1 SAMUELI 14

Ukaari lwa Yonatan

1Naasa nkonu umwi Yonatan mwana wa Sauli kavia nsoro yeto mwimwipoiyo fisha fyakwe, “Kye nnde lusore Vafilisti kulya ulaleny lwawo. Lyo nnyelevia nta ndeeye-fo.” 2Nawe Sauli mmbo akee taari ilya ya kavii ya muri ulya wa Geba, kava mwikaa yoo si ya nri keemuyau, eeringwaa ni vandu vakwe mayana arindaru. 3Nawe Ahiya mwana wa Ahitubu mwana maye wa Ikabodi akee mwana wa Finehasi wa Eli ulya nkohani wa Nndumi Iruva kulya Shilo. Nta yeva mmbalemanya kindo Yonatan akunde itana-fo. 4Neefo kwafo mianya mfo Yonatan eekundye yiira nandefikya turuve ilya ya Vafilisti. Nang'u mmbo kweiyo mawe avii maniini taari yei na taari yei. Lyimwi mmbo lyevangwaa Bosesi neelyo lyingi ni Sene. 5Elyo lyimwi mmbo lyekee taari ya Mikmashi mfo taari ya ndoo, neelyo lyingi lyikakaa Geba mfo taari ya sinde. 6Naasa Yonatan kavia nsoro ulya mwiimwipoiyo fisha fyakwe, “Kye nnde lundesora masembo yoo alakee marini, nawe Nndumi Iruva ashelwekyaa-da, mashika nkwiifo kindo kishimaa Nndumi Iruva nalalwaauwe-fo, kinnywo ao kiniini.” 7Neeto mwimwiboiyo fisha kammbia, “Tana shaasa kulollye efo nriminy wafo. Neeny mmbo shikee neewe na nrima moose.” 8Naasa Yonatan kaamba, “Yese luruuke lusore vandu yewo valulollye.” 9Nawo kwakooya valuvia, “Luvereny yoo,” lwiirishe luvavereyeu. 10Lyo vakalluvia, “Oshony, saaminy na kunu, llyo luvasore, mashika indo llyo Nndumi Iruva ammbavika maakony eru.” Ekyo nkyo lulolaa.

11Naasa vakandekoora alya turuveny ya Vafilisti. Nawo Vafilisti vakaamba, “Ako! Ulaalu Vaebrania vafuma efo marininy kundo woovye!” 12Na vandu yewo va efo turuveny vakavia Yonatan na nsero ulya eeriani nawe, “Nkye saaminy na kunu lukai lumoore nri.” Yonatan nawe kavia nsoro eto wakwe, “Kye shisora, mashika ulaalu Nndumi Iruva mmbo ammbavika maakony a Israeli.” 13Nalyo Yonatan kasaama nafo eeshaafwaa, nawe nsero yeto wa fisha fyakwe kansora. Naasa llyo vandu yewo vakawa elyi Yonatan alesha kufii nawo, na nsoro yeto wakwe kavawaa umwi umwi. 14Vandu valewaawa ni Yonatan na nsoro yeto wakwe vakafika makumi avii. Alya valefiiya mmbo kweefye sha kyenga kya irema lyaremwa ni nndu umwi. 15Kulya ulaleny kukaitiwa kidina-si, neefo mareminy, Vafilisti woose vakarerema ando amwi na itorito lyawo, na uruka loose lukaiya.

Vafilisti Vavingwa

16Nawo varingi valya va Sauli kulya Geba vakaimaiya-fo, vakalollya vandu valya vatarakana vakanyanyaka.

