1 SAMUELI 12
12
Samweli Arera na Vandu
1Nalyo Samweli kavia Vaisraeli, “Mulollye, yeny mmbo shileiranya unyanga lwany shamuvikya mangyi.” 2Naasa ulaalu mmbo mukee na mangyi, neeny shammikwa. Na vana vakwa ekawo vakee neeni, neeny mmbo shilemusalallya uka elyo shikee n-du. 3Nkyekureekeny ulaalu mbee ya Nndumi Iruva na mbee ya nsauwe yeu wakwe kwakooya shilemmaafinya nndu shansoka ng'umbe yakwe ao nshungu? Ao kwakooya shilembwarya kindo kyeeniingwa naambo sheevete usumanu lwa nndu, mmbo sheekiviiraa inu. 4Nawo vakaamba, “Nkulelwaafinyi nta ilufotafo, nta nkulewarye kindo kya nndu-fo. 5Kookafo kavavia, Nndumi Iruva ni nkureeki, na maangi-da, sheelyi nshitiri kindo kya undu-fo.” Nawo vakaamba, “Yee mmbo akee nkureeki.” 6Samweli kawuya kavavia, “Ni Nndumi Iruva alevaanga Mose na Aron, na mmbwe-da aleuta vande valya vany kulya Misri.” 7Ulaalu uranyiny shimuvie kya mashora maniini Nndumi Iruva alemutannya yeni na vande valya vany.
8Kyeeri Yakobo ekee kulya Misri na vande valya vany, llyo valefuuya Nndumi Iruva nawe karuma Mose na Aron, vakandewoota-fo, vakashevafita yaa. 9Lyo vakarekyo Nndumi Iruva waawo, nawe kavavika maakony a Sisera ulya ekee nteteri wa itorito lya Hazori, kavevavika maakony a Vafilisti na maakony a mangyi ya Moabu vakakapana na Israeli. 10Lyo wo vakafuuya Nndumi Iruva vakammbia, “Mmbo lulelyamara nnu elyi lulera Nndumi Iruva lukarundya maruva a wongo Lyo ulaalu lwakutereva kulukire maakony a vakiduva veru, lukurundye yewe.” 11Nndumi Iruva karuma Yerubaali na Baraka, na Yefta na Samweli, vakashemuuta efo maakony a vakiduva vany, mukakukaya noofoo. 12Na kyeeri mulelollya Nashashi ulya mangyi ya Vaamon llya aleshekapana neeni mukashivia, “Kukooye mmbo lweetiri mangyi kyeevaa, ra llya Nndumi Iruva eemushillye yeni.” 13Kyasiany ulaalu, irikyeny mangyi yeu mulenkunda mukansauwa muveni, nawe Nndumi Iruva kamuvikya. 14Kwakooya mwaaranya unyanga lwa Nndumi Iruva neetana ekyo akundye mwaaranyi na mangyi yeu alemuvikya mwiireiye Nndumi Iruva, Iruva waany, llyo kishevaa mbusha kwany, 15Lyo mukallema Unyanga lwakwe na yiimmbwa mavavaso akwe, llyo woko lwa Nndumi Iruva lushemukapaa indo shaasa lulekapa vande valya vany.
16Ulaalu lolen-te mulollye mashora maniini Nndumi Iruva ashemutannyaa. 17Ulaalu kwiifo fimu fya nganu se? Mmbo shiterevaa Nndumi Iruva neende mmbwa na maruruma llyo mushemanyaa shaasa uravi lwany lufye elo muletanya Nndumi Iruva llya muleruuya mangyi. 18Naasa Samweli katereva Nndumi Iruva nawe kavika mmbwa na maruruma na vandu woose vakairyaa nnu Nndumi Iruva vakasanga na Samweli. 19Vandu woose vakaamba, “Lwakutereva kuluterevye yese mashinga afo, naambo lulafwe, mashika lyo mmbo luleengera uravi lweru elyi lulekukunndya mangyi.” 20Samweli kavavia, “Kyasia ulaalu mulakiiryee-fo, lyo dede muletana kikasha, lyo mulakire isora Nndumi Iruva-fo, nndundyeny na nrima moose.” 21Mulasore findo fya tangalu, 22filasheekyaa nta ikira, nta filavaa. Nawe Nndumi Iruva nnyasheraa vandu vakwe-fo, mashika mmbwe muni alemusauwa muve vakwe. 23Lyo yeny mmbo shikeekuringa shilasheera imuterevya kive ulyamari kwakwa. Nkuti shimoore shia isumani shiimuloshaa. 24Indyeny Nndumi Iruva muvendundya na nrima moose, mwiikumbwaa shaasa alemutannya findo finiini. 25Lyo kwakooya mweengera ilyamara nkuti murumake yeni na mangyi yaany-da.
Currently Selected:
1 SAMUELI 12: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
