1 SAMUELI 2

Kiterewo kya Hana

1Nawe Ana katereva Iruva kaamba:

Nrima wakwa wang'anisa Nndumi Iruva

Neekyo Nndumi Iruva ashitannya kikashiniinga finya,

Kana kyakwa kakaseka yewo vashisuuye.

Kimmba ukiro lwafo lwasheengye nsia,

2Nkwiifo akee mweele sha Nndumi Iruva-fo.

Mashika nkwiifo akee sheewe-fo

Nta nkwifo ando kwa yoovya sha kwa Iruva weeru-fo.

3Loleny mulaengere irera mwikurosaa

Reny marero eekung'anisa

Mashika Nndumi Iruva eeshi fyoose

Fyoose fitanwaa kafyeesa

4Fisha fya vaafinya fyamfika-fika

Neewo vafwafwa vakatira finya.

5Neewo vewurye ulaalu vakakukumba vawonise kyeelya

Neewo veetirwa nshaa vakawona kiimuyo

Yee, neeto ekee kyuumba ammbona vana mfungare

Neeto muni vana kawuya iva mfwafwa.

6Nndumi Iruva mmbo aidima iwaa,

kooka-fo kaviirya muu

kasota fika kwa vafu, kawuya irosa-se.

7Nndumi Iruva mmbo asasammbwa nndu,

kawuya kamwallwa isimba

Mmbo asota, kookafo karosa.

8Kaipoo vafwafwa wooka efo kiluulyiny,

Neeto nalatiri kindo nooke efo uretiny,

Naambo navike woose ando amwi na vasuri

Vashekaa rembo kitiminy kya itumbe.

Mashika ni Nndumi Iruva asiikye ulana yelu,

Kavelutiryau kyeeri kyoose.

9Mmbwe asheteteraa marende a veele vakwe

Neewo varavi varewa ireeminy lyawo veemalallye sau.

Mashika lyo yewo vatiri finya mmbashevingaafo

10Yewo veekukikisa na Nndumi Iruva mmbo vashesewaa deny,

Nndumi Iruva ashekapaa fishingo fyoose fya ulana.

Nasheniinga mangyi yakwe finya

Neeng'anisa umangyi lwa nsero wakwe aleambwa mafura

11Naasa Elikana kuwuya na kyen kulya Rama. Nawe mwana ulya kakaa na nkohani Eli eerundyaa Nndumi Iruva.

Vana va Eli

12Vana valya vavii va Eli vekee vandu vaafu. Nta mmbalelatya ukeemi lwa Nndumi Iruva-fo, 13nta imanya kya usumanu lwa ukohani efo kwa vandu-fo. Kyeeri nndu aleuta kiraso kyakwe, nndu arumwa ni nkohani mmbo eeshaa, kyeeri nyama yapooka irura, kasha eerye uma lwa yiilwa nyama efo nunguny 14nawe mmbo ashoolotaa-fo uma yelo na finya efo nunguny, na nyama yeyo shoose ishuukaafo kayiipoo. Nawo vakatanya Vaisraeli woose indo, yewo valesha na Shilo. 15Na kulore vankora mafura eemamita na muro, nndundi wa nkohani mmbo ashaa kavia ulya arye kiraso kyakwe, “Utya mbele nkohani nyama ya yookya, mashika we nnyakundye nyama shikore-fo, mmbo akundye nyama mbisi.” 16Na kwakooya nndu yeto ashemmbyaa, “Nkuti luute-fo mbele mafura yoo eemamita na muro, lyo yewe kwiipony nyama” shasa kukundye, llyo nawo veeshaambaa, “Ra, nshi indo-fo, shiniingya ulaalu indi, kwallema, mmbo nshiipoou na finya!” 17Nkyo ulyamari lwa vana yewo va Eli lukang'ana nnu mbee ya Nndumi Iruva, mashika indo mmbo valemina firaso fileengyo Nndumi Iruva.