17Naasa Sauli kavia vandu valya vekee nawe, “Ekeniny vandu veru mulole ni vi nalaiyo. Vekyeekyena vakakooya Yonatan na ulya mwiikurika fisha fyakwe nnyaiyo-fo.” 18Nalyo Sauli kavia Ahiya, “Ende isanduku lya mavavaso na yaa.” Kyeeri eki isanduku elyo lya mavavaso a Iruva mmbo lyeetirwa ni vana va Israeli. 19Kyeeri ekyo Sauli eefo areraa na nkohani indo, kyoorongye kilya kulya ulaleny lwa Vafilisti kikeenda kiing'anaa. Nawe Sauli kavia nkohani, “Ra mbele.” 20Naasa Sauli na vandu vakwe vakakuumbya ando amwi naambo vandekapana. Nawo Vavilisti mmbo vempooka ikapana wo veni na veni na ngyusu. Kukaafo kusu kusu niini nnu deny. 21Nawo Vaebrania valya vekee kwa Vafilisti uka elyo, valollya kive indo vakainduka vakakaa kyaalu kya Sauli na Yonatan. 22Na valya vengi valeeta kyoorongye vekee kulya mafumbuny a Efraimu, vakamanya Vafilisti vanrisha, nawo vakavingya indevakopa. 23Niindo Nndumi Iruva aleauwa Israeli nkonu yeto, fira ikakabana ikeera kwambee ya Bet-aveni.

Mmbony Tilewutika Numa ya Fira

24Nkonu yeto vandu va Israeli mmbo veatarika deny kimaruma kya shaa, mashika Sauli mmbo emmbalyisya mboo kulave nndu alya shoonga kaamba, “Kulore mmbo shataiya vakiduva vakwa, yeto alyaa shonga nave n-denge.” Nalyo kulakaefo nndu akarya ilya shoonga. 25Nawo llya valefika ando a ngorosho vakakooya-fo wuki. 26Nato wuki yeto mmbo wekeeshoshoka; lyo kulakae-fo nndu akarya iwukomba kimaruma kya yiiryaa mboo ilya. 27Lyo we Yonatan nnyemmiita kya ivavaso elyo ndeye aleniinga vandu na kya mboo ilya-fo. Nkyo we koorwa nsengye wakwe, kapaana nato wuki ulya elyi wiifo ushoshokaa, kawuya kaata woko lwakwe efo maraniny a wuki kalya wuki ulya, nalyo miso akwe akaambuka. 28Naasa kukava-fo nndu umwi ammbia, “Ndoo mmbo aleema vandu woose, kavalyisa na mboo, eshaambaa, Kulave nndu alya shoonga. Yeto alya mmbo adengwaa. Na vandu vakasya finya deny.” 29Nawe Yonatan kaamba, “Nde mmbo asaveesa vandu ruu,” Nkyelola shaasa shaambuka miso elyi shakomba wuki yelu kinnywo. 30A nkyeevaa kishase ndesa kukooye vandu yeva nawo valya neewuura inu veefuraa na findo efi vatira fireny, kive indo nkyekusare mmbo veewaa Vafilisti veenga? 31Nkonu ulya Vaisraeli vakakapa Vafilisti vawoota alya Mikmaishi fika Ayaloni. Lyo mmbo vemmisya finya deny kimaruma kya shaa. 32Nalyo vandu vakarangya findo filya valetira fireny, mburu na ng'umbe vakatishishya alya, vakalya nyama ando amwi na samu. 33Nalyo vengi vakavia Sauli, “Vandu yeva mmbo valyamarya Nndumi Iruva elyi valya nyama ando amwi na samu ya vayo.” Nawe kavavia, “Yeni mangaaro a vandu, nkye shisemberyeny iwe iniini na yaa.” 34Sauli kawuya kaamba, “Kyasia ulaalu endeny efo vandu mundevavia wo nndu nasheengye ng'umbe yakwe, na suva yakwe, mushishye yaa mulyiiye-u, naambo mulasheelyamarya Nndumi Iruva se, elyi mulelya nyama na samu.” Nawo vakeende ng'umbe kio kilya, vakatishishya. 35Nawe Sauli katannya Nndumi Iruva kitara kyeerasya, nakyo nkyo kitara kya mbee Sauli aletannya Nndumi Iruva.

