1 SAMUELI 13

Fira na Vafilisti

1Naasa Sauli kapooka ishillya kulya Israeli kashillya-fo myaaka deny, 2Nawe kasauwa itorito fiku firaru, yewo fiku fivii vakakaa nawe kulya Mikunashi na ifumbuu lya Beteli, na kiku kimwi vakakaa na Yonatan kulya Geba ya Benyaminy, na vandu valya valesaany kavasama vawuye na kyeny. 3Yonatan kandekapa turuve yeyo ya Vafilisti kulya Gibea, Vafilisti vakamanya. Nawe Sauli kakapa iranda kulya urukeny koose, eshaambaa, Vaebrania angusyeny. 4Vaisraeli vakeeta kyaambawa sheelyi Sauli ankapa turuve yeyo ya Vafilisti, na Vaisraeli vakeerese Vafilisti. Naasa vandu vakakusanyirya vandeiduva Sauli.

5Vafilisti nawo vakakusanyirya naambo vandekapana na Vaisraeli, veerye mitika fiku makumi araru na nkuka wa vandu ufye sha nsanga, vakarwa vakandemannya ulale kulya Mikunashi, taari ya Bet-aveni. 6Vaisreli vekilollya kyawo nkyuumu, mashika vandu mmbo valeiryaa nnu, vandu vakoovya efo mbangeny na mindesheny, na ngoroshony neefo maweny na marininy. 7Vaebrania vengi vakaruuka Yordan, vakaanga urukeny lwa Gadi na Gileadi, lyo we Sauli kasaa kulya Gilgali, nawo woose vakamwiiduva-fo veereremaa.

8Sauli kavera ando a mikonu mfungare kutani Samweli ammbyaa, lyo Samweli nalansore kulya Gilgali, wo vandu yewo vakakaa kwaasha. 9Naasa Sauli kaamba, “Shyeengyen firaso fyeekora na muro na firaso fya ufoo.” 10Llya alemaa yuuta firaso filya, na Samweli kasha. Sauli kandemwaambya nemwiidikira. 11Samweli kavia Sauli, “A nkyokieki kwatana?” Na Sauli kammbia, “Mmbo shalollya vandu veenyanyakaa, neewe nkwensha-fo kyeeri kilya kisumani-fo, na Vafilisti mmbo vemmaa ikusanyirya kulya Mikunashi,” 12naasa shakusara, Vafilisti mmbo vakeeshisora vafike Gilgali kulore shambonisa mwaanya wa itereva Nndumi Iruva, nkyo kimaruma shakukaarisa yuuta kiraso kyeekora na muro. 13Naasa Samweli kavia Sauli, “Mmbo kwatana nnya urung'ani deny, nkwalatya ivavaso lya Nndumi Iruva, Iruva wafo-fo, mashika Nndumi Iruva mmbo adeesye ivangisa umangyi lwafo kunu Israeli.” 14Lyo ulaalu umangyi lwafo llukitiraa finya-fo, nawe Nndumi Iruva mmbo annduya nndu ungi yeto ashesennyaa nrima wakwe. Nawe ammuvavasya nasalallye vandu vakwe, kimmba yewe kwanra kulalatya irero lya Nndumi Iruva.

15Naasa Samweli kasaama ooka kulya Gilgali kandefika Gibea muri wa Benyaminy. Kyeeri Sauli aleekena vandu vaiyo kakooyau mayana arindaru. 16Nawe Sauli na mwana-akwe Yonatan na vandu valya veeriani nawo vakakaa kulya Geba wa Benyaminy. Lyo wo Vafilisti vakakuumbya kulya Mikmashi. 17Na vandu veerakkwa findo vakooka kulya kwa Vafilisti veekee maronda araru ironda lyimwi lyikavaasora shia ya Bet-horoni na vengi vakasora imungo lya Seboimu, taari ya kasa. 18Itorito lyingyi lyikalla Beth-honony na itorito lyingyi lyikalla nnyanuny woolokye imungony lya Seboimu kulella kasa koomu.

19Kyasia kulya Israeli nkweifo nndu mfuru nta umwi-fo. Nawo Vafilisti vakalollya Vaebrania yeva mmbo vashemanyaa isongosia ngyupanga na mafumu. 20Vaisraeli woose mmbo veeishivye isoka na kulya urukeny lwa Vafilisti indenuyafo makumbi awo na mindo, na fyaara fyawo, na shummbwa tawo. 21Lyo kindo veetiri n'tupa ta yaarya-da. 22Nkyoony, nkonu yeto wa fira wiikifika nkweifo nta nndu umwi wa Vaisraeli etiri usu nta ifumu-fo, kuuta Sauli muni na mwana wakwe Yonatan. 23Vafilisti vakakupoo vanderinga nko ulya wa yaanga muriny wa Mikmashi.

Currently Selected:

1 SAMUELI 13: MAS2

Highlight

Compare

Copy