1 PETRO 3
3
Kya nndumi na nka
1Naasany na yeni vaka indyeny womi wany; naambo kwakooya veefo valairikye Irero lya Iruva, vaalashwa ni ngaa ta vaka vawo kulore nta vaita irero elyo, 2kyeeri valolaa ngaa yaany shisha itiri vyo. 3Utore lwany lulave utore lwa kipoo, sha yooka fii, na ikwaamba findo fisha na ikwaambika soori-fo; 4kyaindi luve unndu usha lwa efo nriminy lulalollywa ni miso lukee llo utore lulalyamarikaa, nto nrima wa urilalyi na umamiri lukee lwa wuuru uniini mbee ya Iruva. 5Mashika indo ni indo vaka valya veele va kasha valekutokopa vakaora usha lwawo kwa Iruva veshiindyaa womi vawo. 6Mukumbuye shaasa Sara aleindya Abrahamu katana ammbaanga nndumi. Na yeni nkiwo mukee sha vana vakwe, mutani mesha, nta nshi kimaruma kya iryaa ikapwa-fo. 7Neeni womi kiwo, kaeny na vaka vany na urango, muveniinga nka wiindi, mashika avakye kiiya kilatiri finya, kimmba nawo vakee veni ding'u ya isarya lya muu, naambo fiterewo fyany filafwe mmwasi.
Isisyo kimaruma kya itana mesha
8Na kirero kya ifurumya ni ekyi, veny na nrwe umwi, muve velyillyana, muvekundana sha vana va nka, veiyana mashoya mwiikunyiisye. 9Muveva vandu valataa ukasha na ukasha, ao ikapa mong'wa; lyo muve vevikya mbora. Mashika, efyo mfyo mulevaangywa naambo muwoni mbora ive ding'u yaany. 10Mashika,
yeto akundye muu wakwe,
nawoni suku shisha.
Naimi ulumi lwakwe irera makasha,
na kana kyakwe kalarere fya ntambo.
11Nare makasha natani mesha,
nalange urilalyi, na ilulalakya deny
12Mashika miso a Nndumi mmbo alola yewo va usumanu
na maarwi akwe akaaranya fiterewo fyawo.
Kyaindi kisangu kya Nndumi mmbo kyafummbya yewo
veetana makasha.
13A ni vi yeto ashemuvavisaa, mukankutakura itana mesha? 14Lyo kwakooya mwalyiswa ukiva kimaruma kya usumanu ngoma ni yaany. Mulaereye elyi vamweerese, nta mulaereve, lyo itikiseny Kristo Nndumi weeru efo miriminy yaany. 15Wo nkonu kudeesyeny irouwa wo nndu yeto ashemuvesaa mbony ta ivika nsia elyi lyany, lyo murouwe na urilalyi na wiindi. 16Neeni kaeny na nrima nsha ulatiri usakiro, naambo kwakooya mwavikywa ureeree, yewo vetendaa mweendo wany nsha efo kwa Kristo vakooye isutwa. 17Mashika mmbo kyikee ngoma ilyiswa ukiva kimaruma kya elyi lwatana mesha, kwakooya Iruva ankunda kive indo, ngota elyi lwelyiswaa ukiva lwiitanyi makasha. 18Mashika naakwa ni Kristo alelyiswa ukiva lyimwi kimaruma kya ngyulyamari, we kava muni usumanu ando a yewo valatiri usumanu, naambo nalurwaa kwa Iruva. Mwiili wakwe mmbo ulewaawa, lyo nrima wakwe ukakaa na muu, 19na nto aleengya nato yewo vekee vafinge, kavaongoya nrumi shisha, 20nawo vekee vandu vemina elyo mbee, kyeeri Iruva evavereye na usisiryo uniini, sha kyeeri kilya kya Noe, llya mmba ilya ya maboo yekee songosyo, nafo ni vandu vaangu valeanga-fo vandu nyanya nsi, vakakya iwaawa ni mura. 21Ubatiso mmbo luvakye findo efyo, mashika ubatiso mmbo lukeemukira yeni mikonuny yei, (nshi kya ira uravi lwa mwiili-da-fo, kyaindi kya nrima ulatiri usakiro mbee ya Iruva), kyeendwa ni iruka lya Yesu Kristo. 22Nawe akee rembo woko usha lwa Iruva kakweengya na iruveu, vasu na, itumbe na finya fikyimaa ivikwa si yakwe.
Currently Selected:
1 PETRO 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
