1 SAMUELI 17

Goliati Aruuya Vaisraeli Mwaandu

1Naasa kyeeri eki Vafilisti vakakuumba kufii na muri wa Soko wa Yuda, yoo nnang'ani ya Soko na Azeka muri wa Efes-damimu vandekabana na Israeli. 2Nawe Sauli na Israeli vakakuumba kulya imungony lya Ela vandekapana na Vafilisti. 3Vafilisti vakasalala uwe ya ifumbu taari imwi na Vaisraeli vakakaa ifumbuu taari yeyo ingi. 4Nalyo nndu mbafu wa Vafilisti avaangwa Goliati wa Gati kava mwaasha kufii meta isaru. 5Karaa kofia ya minya na findo fyeeraa firoo nnu fikavetira wuuru uniini nnu. 6Mmbo eeree findo fya minya fika efo marendeny, na ifumu lyakwe likava iroo, lya minya. 7Na munyi wa ifumu lyakwe mmbo weewakkye kyiri kya mwiifuma soori, nrwe wa ifumu lyakwe mmbeefye shekeli mayana arindaru a minya na mwiintirya ngao mbee. 8Na Goliati kasalala kakoomya itorito va Israeli kaamba, “Mmbo mwasomukya mwushekapana-ro.” Yeny mmbo shikee Mfilisti neeni mukava mashinga a Sauli. Nkyesauweny nndu umwi nashekwaananya neeny, 9Kwakooya eedima ikapana neeny neeshiwaa, llyo yese loose lushevaa mashinga any. Lyo kwakooya yeny shammbinga neemmbwaa, yeni muve mashinga eru, mulurundye. 10Mfilisti ulya kawuya kaamba, “Inu mmbo shamina itorito lya Israeli deny, sauweny nndu-te, shikapani nawe.” 11Naasan Sauli na Israeli woose veekiita marero yoo a Mfilisti yeto vakasavaa na yiiryaa nnu deny.

Davidi Kambiny kwa Sauli

12Nalyo Davidi we mwana wa nndu wa kulya Efrata nkyo kyuungo kya Betlehemu ya Yuda, eevaangwaa Yese, we mmbo eetiri vana va kyuumi nyanya, nawe Yese kyeeri eki kya mangyi Sauli mmbo emmikwa deny. 13Na vana valya vakwe vaniini va kyuumi mmbo vemmeenda na Sauli fireny. Na marina awo ni, Eliabu, mmbwe wa mmbee, wa kavii ni Abinadabu, wa kararu ni Shama. 14Davidi we mmbo ekee n-du wa yewo vengi woose. Yewo vasongoye iwonika mmbo valeenda na Sauli fireny.

15Nalyo Davidi kava ashendaa kwa Sauli neewuya-wuya indelola moonri a ndeye kulya Betlehemu. 16Nawe Mfilisti ulya kava asomukyaa mbateny wo nkonu ngama na nkwaany ando a mikonu makumi aana.

17Nalyo Yese kavia mwana wakwe Davidi, “Enda rwaaya vana va mau bakuri yei ya piisi na mikate yei ikumi kulya vakai ulaleny.” 18Na nsongoru yeto waawo kunrwaaye mafura yaa moomu. Endevalole shaasa veefo kusheshivia. 19Nawe Sauli na vandu woose va Israeli mmbo veekee kulya imungony lya Ela veekapanaa na Vafilisti.

