyi wa Eli, we nka wa Finehasi eekufingye kufii naniingwa mwana, nawe-da llya aleeta mbony ta isokwa isanduku lya mavavaso a Iruva, na ndammi na mmi wakwe vamfwa, kakwiinyika eelyiwa ni usu lwa mwana we kawonika. 20Lyo we kyeeri ekeefwa vaka valya vekee nawe vakammbia, “Kulairyee-fo, mwana wafo mmbwa kyuumi.” Lyo we nalarouwe nta nalalole mwana. 21Kafishya mwana irina ni Ikabodi, nkyo kyaamba, “Itumbe lyammuuka kunu Israeli, kimmba isanduku lya Iruva lyammiipowa, na kya ndammi na mmi wakwe.” 22Kawuya kaamba, “Yee ng'ira, Itumbe elyo lyammuuka kunu Israeli kimmba isanduku lya Iruva lyammiipowa.”
Currently Selected:
1 SAMUELI 4: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
