1 SAMUELI 19
19
Yonatan Alyillya Davidi
1Naasa Sauli kavia mwana wakwe Yonatan, na vandu vakwe woose, vawaa Davidi. 2Lyo Yonatan mwana wa Sauli mmbo eekundye Davidi deny, Naasa Yonatan kandevia Davidi, “Kwiishi, nde vakwa, Sauli mmbo akeeruuya ikuwaa.” Kyasia, mmbo shakutereva fyeeri fya ngama koovye. 3Neeny mmbo shisalalaa yoo kufii na nde yoo nndeny kufii na yoo newe kukai, shirere nawe mbony tafo. Kwakooya shalollyany kindo kivaa ikuvia, shikuvie. 4Naasa Yonatan karera kisha kya Davidi kwa ndeye Sauli, kammbia, “Lola mangyi nalatanyi nsero wakwe Davidi ukasha, mashika nsero wakwa nnyalemulyamarya-fo.” Na fyoose alekutannya mmbo filesumana deny. 5Kimmba alevika muu wakwe nrengeny, llya alendekapa Mfilisti ulya, nawe Nndumi Iruva keengye ukiro uniini kyuuka nawe. Yewe kumuni mmbo kulelollya ekyo kikakusenya. “A nkiki elyi kukundye iwaa Davidi kulyamare neebuswa samu ilatiri mbese?” 6Sauli kairikya ekyo Yonatan alemmbia, llyony kalya mboo kaamba, “Mmbo shalya mboo na irina lya Nndumi Iruva, Davidi nnyawaawaa-fo.” 7Nalyo Yonatan kavaanga Davidi kammbia fyoose shaasa varera. Naasa Yonatan keende Davidi kwa Sauli, kava mwiindundya sha llya lya mbee.
8Naasa elyi numa-se kukakwiipoo fira ya Israeli na Vafilisti, Davidi keenda fireny, vakawaa vandu veengi nnu, Vafilisti vakafunwa.
9Naasa mumuyo ulya nkasha Nndumi Iruva aleurika ukaanga lyingi Sauli eekee mmba kwakwe, Neelyi Davidi ekeekapa kinanda kilya kya ura, Sauli katira ifumu. 10Sauli keesa ikapa Davidi na ifumu kutani lyindekooyaa isimamba, kakyinga, ifumu lyikeenda mmbombony. Davidi katurushukau karisha kio kilya. 11Sauli akilollya indo karuma vandu vandewaa Davidi elyi kwiikyaa. Na nka wakwe Mikaliy karera nawe, kammbia, “Kwanra kularisha kukire muu wafo ndesi mmbo kuwaawa.” 12Nawe Mikali keeta Davidi na idirisheny, karisha kakia. 13Mikali kawuya keepoo ifwanu lya nndu kalyaara kitareny, kalyivikya na nto, kalyisikya na soori nisha. 14Elyi Sauli aleruma vandu vandetira Davidi, nkaakwe Mikali kaamba mmbo alwee. 15Naasa Sauli karuma vandu vandellola, kaamba, “Neendwa yaa na kitara ekyo kyakwe, nshembwaiyau.” 16Llya vandu valya valerumwa valefika kwakwe, ate, ni ifwanu lyikee kitareny lyilaaye nto. 17Sauli kavia mfu wakwe Mikali, “A mmbo kyava inda kwashilemba indi kweekeya nkiduva wakwe nashirishe?” Nawe Mikali kavia Sauli, “Davidi mmbo aleshivia, ‘Shira sheende, shilasheekuwaa.’”
18Niindo Davidi aleturushuka, nawe kandesora nkisuku Samweli kulya Rama, kammbia mbony toose shaasa Sauli aletana. Naasa vakakupoo veevavii vakandekaa Nayoti 19Sauli kasheeta sheelyi mfo vakai, kaamba, “Ate Davidi nkulya Nayoti ya Rama akai.” 20Nafo-da Sauli karuma vandu vandentira. Naasa varumi yewo veekilollya vakisuku veeshaawuyaa fisuku na Samweli eekee nawo, varumi yewo nawo vakaawuya fisuku, mashika llyamumuyo wa Iruva ulevakaya. 21Sauli ekivio eki karuma varumi vengi, nawo-da vakaawuya. Sauli karuma varumi vengi lya kararu, nawo-da vakaawuya. 22Numa we muni keenda Rama, kandefika Seku ando kuiyoo kirori kiniini kya mura, kavesau, kaamba, “A Samweli na Davidi nkwi vakai?” Nndu umwi karouwa kaamba, “Vakee kulya Nayoti ya Rama.” 23Naasa Sauli keenda Nayoti ya Rama. Nato mumuyo wa Iruva ukansheya nawe kapooka yaawuya fisuku, eefinaa kutani andefika Nayoti ya Rama. 24Kakuuta masara akwe kapooka yaawuya alya mbee ya Samweli. Kalala mbereto nkonu piti na kio tararaa. Nalyo kikarerwa kikaambawa, “A nyira Sauli nawe ni umwi wa vakisuku?”
Currently Selected:
1 SAMUELI 19: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
