1 PETRO 2
2
Iwe lyitiri na Isanga Yeele
1Naasany, rweeny kwaasha uravi loose na ntambo moose, na ukunang'ari na ukasha na ivikyana ureeree loose. 2Mukee sha vakoku vaonika ulaalu indi, langeny urango luvakye malela alakee malonge-longe, naambo mwiidimi itumaa efo ukirony. 3Kimmba mwammaa ishosha ulyilyi lwa Nndumi. 4Endeny kwa yeto akee iwe lyitiri muu, yelyo vandu valelyilema, kyaindi kwa Iruva mmbo lyikee isauwe, lyikavetira nnduma. 5Neeni mukee sha mawe atiri muu, mmbo mukee vatani muve mmba ya Mumuyo, ukohani weele mukooye yuuta firaso fya mirima, efyo fishiirikywa ni Iruva, kwi Yesu Kristo. 6Mashika mmbo kyikee kyireiye efo mareiyony indi,
Lola-te yoo Sion mmbo shavika-u iwe iniini lya ndumba,
lyikee isauwe lyitiri nnduma
na yeto mumwiirikya nnyashefiyaa sony-fo.
7Naasany nnduma yeu ni wany yeni mukusirye-u. Kyaindi kwa yewo valakusirye-u,
Iwe elyo veetana mmba valelyilema,
mmbo lyilealuwa iwe iniini lya ndumba.
8Na lyingyi-se, lyikava iwe lyekapa urende, na lyitulaa. Mashika irero elyo mmbo lyileva nsindara kwawo, valalyiirikye, nawo mmbo vekee vadeesye efyo. 9Kyaindi yeni mmbo mukee ufyari usauwe, lukee ukohani lwa kimangyi, ufyari lwa vandu veele, vandu va ushilyi lwa Iruva, naambo mwiidimi ivambisa isarya lyakwe yeto alemuvaanga naambo muuke ireeminy na yaanga seny yakwe iilanyi; 10yeni kulaore mbee mwekee ufyari elyo, kyaindi ulaalu ni ufyari lwa Iruva, mwekee vandu valaishi isarya lya Iruva, kyaindi ulaalu mmbo mwammaa iwarya isarya.
Varundi va Iruva
11Vakunde vakwa, mmbo shamwiikima mwikee sha vandu va kyaaro valaiyo kyaasha, kwiiseny na lango ta mwiili yeto tikapanaa na mumuyo. 12Kaeny na ngaa shisha efo kwa vandu va masanga, naambo kwakooya vamweekerya fya wongo sheelyi mukee veetana makasha, elyi valolaa mikaaye yaany misha, vang'anise Iruva elyi nkonu ufikaa.
13Indyeny wo ivavasyo mwaniingwa, mwishiryaa Iruva, kwakooya mmbo kyauka kwa mangyi, yee mmbo atiri ushilyi uniini. 14Kwakooya ni vaniini, yee, mmbo varumwa mbwe naambo vaorote yewo veetana makasha na irumisha yewo veetana mesha. 15Mashika ni indo Iruva akunndye, naambo kyeendwa ni itana mesha mufindikire kana kya vandu yewo varung'ani; 16muve sha vandu valeke, lyo mure mularunda na uleke lwany kyikee kya isikya makasha, kyaindi mukae sha vana va Iruva.
17Indyeny vandu woose. Kundeny Vakristo vengyi. Ishikeny Iruva. Niingyeny mangyi wiindi.
Ngata ya Makiva a Kristo
18Yeni varundi, indyeny vanndumi vany na usau nnu, nta nshi yewo vakee vesha na vafoo-da-fo, naakwa ni yewo vanyaasi. 19Mashika usha lwa dede ni elyi nndu asisirya eireiye Iruva kyeeri akeelyiswa ukiva kilakee kya usumanu. 20Mashika ni usha-ki nndu ashewonisaa-u elyi asisirya ekapwaa ngyoi elyi atannyi ulyamari? Kyaindi isisirya mwikapwaa elyi mutannyi mesha, elu llo usha lwa dede mbee ya Iruva. 21Mashika ekyo nkyo mulevaangywa; mashika naakwa ni Kristo mmbo alelyiswa ukiva kimaruma kyany, kamoora shia ya ilatya, mukooye insora. 22We nnyaletana ulyamari-fo, nta kindo kya ntambo-fo. 23Kyeeri aleararwa nnyaleviira firumu-fo; llya alelyiswa ukiva nnyalekutatarye-fo, lyo mmbo alekurambikya kwa yeto mwirumbwa fya usumanu. 24We mmbo aleipoo ngyulyamari teru mwiiliny wakwe alya nsalabeny, naambo lukava vafu kya ulyamari, lukae na muu kya mbony ta usumanu, na llya alekapwa nkyo kilemukira. 25Mashika lyo mmbo mwekeereka sha mburu; kyaindi ulaalu mmbo mwambuiya Mwiisi waany na Mwiisalallya mirima yaany.
Currently Selected:
1 PETRO 2: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