20Kyasia Davidi kakuboony elyi lya ngama shuru, kareeya mwiisa moonri mburu eto tawo, keepoo findo efyo keenda shaasa ndeye emmbavasya. Keenda kakwaananya na mitika yawo veendekapanaa, veekabaa ukoru lwa fira. 21Veesreli na Vafilisti vakakuumba vakapani yeva kunu na valya kulya. 22Davidi kara findo fyakwe kwa nringyi va findo, kavingya itorito lyilya numa, kavakooya, kaidikira vanavamaye. 23Elyi eefo areraa na vanavamaye mbafu ilya ya Vafilisti ikasomukya, mmbwe Goliati wa muri wa Gati, nawe ni wa itorito va Vafilisti, karera marero alya meni eeshivye irera a imina Vaisraeli, nawe Davidi keeta kilya arera. 24Llya vandu va Israeli valelollya mbafu yeyo woose vakarisha veereremaa. 25Vakaamba, “Nyira, mwalollya nndu ulya? We mmbo asha nashearara Israeli. Kyasiany, nndu yeto ashiidimaa immbwaa mangyi mmbo anniingaa usimba lwiilanyi-dwa, namwoorise mfu wakwe, na vandu va mmba ya ndeye vakweengye urerwa kunu Israeli.” 26Naasa Davidi karera na vandu valya vekee kufii nawe kaamba, “A nndu ashiidima iwaa Mfilisti yeu nkyoki aniingwaa elyi oota Israeli fyaararony efyo fyakwe? Mfilisti yeu naleeshi Iruva nkyoki deny kutani eedima yaarara vandu va Iruva akee na muu?” 27Na vandu yewo vakavemmbia sha valya vengi-da kya nndu ashewaa mbafu yeyo.

28Nawe mwanamaye Eliabu keeta llya Davidi ekeerera na vandu valya. Karooywo n'ngoo kimaruma kya mwanawo Davidi kammbia, “Nkyoki kyakusota na kunu-ro? A moonri mmbi kwanreeya kulya kasa? Yeny mmbo shiishi ukushobi lwafo, na nrima yeto wafo shaasa ukai, mashika kyakweende vai ni ishelola fira.” 29Davidi kammbia, “A ekyo shauta-u kikasha nkyoki?” Shalola fira mmbo kikee kindo kikasha? 30Nawe Davidi keendukya nndu ungi kammbesa sha valya vengi, nawo vakavendouwa indo-da.

31Marero alya Davidi alerera eekimanyika vandu vakandevia Sauli, karuma nndu Davidi nandevaangwa. 32Davidi kavia Sauli, “Kulave nta nndu umwi eeryaa kimaruma kya mbafu yeyo-fo. Yeny nsero wafo mmbo nkundye yeenda shindekapana na Mfilisti yeu.” 33Sauli kammbia, “Ra, yewe nkushiidimaa nta kinnywo indekabana na mbafu yeyofo.” Mmbo kukee n-du nnu, indi nndu yeto mmbo akee nndu wa fira uka udu lwakwe. 34Davidi kavia Sauli, Kishinga kyafo kyeeri kyeeshisaa moonri a ndeeye mmbo kyesheyo nngare, ikatira yoonri lyakwe. 35Mmbo sheilatya, shaikapa neeisoka yoonri efo kaniny kya vayo. Kwakooya yashikillya yeny shaitira masauru yoo a vayo shaikapa kutani yafwa. 36Nsero wafo mmbo alemmbwaa miiso na ngare-da, nawe Mfilisti yeu nalaishi Iruva mmbo ashevaa sha mafisi yoo shilewaa, kimmba alearara vandu va Iruva yeu akee muni muu. 37Nndumi Iruva yeto aleshikira shilasheeranduwa mmiiso na ngare yeto, mmbwe asheshaauwaa maakony a Mfilisti yeu. Sauli kavia Davidi, “Nkye kweengyeny, nawe Nndumi Iruva nakusongoye.”

38Llyony Sauli alevika Davidi masara akwe a fira na kofia ya minya. 39Davidi karaa usu lwakwe, kakwiishivira yeenda, mashika llyo alepooka ifiraa. Davidi kavia Sauli, “Nshishidimaa yeenda shiree indi-fo, mashika nshilenkwiishivira ifiraa lyingi-fo.” Davidi kakuuta fyoose. 40Davidi keepoo nsengye wakwe, kasauwa na songoro isaanu ta mureny, kativika mbolokony yakwe ya yiisa mburu kasandau na ukova lwa yeera iwe. Nalyo kasorany Mfilisti ulya.

