1 SAMUELI 23
23
Shaasa Davidi Aleauwa Muri wa Keila
1Nalyo Davidi kashefityo mbony kyeyaamba, “Vafilisti mmbo vakeekapana kulya Keila vakaipoo na nganu tikee muunguny. 2Llyo Davidi alevesa Nndumi Iruva, ‘Sheenda-ro mmbee shindekapa Vafilisti yewo?’ Nawe kammbia, ‘Yee, kweengye kundekapa Vafilisti yewo, kwaauwe muri wa Keila.’” 3Lyo vandu va Davidi vakammbia, “Yese yaa Yuda mmbo lweereiye Keila.” A nshi kivaa kikasha mmwasi kwakooya lweenda-fo indekapana na Vafilisti? 4Nawe Davidi kavesa Nndumi Iruva lya kavii, nawe Nndumi Iruva kammbia, “Kwiipoo kweenda Keila, mashika nshevikaa Vafilisti yewo maakony afo.” 5Nalyo Davidi kakupoo na vandu vakwe vakeenda Keila, vakakapana na Vafilisti. Vakatira ng'umbe tawo, neewaa vandu veengi nnu deny. Niindo Davidi aleauwa vandu va Keila.
6Llya Abiatari we mwana wa Ahimeleki alerishya kwa Davidi mmbo alesha eerye masara a kikohani. 7Nalyo Sauli kandefityo mbony sheelyi Davidi nkulya Keila akai. Sauli kaamba, “Ulaalu Iruva mmbo ammuvika maakony akwa, kimmba ni efo mmbo akai, muriny ukee nraye ukaringityo riti ukarayo nisha.” 8Sauli kavaanga vandu vakwe woose naambo vandesoka na Keila vankape, vandeshingillya na Davidi na vandu vakwe. 9Davidi nawe kaveemanya-da, nkasha yeto Sauli akundye intannya, naasa kavia nkohani Abiatari, “Ende isara elyo lya nkohani na yaa.” 10Naasa Davidi kaamba, “Woi Nndumi Iruva, Iruva wa Israeli mmbo shammiita deny sheelyi Sauli mmbo akundye ishekaapa Keila kimaruma kyakwa yeny nsero wafo.” 11A ndesa Nndumi Iruva vandu va Keila mmbo vashirambikyaa maakony akwe? Woi Nndumi Iruva wa Israeli shakutereva, rambuya ishinga lyafo lyimanyi. Nawe Nndumi Iruva kavia Davidi, “Yee n-dede Sauli akeesha.” 12Nalyo Davidi kaamba, “Ale Nndumi Iruva, vandu va Keila mmbo vasheshivikaa yeny na vandu vakwa maakony a Sauli?” Nawe Nndumi Iruva kammbia “Yee, niindo vashetanaa.” 13Nalyo Davidi na vandu vakwe vakooka kulya Keila veeruuyaa kwa yeenda. Lyo Sauli alefityo mbony kavio? Davidi anrisha, nkyo nawe karafo yeenda Keila.
Davidi Urukeny lwa Mafumbu
14Naasa Davidi kanderishya urukeny lwa fidooro fya Zifu kakaa mbangeny. Nawe Sauli kava annduyaa wo nkonu, lyo Nndumi Iruva nnyalemmbika maakony akwe-fo. 15Davidi kalollya Sauli mmbo akeesomukya naambo namuute muu, lyo we kakukaya kulya kasa ka Zifu kulya Horeshi. 16Nalyo mwana wa Sauli, Yonatan kandesora Davidi kulya Horeshi, kammbiirya muu na marero a Iruva 17kammbia, “Kulairyae nta kinnywa-fo, mashika nde, Sauli nnyakukooyaa-fo Yewe mmbo kushevaa mangyi ya Israeli neeny shive wa kavii kwafo.” Naakwa ni nde Sauli niindo eeshi, 18Nawo ve vavii vakavikyana kyaasa mbee ya Nndumi Iruva. Davidi keengera ikaa efo Horeshi, lyo Yonatan we kakuwuiya na kyeny. 19Naasa vandu va Zifu vakarwa na kwa Sauli kulya Gibea, vakandemmbia, “A Davidi yeto kukenduuya nshi we ulya oovye kasa kweru kulya Horeshi, kidoorony kya Hakila, taari ya sinde ya Yeshimoni? 20Kyasian woi mangyi, sokaany nafo shaasa kukukundyaa kumuni, neese lushemmbikaa maakony a mangyi.” 21Sauli eeta indo kasennywo kavavia, Nndumi Iruva namuvikye mbora, elyi mwasheekya. 22Ulaalu nkye endeny shamutereva, mundesuma waarya mumanyi ando alalaa, llyo muwuye-se na kwakwa, neeny nshekupoo neeni. 23Mashika kyeeri kyoose elyi akee kunu urukeny elu mmbo nshesallwaa efo nkukeny wa vandu va Yuda shinnduuyaa. 24Nawo vakawuya na Sifu mbee ya Sauli. Lyo we Davidi na vandu vakwe vendekaa kulya kasa ka Maoni, mfo Araba taari ya sinde ya kasa eko. 25Nalyo Sauli na vandu vakwe vakannduuya. Kukava vandu vavia Davidi, kandekaa mbangeny efo Maoni. Sauli ekimanya indo kandellaya-fo efo kasa ka Maoni. 26Sauli keenda taari yei ya ifumbu na Davidi na vandu vakwe vakareveka na taari yeyo ingi, vakaangusya Deny yuuka efo kimaruma kya yiiryaa Sauli Mashika Sauli na vandu vakwe mmbo vekundye ishingillya Davidi na vandu vakwe naambo vavaware. 27Kikeeny indo kasha nrumi umwi kwa Sauli, kammbia, “Wuya, osho uviny, Vafilisti vammboya uruka.” 28Kyasia Sauli karafo isora Davidi, kawuya nandekapana na Vafilisti. Nkyo ando alya kukavaangwa “Selahamalekoti.” 29Naasa Davidi karwa ooka nafo kandekaa turuveny ya Engedi.
Currently Selected:
1 SAMUELI 23: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
