1 SAMUELI 15

Fira na Vaameleki

1Numa ya vayo Samweli kavia Sauli, “Nndumi Iruva mmbo aleshiruma shikwaambe mafura kuve mangyi ya vandu vakwe va Israeli.” Kyasia ulaalu aranyany unyanga lwa Nndumi Iruva. 2Nndumi Iruva muni matorito mmbo aamba indi, Mmbo shivikye findo fyoose nrimin shaasa Vaameleki valetannya vandu vakwa va Israeli, shaasa valekukikisa shia valeere, llya vekesaama wooka Misri. 3Naasa ulaalu kwiipony kundekapa vaameleki kulyamare findo fyoose deny, efyo fyawo, muvawaa, nta mulavare-fo, womi na vaka fika na kimwana kishoongaa, ng'umbe, maanri, ngamula na mishungu. 4Naasa Sauli kavaanga vandu kulya Telemu kaveekena mmbo vasikari vafrasi mayana avii, na vandu va Yuda fiku ikumi. 5Nalyo Sauli kandefikya muri wa Vaameleki, vandu vakandeovya imungony. 6Sauli kavia Vakeni, “Yeni ukeny-fo mukurauwe na Vaameleki yewo, shilasheemumamita ando amwi nawo, mashika yeni muletannya Israeli mesha llya valesaama wooka Misri.” Nalyo Vakeni vakakurauwa na Vaameleki. 7Sauli kakapa Vaameleki uka Haufa fika Shuri kufii na Misri. 8Katira na Agagi we mangyi ya Vaameleki akee na muu, kamamita vandu woose noosu. 9Sauli na vandu vakwe vakasarya Agagi, na suva tilya shivanri na ng'umbe, findo fivanri fyoose vakafira nta valafilyamare. Lyo filya fifwafwa mfyo-da valefilyamara.

10Naasa llyo Irero lya Nndumi Iruva lyilesheya Samweli lyikammbia, 11“Mmbo kishisukye elyi shilesauwa Sauli nave mangyi ya Israeli mashika elyi alakivandami neeny, nta nalalatyaa shaasa shilemmbavasya.” Samweli eeta indo kafulukywo, katereva Nndumi Iruva kio kyoose. 12Samweli kakwiipoo elyi lya ndesi nanderera na Sauli. Samweli kavio sheelyi Sauli mmbo aleenda kulya Karmeli, kandesaleesa-fo iwe lyeekumbura, naasa kandesoka na Gilgali. 13Samweli kandesora Sauli, nawe Sauli kavia Samweli, “Nndumi Iruva nakuvikye mbora, shamminutya ivavaso lya Nndumi Iruva.” 14Samweli kammbia, “A kyoorongye yekyo suva na ng'umbe tishaanaa nkyeeki ekyo shikiitye?” 15Sauli kammbia, “Vandu mmbo valefyuuta kwa Vaameleki naambo vashefyuutya Nndumi Iruva firaso, nto ng'umbe shisha na suva shisha, neefyo fingi fyo lukafimamita deny,” 16Samweli kavia Sauli, “Raany shikuvie kindo Nndumi Iruva aleshivia kio eki.” Nawe kammbia, “Nkyeamba.” 17Samweli llyo alemmbia, “A llya kweelollye-da shaasa kwekee n-du wa vana va mau, lyo kwavikwa nniini wa vandu va Israeli woose.” 18Nawe Nndumi Iruva kakuruma kakuvia, “Endamamita Vaameleki yewo va kiila deny, kuvakape vamamike deny,” 19“A nkiki elyi kulore kuleiranya unyanga lwa Nndumi Iruva, lyo yewe kwalanga-fo findo fivanri, kwalyamarya Nndumi Iruva?” 20Sauli kavia Samweli, “Mmbo shilelatya ivavaso lya Nndumi Iruva deny, shatira mangyi Agagi shamweende, lyo wo Vaameleki shavamamita deny.” 21Na vandu veru vakasauwa-fo findo fivanri, mburu na ng'umbe, naambo fisheniingyo Nndumi Iruva waawo kulya Gilgali.

22Nalyo Samweli kaamba,

A Nndumi Iruva mmbo asennyo mfiraso fyeekora na muro

ngota yaaranya unyanga lwakwe?

Lola, iindya Nndumi ntorya ngota firaso

Na yaaranya ngota mafura a ndafu.

23Ilema yiita nkimwi sha ulyamari lwa usavi

na itira ngoo shuumu nkimwi na itira maruva a wongo

Kimmba kwallema irero lya Nndumi Iruva

“Nawe ekato ankulema kulakivese mangyi.”

24Llyo Sauli alevia Samweli, “Mmbo shilelyamara elyi shilefuluta ivavaso lya Nndumi Iruva, na marero yoo afo nang'u, mashika lyo yeny mmbo shilesora ekyo kya vandu yewo.” 25Nkyo ulaalu mmbo shakutereva kushifwaaye kya ulyamari lwakwa. “Shiwarya lyingi kushiviire kwa Nndumi Iruva.” 26Samweli kammbia, “Nshishiidimaa ikuwarya-fo, mashika mmbo kulemina irero lya Nndumi Iruva, nawe Nndumi Iruva kakulema yewe, kulakive mangyi ya Israeli.” 27Na kyeeri Samweli aleinduka, Sauli katira ikedu lya isara lyakwe nalyo lyikaranduka. 28Naasa Samweli kammbia, Inu Nndumi Iruva mmbo arandwa umangyi lwafo lwa Israeli indo, nawe kaluniingya vamrasa wafo akwiilanyi na mesha. 29Nawe yeto akee finya ya Israeli nnyashaambaa wongo fo, nta nnyawuyaa numa-fo, mashika we nshi sha nndu wa vandu-fo kwaambe ashaalashikaafo. 30Sauli kaamba, “Shallyamara deny, lyo shakutereva kushoore wiindi mbee ya vamiku va vandu yeva vakwa na mbee ya Israeli.” Kusange neeny, naambo shiindye Nndumi Iruva wafo. 31Naasa Samweli kairikya isanga nawe, Sauli kaindya Nndumi Iruva.

32Naasa Samweli kaamba, sheengyeny Agagi na yaa. Naasa Agagi mangyi ya Vaameleki keenda nang'u ekee nkaari nriminy, Agagi kaamba, “Unyaasi lwa ufu lwammuutwa eefwa.” 33Lyo Samweli kammbia, kilya kulekitana vaka vakafiiyo mmbana vawo, niindo-da inu na mau ashefiyyoo sha vaka vengi. Naasa Samweli kanrumbwa fyenga yoo mbee ya Nndumi Iruva kulya Gilgali.

34Numa ya vayo Samweli keenda kulya Rama. Nawe Sauli karwa na kyeny kwakwe kulya Gibea ya Sauli. 35Nta Samweli nnyalekikwaananya na Sauli-fo fika ifwa lyakwe. Lyo Samweli kaiya kimaruma kya Sauli. Nndumi Iruva kalollya nkiki elyo alevika Sauli nave mangyi

Currently Selected:

1 SAMUELI 15: MAS2

Highlight

Compare

Copy