Samweli Kulya Shilo

18Naasa we Samweli karaa isara lya kikohani kava mwiirundya Nndumi Iruva pookya ekee n-du. 19Nawe maye kava mwimfumya kansu shidu wo mwaka elyi veerwaa na ndeye indeindya kulya Shilo. 20Nawe Eli kavikya Elikana mbora we na nkaakwe, kaamba, “Nawe Nndumi Iruva nakuwonisye vana vengi na nka yeu ando a yeu kulenningya.” Naasa Elikana na nkaakwe vakasoka na kyeny. 21Nawe Nndumi Iruva kalyilya Ana nawe kaira vana vengi, va kyuumi vararu na va kika vavii. We Samweli kang'anya kulya mmba ya Nndumi Iruva.

Eli na Vana Vakwe

22Nkohani Eli mmbo ammikwa deny, kava ashiitaa mbony toose shaasa vana valya vakwe veketannya vandu neelala na vaka valya verundyaa ando eele. 23Kavavia, “A nkiki elyi mukeetana findo firo? Mmbo shiitye kya mbony tany shiravi tuuka efo vanduny yewo woose. 24Indo nkivaa-fo vana vakwa, mashika mbony yeti shiitye nshi shisha nta kinnywo-fo mmbo mukelyamarya vandu va Nndumi Iruva. 25Kwakooya nndu alyamarya ungi Iruva mmbo ashentaiyaa, lyo kwakooya nndu alyamarya Nndumi Iruva mmbi ashekaa kyaalu kyakwe?” Lyo mmbalekunda yaaranya ndeye-fo, kimmba nawe Nndumi Iruva enrummbwa ivauta-u.

26Nawe Samweli keengera ing'ana neetumaa kasennya Nndumi Iruva na vandu.

Ukisuku lwa Mmba ya Eli

27Naasa nkisuku wa Iruva umwi kashesheya Eli, kammbia, Nndumi Iruva aamba indi, “A ndesa nshi yeny shilekoora na vandu va mmba yafo kyeeri vekee ushingeny kulya Misri veerundyaa Farao?” 28A ndesa nshi yeny shilensauwa efo ngyufyariny toose ta Israeli naambo nave nkohani wakwa, nakae yoo kitareny kyakwa kyeerasya nootyeu firaso, neeraa masara meele? A nshi yeny shileniinga va mmba ya ndoo firaso fyoose efyo vana va Israeli valemamita na muro? 29A mmbo kyava inda elyi mwakapa firaso fyakwa na waafu lwany na ando yoo eerasya mukamina, kweendya vana vafo ngota yeny naambo mukoye ivanda kyuuka efo firasony fya vandu vakwa fikee fisha? 30Kikeeny indo Nndumi Iruva we Iruva wa Israeli, mmbo aamba indi, “Ni dede lyo shileamba mmba yafo na mmba ya ndoo mmbo isheshirundyaa llung'anu, lyo ulaalu Nndumi Iruva mmbo aamba, Ulaalu nkikivaa indo-fo. Mashika ni yewo veni veeshiindya nshevakundaa, neewo vashiminaa shivakabe vave ruu.” 31Lolate, kwiifo kwiishaa mikonu yeyo nshewaa vana vafo vakoo, nta kwafo kulashelollyoo-fo nndu nkuu. 32Neewe mmbo kushelolaa usimba yelo vandu vengi va Israeli vasheniingwaa kufulukyo, na kwafo yewe nkushelollyoo-fo nndu nkuu na kukafika indii-fo. 33Na nndu wafo moose yeto nshenraa efo ishoreny lya nkohani mmbo ashevaa sha mfu miso, nakurovye nriminy, na va-ufyari lwafo woose vafwe valandeona irika lya uniini. 34Na wende lwa vayo llo elu, ni ekyo kishekooyaa vana vafo yewo vavii, Hofni na Finehasi vashefwa veevavii nkonu umwi nsi. 35Neeny nshekuwonisya nkohani wa toki, neenutye fyoose efyo nshembavasyaa, shinkaarise, mashorenya Nndumi vokwa llung'anu 36Neeto moose ashesaau efo kwafo mmbo asheufiiryaa ndi naone-u kindo kinnywo kyeelya na fesa shinnywo, nantereve, “Shakutereva ishora iinywo lya ukohani, naambo shiwoniu kindo kidu kyeelya-te.”

Currently Selected:

1 SAMUELI 2: MAS2

Highlight

Compare

Copy