1 SAMUELI 22

Sauli Awaa Vakisuku va Nndumi Iruva

1Nawe Davidi karisha-fo kandefika mbangenyya Adulamu kyeeri vandu va ufyari lwa ndeye valemanya mbony eti vakandensora-fo. 2Wo nndu eetiri ukiva uve, ao sye, na valya veetiri kivasavesaa nriminy, vakandekusanyirya kulya kwakwe, nawe kavasongoya. Nawo mmbo veekee vandu mayana aana.

3Naasa kookau keenda Mispe kulya Moabu, kavia mangyi ya Moabu, “Shakutereva nde na ma wooke kulya vashekaa kunu kwany kutani shamanya ekyo Iruva akundye kyakwa.” 4Kaveende kwa mangyi ya moabu, vakakaa kwakwe kyeeri kyoose Davidi ekee kulya mbangeny. 5Naasa nkisuku Gadi kavia Davidi, “Kulakae kunu mbangen kumuni-fo, enda kulya urukeny lwa Yuda.” Nawe Davidi keenda kulya nsiton wa Heveti.

6Sauli kasheeta sheelyi Davidi allollyo na vandu valya vekee nawe. Sauli nkulya Givea ekai, kakaa ando kukweekerye sindeny ya nri, eetiri na ifumu wokony, na vasero vakee vendingitye. 7Kavia vasero vakwe, “Aranyiny yeni vandu va Benyaminy, ‘Mwana yeu wa Yese ashemuningaa marema yeni wo nndu, na minda ya misabibu, navemuvika veesalallya fiku fya vandu, na mayana a vandu,’” 8Nkyo muleende uriingyi uwe yakwa, nta kulakaefo nndu ashishunya. Mwana wakwa kakulunga na mwana wa Yese, kulave nta nndu ashitinnyo, nta nndu aleshivia sheelyi mwana wakwa mmbo ariani na nsero wakwa vashilaaye vashiwaa?

9Nalyo kweiyo nndu evaangwaa Doegi, Mwedomu, eeselelyi na vandu va Sauli, kammbia, “Yeny shimuni shilelollya mwana yeto wa Yese esheendaa Nobu, llya ekee kwa Ahimeleki wa Ahitubu.” 10Nawe Ahimeleki kavesa Nndumi Iruva kyakwe, kamweekya, kanniinga shoonga na usu lulya lwa Mfilisti ulya Goliati. 11Mangyi eeta indo karuma vandu va ndeende nkohani Ahimeleki, mwana wa Ahitubu sanda na vandu va mmba yaawo woose, na vakohani vengi woose yewo vekee Nobu, woose vakasiiya kwa Mangyi. 12Sauli kamba, “Aranya ulaalu, yewe nndu wa Ahitubu,” Nawe kairikya, “Shiitye woi mangyi. 13Sauli kammbesa, ‘Nkiki elyi muleshiriingya, yewe na nndu wa Yese?’” Yewe mmbo kulenniinga mikate na usu, neewe kwamweeka irera na Iruva, naambo nasheshilaaya nashiwaa. 14Ahimeleki karouwa mangyi kammbia, “Efo varundiny vafo woose ni ungau eefo akee nsha sha Davidi, akee nkwe wa mangyi, mwiringa fyama fyafo, kavekutirya indo wiindi sha we?” 15A ndesa ni inu yenida sharera na Iruva kimaruma kyakwe? Ekyo kiire kwaasha, kya mangyi ikusara yeny nsero wakwe shikeenndiingya, nta na vandu va mmba ya nde llwiishi nta kindo kimwi-fo. 16Nalyo mangyi kavia Ahimeleki, “Nkuti kufwe, Ahimeleki, yewe na va mmba ya ndoo woose.”

17Llyo mangyi alevia vasikari varingi valya vekee nawe, “Indukyeny vakohani yeva va Nndumi Iruva muvawaa woose, mashika mmbo vasangi na Davidi, mashika valemanya llya alerisha, lyo valakunde ishivia.” Lyo vasero valya va mangyi vakalema ipaana vakohani va Nndumi Iruva. 18Llyo mangyi alevia Doegi, “Kyasia, vawaa yewe.” Nawe kawaa vandu makumi nyanya na varaanu vakee veeraa masara meele 19Numa kandekapa muri wa vakohani nto Nobu, womi na vaka na vana na vakoku vashoongaa, na ng'umbe na mishungu na mburu. 20Neefo kwa vana va Ahimeleki wa Ahitubu, katurunya-fo nndu umwi, mmbwe Abiatari kanderishya kulya Davidi eekai. 21Nawe kandeongoya Davidi shaasa Sauli alewaa vakohani va Nndumi Iruva. 22Davidi kavia Abiatari, “Nkonu ulya Doegi Mwedomu eekee kulya Nobu shilemanya deny sheelyi nkuti tupu nandevia Sauli.” Naasa-da ni yeny sheengye vandu va mmba ya ndoo vakawaawa. 23Kyasia, kaany neeny yaa, kulairyee-fo, shamashika yeto akeruuya ishiwaa mmbwe-da akeruuya ikuwaa neewe. Lyo yaa kwakwa mmbo kukukayaau kibwa.

Currently Selected:

1 SAMUELI 22: MAS2

Highlight

Compare

Copy