1 SAMUELI 21
21
Davidi arisha kooka kwa Sauli
1Davidi kookau keenda kwa nkohani Ahimeleki kulya Nobu. Nawe Ahimeleki kallollya kandemwaambya eereremaa, kammbia, “A nkiki elyi kukee kumuni kulariani nta na nndu mwikwiimya?” 2Davidi kavia nkohani Ahimeleki, “Mmbo kwiifo kindo mangyi ashivavasya,” kaamba, “Kulave nndu moose amanya, kya kindo eki nkeekuvavasya-fo.” Llyo neeny shavavasya vasero vakwa vanderunda ishora lyingi. 3A nkyoki kutiri. Nkyeshiwonisya mikate iraanu ao shoonga ingi kukooyaa kutiri. 4Nawe ukohani ulya kavia Davidi, “Nshitiri mikate yeelya kyen-fo, kuuta yeyo myeele myeni. Muiwonisaa lyo kwankooya vasero vafo valandesange na vaka.” 5Nawe Davidi kavia nkohani, “Mikonu yei iraru lulandesange na vakafo.” Na findo fya vasoro yeva fyoose mmbo fyekee fyeeremutu, neese lukakaa kyaarony. A fiiya fyeru nshi fileva fyeeremutu mmwasi? 6Naasa llyo nkohani alenniingya mikate ilya myeele, kimmba ileefo mikate ingi kuuta yeyo. Nayo ikootwa alya mbee ya Nndumi Iruva na ando a vayo ivikwau mikate miiya. 7Naasa kweefo nndu umwi wa vasero va Sauli, ensaa yoo mbee ya Nndumi Iruva. Nndu yeto ni Doegi, nawe Mmwedomu, nawe ni nsongoru wa veesi va Sauli. 8Naasa Davidi kavia Ahimeleki, “Yaa kukai kwiiyo usu ao ifumu? Mashika yeny nshirye usu nta fisha fyakwa-fo, mashika shaasa mangyi ashiruma mmbo shakupoo tiny.” 9Nkohani kammbia “Usu llwa lwa Goliati ulya kulemmbwaa kulya imungon lya Ela, ekalu yaa, lukeewoososye soori yaa numa ya soori ya nkohani. Kwankunda ilwipoo, warya, mashika yaa nkwiyoo usu lungi kuuta elu-fo.” Naasa Davidi kammbia, “Shiniingya, mashika nkwifo lwiilanyi elu-fo.”
10Naasa Davidi kookau kandoovya mashika a yiirya Sauli. Kaengya mangyi ya Gati avaangwaa Akishi. 11Vasero va Akishi vakammbia, “A yeu nshi Davidi akee mangyi ya uruka?” Muleeta kiimbo kyakwe-se kiimbwa kikaambawa,
“Sauli alewaa fiku fyakwe.”
Na Davidi kawa fiku makumi.
12Davidi kadollya marero yoo moose nrwen wakwe, kawuya yiirya mangyi ya Gatiwe Akishi. 13Kakwaalasha vai nave sheelyi nrwe ukee nkasha, kaarwa-arwa myaango na ngyala, neesurutya maare efo nguyony. 14Llyo Akishi alevia vandu vakwe, “Mulollye, yeu ni nndu wa ukwale.” A nkiki elyi mulemoora kwakwa? 15A yeny mmbo shitiri mashora-ki na vandu va ukwale, na yeu mmbo asha kwakwa nasheoryau ukwale lwakwe? Yeu alalaa mmba kwakwa dede?
Currently Selected:
1 SAMUELI 21: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
