1 SAMUELI 18
18
1Nalyo Davidi eekimaa irera na Sauli, Yonatan kakundana na Davidi deny, nrima wa Yonatan ukakunda Davidi nnu. 2Sauli nawe katira Davidi nalakikunde nawuye kyen kwa ndeye. 3Yonatan na Davidi vakakundana vakatana vavikyana kyaasa. 4Yonatan kakuuta soori yakwe ya uwe kavika Davidi na masara akwe na usu na ura na nkanda wa kisiny. 5Davidi katana wo kindo shaasa Sauli alemmbavasya, katana nisha, Sauli katana ammbika mwiisalallya vandu va fira. Vandu woose vakafura ando amwi na varundi va Sauli.
Sauli Atirya Davidi Kififi
6Naasa kyeeri Davidi alemaa iwaa Mfilisti ulya, vaka vakasomukya wooka miriny myoose ya Israeli veeshiimbaa neefina naambo vasheambya Sauli. Mmbo veerye fiperengete na finanda vekapaa ukoru. 7Vaka valya vakeemba na yiirikyana indi,
Sauli mmbo awaa fikufyakwe
Lyo Davidi mfiku makumi.
8Sauli ekiita indo katirwa nkifirifiri deny, kasukyo nnu mmarero yoo, kaamba, “Davidi we mmbo vanniinga fiku makumi, neeny vakashiniinga kiku kyeni, a yekyo ashiidimaa-se iwonisa nkyoki kuuta umangyi weni?” 9Uka nkonu ulya Sauli katirya Davidi kififi.
10Elyi lya ndesi ya vayo mumuyo nkasha wuuka kwa Iruva ukasheya Sauli sha ikafya-da, kaororo efo kyeny kwakwe. Nawe Daudi kava mwiikukapya kinanda kyakwe kya ura shaasa eeshivye. Sauli katira ifumu efo wokony lwakwe. 11Sauli keera ifumu llya eekusarye mmbo lyidoshaa Davidi lyindekooya isimamba wa mmba. Davidi kakukanga kavii karishya kwaasha. 12Sauli keeryaa Davidi mashika elyi Nndumi Iruva eekee nawe kanra we. 13Kimaruma kya vayo Sauli kansomuta efo kwakwe kammbika isalallya vasikari kyiku. 14Davidi kava nndu mwaarya deny efo mitanyiny yakwe. Nawe Nndumi Iruva kankaya. 15Sauli eekilollya shaasa Davidi aletana fya waarya, kamwiiryaa. 16Nawo vandu na Israeli na Yuda vakakunda Davidi mashika aleva mwivarundya.
Davidi Aalyika Mwana va Sauli
17Naasa Sauli kavia Davidi, “Mmbo nkuningaa mfu wakwa nniini we Merabu nave nka wafo, lyo yewe kuve nsikari wakwa nkaari wa fira, kukapani fira na vandu va Nndumi Iruva Mashika Sauli mmbo alekusara we nalakimmbwaafo, nandewaawa ni Vafilisti.” 18Naasa Davidi kavia Sauli, “A yen ni vi, na vandu vakwa mmbo vaki, ao va mmba ya nde, shitani shava nkwaa mwona wa mangyi?” 19Lyo kufii Davidi nooriswa Merabu, koorwa ni Adrieli nndu wa Meholati.
20Lyo mfu wa Sauli, Mikali kakundana na Davidi. Vandu vakandevia Sauli, nawe kikansenya. 21Sauli kaamba efo nriminy, Ra namoore nambiyye nreiyo, na Vafilisti nawo vambereye. Naasa Sauli kavia Davidi lya kavii, “Kukeeva nkwe wakwa.” 22Naasa Sauli kavia mashinga akwe, Rereny na Davidi kirika mumbie, “Mangyi mmbo akukundye, na vandu vakwe mmbo vakukundye. Kuviyye nkwe wa mangyi.” 23Nawo vandu va Sauli vakavia Davidi marero yoo moose. Davidi kavavia, “A yeni mmulollye shaasa kikee kindo kiniini iva nkwe wa mangyi neeny shikee mwana wa ngwera, shilaishiwa nta?” 24Nawo vandu va Sauli vakandemmbia shaasa Davidi aamba. 25Naasa Sauli kaamba, “Vieny Davidi indi, Mangyi nnyakundye findo fya ukwe-fo, mmbo akundye kurini Vafilisti iyana kumweengye, kive nkyo ataiya nakyo vakiduva vakwe.” Sauli kakusara nnyo shia arumataa nayo Davidi. 26Kyeeri vandu va Sauli valevia Davidi marero yoo, Davidi kafura deny naambo nave nkwe wa mangyi. Nalyo nkwemmiira-u mikonu miingi-fo, 27Davidi kakupoo na vandu vakwe, kandewaa vafilisti mayana avii. Davidi kavarina keengye mangyi Sauli mashong'u moose, naambo nave nkwe wakwe. Sauli kanniingya mfu wakwe Mikali nave nka wakwe. 28Sauli eekilollya indo kamanya Nndumi Iruva mmbo akee na Davidi. Na Mikali kakunda Davidi nnu. 29Sauli keengera yiiryaa Davidi na insua.
30Wo kyeeri vasonguru va Vafilisti vakakwiipoo vakapani na Israeli. Lyo wo kyeeri Davidi katana fya urango kailanya vandu va Sauli woose. Davidi keengera itira nnduma.
Currently Selected:
1 SAMUELI 18: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