36Nalyo Sauli kavia Vaisraeli, “Kye nndeny luvingye Vafilisti kyeeri kya kio, fika nraasi lukooye lwambatira mifungwa lulasheekeya nta umwi waawo naturushuke-u.” Nawo vakaamba, “Kevetana shaasa kyakusenya kumuni.” Nawe nkohani kaamba, “Luvese mbele Iruva-te.” 37Nawe Sauli kavesa Nndumi Iruva, “A ndesa kwakunda lusore Vafilisti? A ndesa kushevavikaa maakony a Israeli?” Lyo Nndumi Iruva nalandouwe nta kindo nkonu ulya. 38Naasa llyo Sauli alevia vandu, “Oshon na yaa moose yeni vasonguru va vandu mumanyi shaasa ulyamari elu lwa inu kikai. 39Naambo mumanyi mmbo shamuvia na irina lya Nndumi Iruva yeu mwiiwouwa Israeli, kwakoya ulyamari elu n'kwa mwanaakwa Yonatan lukai, naakwa niwe mmbo kinkooye nafwe.” Lyo kulaonike-u nta nndu anndouwa. 40Naasa kavia Israeli woose, “Yeni kaeny taari yaany, na yeny na Yonatan taari ingi.” Nawo vakavia Sauli, “Tana ekyo kyakusenya.” 41Naasa Sauli kavia Nndumi Iruva, we Iruva wa Israeli, A nkiki elyi kulaore kwarouwa nsero wafo? Kwakooya ulyamari elu llwakwa ao llwa mwana wakwa Yonatan nkyelooreny na kura ya Urimu woi Nndumi Iruva, na kwakooya ni ya Israeli kuloore na kura ya Tumimu? Kura yiikikabwa ikoora ni Yonatan na Sauli, vandu vakaashuka. 42Sauli kaamba, “Ulaalu kapa lyingi yakwa na mwanaakwa Yonatan. Neeto Nndumi Iruva ashelooraa, ifwa nafwe.” Naasa vandu vakavia Sauli, “Indo nkivaafo.” Lyo Sauli kavaitikya, na kura ikakapwa yakwe na Yonatan, nayo ikoora ulyamari llwa Yonatan. 43Naasa Sauli kavia Yonatan, “Shivia ekyo kuletana.” Naasa Yonatan kavia Sauli, “Ni dede yeny shilelya wuki shilepaana na nsengye ulya sheerye, nakyo ulaalu kishikooye shifwe kimaruma kya vayo.” 44Nawe Sauli kaamba, “Na irina lya Iruva nkuti kufwe mwanakwa Yonatan.” 45Nalyo vandu valya vakavia Sauli, “A mmbo kivaa inda Yonatan nafwe, nndu aleende uvingi uniini indo kunu Israeli? Oode, na Irina lya Nndumi Iruva lulareke nta ufiilumwi lwa nrewe wakwe-fo, mashika we mmbo arunda ekee na Nndumi Iruva inu.” Niindo vandu yewo vakaauwa Yonatan iwaawa. 46Naasany, llyo Sauli alera isora Vafilisti, nawo vakeenda urukeny lwawo.

47Naasa Sauli eekiva mangyi ya Israeli, kakapana na vakiduva vakwe va taari toose apookya Moabu, Amon na Edomu na vamangyi va Soba, na Vafilisti, woose kavavinga. 48Kava nkaari kavekapa na Vaameleki, kaauwa Israeli maakony awo yewo venkamarwa mfungwa.

49Nawo vana va Sauli ni Yonatan, Ishvi, Malkishua. Na marina a vefu vakwe ni Merabu na wa kavii ni Mikali. 50Na nka wa Sauli ni Ahinoamu mfu wa Ahimaasi. Na irina lya mwisalallya itorito vakwe ni Abineri mwana wa Neri, nawe ni mwanawo wa ndeye. 51Nawe Kishi ni ndeye wa Sauli, na Neri we ndeye wa Abineeri vakava ni vana va Abieli.

52Kyeeri kyoose kya Sauli mmbo kweefo fira shiingi teekapa Vafilisti. Nawe Sauli kasanyirya vandu woose yewo vekee varango vakava vakaari naambo vakae nawe.

Currently Selected:

1 SAMUELI 14: MAS2

Highlight

Compare

Copy