1 SAMUELI 16
16
Shaasa Davidi alevikwa Mangyi
1Nawe Nndumi Iruva kavia Samweli, “A mmbo kuiyaa kya Sauli indo kufike kwi kwakooya ni yeny shilellema nalakive mangyi ya Israeli?” Naasa, ishurany wombe lwafo mafura kundefika kulya kwa Yese nndu wa Betlehemu kimmba shammbonisa mangyi efo vaneny vakwe. 2Samweli kaamba, “A mmbo nshendaa inda, mashika Sauli kamanya mmbo ashiwaa.” Nawe Nndumi Iruva kammbia, “Ipoo ngashe ya ng'umbe kwaambe,” Mmbo shasheutya Nndumi Iruva kiraso. 3Endevaanga Yese nashe yoo kwayuutya firaso neeny nshekooraa kyeetana, “neeto nshensendaa mmbwe kumwambe mafura.” 4Nawe Samweli katana kilya Nndumi Iruva alemmbavasya, keenda Betlehemu. Nawo vamiku va muri ulya vakashemwaambya veereremaa, vakammbesa, “A ndesa mmbo kwasha kya mafoo?” 5Nawe kavavia, “Yee, n'kya mafoo.” Kwiilyisen-te, yeny mmbo shasheutya Nndumi Iruva kiraso. Sangeny neeny luute firaso. Samweli kailyisa Yese na vana vakwe llyo vakashany yuuta firaso. 6Naasa llya valesha Samweli kalola mwana ulya wa Yese we Eliabu, kakusara efo nriminy, “Ni dede yeu mmbwe nsauwe wa Nndumi Iruva.” 7Kyeendi Nndumi Iruva kavia Samweli, “Kulalole fwana yakwe nta waasha lwakwe-fo, mashika nshiwe shinkundye-fo.” Mashika Nndumi Iruva nnyalolaa sha nndu wa vandu-fo. Mashika vandu mmbo valolaa fwana ya nndu, lyo Nndumi Iruva we kalola nrima. 8Nalyo Yese kavaanga Abinadabu kamwiita alya Samweli akai. Nawe kaamba, “Nta yeu Nndumi Iruva nnyalensauwa-fo.” 9Yese keetau Shama. Samweli kaamba, “Nta yeu Nndumi Iruva nnyalensauwa-fo.” 10Niindo Yese aleetau vana vakwe mfungare, na Samweli kaveamba, “Nndumi Iruva nnyalesauwa nta umwi wa yeva yaa-fo.”
11Naasa llyo Samweli alevesa Yese, “A vana vafo woose vaiyo yaa?” Nawe kammbia, “Eefo n-du wa yeva, nawe mmbo akeiisa moonri.” Samweli kavia Yese, “Nkyeruma nndu nandeendwa mashika kulore asha llukaa rembo-fo.” 12Nawe karuma nndu, mwana ulya kandeendwa. Nawe mmbo adodorye katira miso asenyi na yuumba lyakwe lyikasenya. Nawe Nndumi Iruva kavia Samweli, “Naasa, kwiipoo kumwambe mafura, mashika yeu mmbwe.” 13Samweli kaipoo wombe lwa mafura, kamwaamba mafura alya mbee ya vana vamaye. Na mumuyo wa Nndumi Iruva ukasheya Davidi na finya nnu uka nkonu ulya. Eekimaa ekyo Samweli kakuwuiyany na kulya Rama.
Davidi akee Kulya kwa Mangyi Sauli
14Nato mumuyo wa Nndumi Iruva ukara Sauli, Nndumi Iruva kanrikya mumuyo nkasha, ukansaveesa. 15Nalyo mashinga a Sauli kammbia, “Kulollye, Iruva mmbo akurikya mumuyo yeu nkasha naambo ukusaveese. 16Kyasiany Nndumi Iruva weeru nalurumi yese lukee yaa lunderuuya nndu akee nndango weekapa kinanda kya ura, na kyeeri mumuyo yeto nkasha wauka kwa Iruva ushekusheyaa, we kakapa kinanda ekyo llyo yewe kusheelelisywoo.” 17Naasa Sauli kavavia, “Nkisha, endeshiruuiyeny nndu nndango weekapa kinanda ekyo muusheengye.” 18Nalyo umwi wa mashinga akwe karouwa kaamba, “Mmbo shilelollya mwana umwi wa Yese wa Betlehemu akee nndango weekapa kinanda kya ura, kaveva nndu nsha akundyo ni Nndumi Iruva nawe mmbo akee nndu nkaari wa fira, areraa marero a urango.” 19Naasa llyo Sauli karikya Yese varumi vakwe, kammbia, “Shirumya mwana wafo Davidi, yeto eshiisa moonri.” 20Yese kepoo mishungu weiipoo mikate, na mboloko ya mfinyo, na ngurana yeeshisha, kafirika Davidi nanderwaaya mangyi Sauli fya pya. 21Nawe Davidi kandefitwa alya Sauli akai, kallola kankunda deny. Kammbika nave mwiiboo fisha filya fyakwe. 22Naasa Sauli karuma nrumi kwa Yese kammbia, “Mmbo shakutereva Davidi nakae neeny, mashika shammukunda.” 23Naasa kyeeri mumuyo ulya nkasha ulerumwa ni Iruva alesheya Sauli, Davidi kawarya kinanda kyakwe kya ura, kakikapa, na Sauli kaelelisyo, nato mumuyo eto nkasha ukanra.
Currently Selected:
1 SAMUELI 16: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