Davidi Avinga Goliati

41Naasa Goliati kasembeya kufii na Davidi nndu ulya eekurikye ngawo yakwe kansongoya. 42Kyeeri Goliati alelola efo neefo kalollya Davidi, kammina deny, mashika illya aleva mwana nkoo-da, adodorye kasenya kisangu. 43Mfilisti yeto kammbia, “A mmbo shava kite elyi kwashisheya na nsengye?” Mfilisti yeu kadenga Davidi na irina lya maruva akwe. 44Goliati kavia Davidi, “Osho shisora, nyama yafo inu mmbo ilyiwaa nndeye-ta nginiiu na mafisi a ngoroshony.” 45Davidi nawe kavia Mfilisti yeto, “Yewe mmbo kwashisheya na usu na ifumu kya indi yeny mmbo nkeekusheyaa na irina lya Nndumi Iruva muni matorito akee Iruva wa Israeli yeto kulemwaarara. 46Inu Nndumi Iruva mmbo akeekuvika maakony akwa, shikukape neekurummbwa nrwe, neenu yeni shiniinge ndeye na mafisi a uruka minying'a ya Vafilisti yewo vafo, llyon ulana loose lushemanyaa sheelyi kwiifo Iruva va dede kunu Israeli. 47Na vandu woose va ulana llyo vashemanyaa sheelyi Iruva nnyakira na usu na ifumu-fo, mashika we ni Nndumi Iruva wa fira namuvike yeni maakony eru.” 48Nalyo llya Mfilisti yeu alekwiipoo kasembeya nasore Davidi, llyo na Davidi nawe aleangusya isora Vafilisti naambo nakooye Goliati. 49Davidi koota songoro mbolokony, kaivika ukoveny kalyeera, kakapa nalyo Mfilisti ulya yoo kisanguny, lyikaanga nawe kawa si na kisangu.; 50Niindo Davidi alevinga Mfilisti ulya na iwe lyeero na ukova, kankapa kammbwaa. Nta Davidi nnyerie usu wokony lwakwe-fo. 51Davidi karisha kandesaama yoo uwe ya Mfilisti yeto, kasomwa usu, kammarisya kookafo kanrumbwa nrwe. Vafilisti veekilollya mwaafinya waawo antuulwa vakarisha. 52Nawo vandu va Israeli na Yuda veekilollya indo vakakapa ukoru, vakavingya Vafilisti yewo fika muriny wa Gati na fika ngiriny ya Ekron. Na Vafilisti valya valekapwa vakawa efo shieny ya Shaarimu, na Gati na Ekron. 53Vana va Israeli vakawuya wooka yuumbuta Vafilisti, vakashetira findo na uraa. 54Davidi kaipoo nrwe wa Mfilisti yeto fika Yerusalemu lyo fisha fyakwe kafirwaa kyeny.

Davidi eendwa kwa Sauli

55Naasa llya Sauli alelollya Davidi eshendaa ilatya Goliati kavia nniini wa itorito we Abineeri, “Ale Abineeri, mwana yeu Davidi ni wa vi?” Abineeri kammbia, “Nshimanyaa-fo, woi mangyi.” 56Mangyi kammbia, “Enda vesany kumanyi mmbwa vi.” 57Nawe Davidi llya alewuya ooka iwaa Mfilisti ulya, Abineeri kammbwarya, kanrwaa kwa Sauli, nawe eerye nrwe wa Mfilisti ulya efo wokony. 58Naasa Sauli kammbesa, “Ale mwana, kukee wa vi-ro?” Nawe Davidi kammbia, “Yeny mmbo shikee mwana wa nsero wafo Yese, nndu wa Betlehemu.”

Currently Selected:

1 SAMUELI 17: MAS2

Highlight

Compare

Copy