1 VAMANGYI 3
3
Solomon Atereva Urango Usha
(2 Fye 1:3-12)
1Solomon eruuya umbuya na Farao mangyi ya Misri, naambo naalyike mfu wakwe. Keende mfu wa Farao kammbika efo muriny wa Davidi, kutani amaa itana mmba yakwe muni, mmba ya Iruva-Muni finya, na isimamba lyikaringitya muri wa Yerusalemu. 2Efo kwa mbee vandu mmbo vekeyuutya Iruva firaso fyawo efo mafumbuu kulore mmba ya Iruva yamma itanwa. 3Solomon kakunda Iruva-Muni finya efo, ushilyiny lwakwe kavaka ndeye Davidi, kava mwiyuutya Iruva firaso fya ikora efo kitaren kya irasya. 4Kyeeri kimwi Solomon keenda indeutya kiraso kulya Gibeoni, mashika mfo kundo kwekee kusauwe kwa mwiindye. Kyekee miishivire ya Solomon ya iniingya firaso fiku fya indekora. 5Solomon ekee kulya Gibeoni; Iruva-Munifinya kansheya na yoorya elyi kio, kammbia, “Tereva kindo kukundye kyoose na yeny nshekuniinga.” 6Solomon kammbia, ndeye wakwa Davidi, ishinga lyafo, mmbo “kwemoora ikunda iniini kimaruma kya ikurundya mashora mesha, kava nndu nrilali na mwiitana fya dede. Na yewe kweengera-se inkunda kutani kwashemmbonisya mwana kashekaya kiri kyakwe kya ushilyi. 7Woi Iruva-Munifinya, Iruva wakwa, yeny ishinga lyafo mmbo kuleshiniinga umangyi ando a ndeye wakwa Davidi, naakwa nnyeli shikee mwana n-ndu, nta shileeshi ngata ya ishillya. 8Na yaandi kwashivika nnang'ani ya vandu vafo kuvasauye yewe kumuni, vandu veengyi valavaa nta imanyika yeekyena lyawo. 9Kweekyoo mmbo, Shakutereva kushiniinge yeny ishinga lyafo nrima wa urongo naambo shiidimi ileta vandu vafo, shiidimi imanya mesha na makasha, mashika mbwovi ashiidimaa ileta vandu vafo eva vafye indi?” 10Iruva Muni finya kasennyo ni kiterewo ekyi kya Solomon. 11Nawe kammbia “Kimmba kwatereva usumanu lwa ishillya, nta nkwatereva kya muu mwasha ao umasi nta nkwatereva urumato lwa vakiduva vafo, indi kwatereva ileta vandu na iwatannya dede 12nasaany, kiterewo kyafo kyamma yiirikyo. Shakuniinga urilalyi na urango kuleefo nndu ungyi alemmbonisa mbee yafo, nta nalakaa ashe numa yafo akuvakye yewe. 13Na lyingyi mmbo shikuniinga filya kulaa kwatereva; mmbo kuvaa isimba na yiindyo, kwiilanyi mangyi tingyi shoose kyeeri kya ushilyi lwafo. 14Na lyingyi kwallatya shia na mavavaso akwa ndesa ndeye-afo Davidi etana mmbo shikuniinga muu mwasha.” 15Nalyo Solomony kamaarukkya rony, lola ni yoorya. Llyo kaveesha na Yerusalemu, kasalala mbee ya isanduku lya kyaasa lya Nndumi Iruva, kaningya firaso fya ikora na muro, na firaso fya unapwe, kavika ifura na mashinga akwe moose.
Solomon aleta mwaandu muumuu
16Nkonu umwi vaka vavii va sshya vakeenda kwa mangyi Solomon. 17Umwi wawo kaamba “Nndumi wakwa, yeny na nka yeu ungyi mmbo lukaa mmba imwi, yeny shaona mwana na nka yeu eifo. 18Kwikyisya mikonu iraru nawe kaona mwana. Nkweefo nndu ungyi efo mmba eyo kuuta yeny nawe-fo. 19Naasa nkonu umwi kio kalaaya mwana wakwe kafwa. 20Naasa kakwiipo kio kya nnang'ani yeny shiirekye rony keepo mwana ulya wakwa kandemwaara kitareny kyakwe. Nawe kandeipoo mwana ulya wakwe afiyye kashemmbika yoo kitareny kyakwa. 21Ngama shikwiipo shikundye yoota mwana wakwa, shakooya mmbo afiyye. Shasoongya mmwasi, shalollya nshi mwana wakwa-fo.” 22Indi nka ulya ungyi kaamba, “Oode! Wakwa mmbwe yetoo eefo na muu, na wafo mmbwe yeto afiyye.” Nawe nka ulya wa mbee kaamba, “Oode! Mwana wafo mmbwe afiiye, wakwa ni yeu eefo na muu!” Naasa, vakaengera ivakyana indo mmbe ya mangyi. 23Naasa mangyi Solomon kaamba, “Wo umwi waany mmbo akeyaamba sheelyi mwana wakwe mmbwe eefo na muu na eto afiyye nshi wakwe-fo.” 24Llyo, mangyi aamba, “Sheengyeny upanga.” Vakamweengye upanga. 25Mangyi kaamba, “Pareny mwana yeu eefo na muu, nnang'ani kavii muniingye vaka eva wo umwi kiparwe kimwi.” 26Nka ulya ekee maye ya mwana ulya eefo na muu, kavavyo nriiminy kya mwana wakwe, kavia mangyi, “Shakutereva mangyi, mulawae mwana yeu-fo. Kuniingye nka eto mwana yeu eefo na muu nave vakwe.” Indi nka ulya ungyi kaamba, “Oonde! Mwana nalave wakwa nta wakwe-fo. Arumbuwa fyenga fivii.” 27Mangyi Solomon kaamba, “Kulawae mwana-fo! Niingya nka ulya mbe namwiipoo, mashika mmbwe maye.” 28Vandu woose va Israeli vekiita ndesa mangyi alerummbwa mwaandu, vakamwereya, vakamanya urilalyi na urango lluukye kwa Iruva mmbwe yeto alemwiidimisya ileta mwaandu eto.
Currently Selected:
1 VAMANGYI 3: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
