1 VAMANGYI 2

Davidi areeya Solomon fwaa

1Mangyi Davidi ekifikya kufii nafwe, kavaanga mwana wakwe Solomon kammbia, 2Mwanakwa, ndesa kikwaani fyuumbe fyoose ifwa mikonu yakwe yammisya. Salala shumu, kuve nndu nkaari. 3Indya mavavaso a Nndumi Iruva, Iruva wafo, kulatye shia takwe, kwiindye na ilatya mavavasoyoo akwe ndesa akee mareiye ni Mose, naambo kukooye ivesyo efo mashoreny afo, na wo kundo kushendaa, na lyingyi 4Nndumi Iruva ainutye kyaasa kyakwe aleamba sheelyi kwakooya vana vakwe veendya mavavaso akwe na indundya na nrima nsha, kyeeri kyoose nndu wa ishilya uruka mmbo ashokaa efo Israeli. 5Kilanya ya fyoose, kwiishi kindo Yoabu, aleshitannya mwana wa Semya; ngata alewaa vanniini valya va fira va Israeli vavii, Abineri mwana wa Neri;na Amasa mwana wa Yetheri. Mmbo alevawaa kyeeri kya Ufoo deny. Katana indo naambo nataiye kiduva kya vandu valya vemmbwaawa kulya fireny. Kawaa vandu valatiri ivara, kindo ekyi kikasheengye ukyiva na ngatara shiingyi. 6Laalu mmbo kurunda nawe kutani afwa, kya indi afwe nalatiri ufoo tara. 7Indi vana va Barisilai na Mgileadi kuvanle nisha, na ilya nawo ando amwi, mashika eva mmbo valeshilla nisha kyeeri kilya sherisha mwanamau Absalomo. 8Lyingyi eefo Shimei mwana wa Gera, Mbenyamini wa Bahurimu, nndu eshilyiiya mboo deny kyeeri sheenda kulya Mahanaimu; indi kyeeri esheshaambia alya mureny wa Yordan, mmbo shelliya mboo kwa irina lya Iruva-muni finya sheelyi, “nshikaa shimmbwaa na upanga-fo.” 9Indi ulaalu yewe, mmbo kumanya kumuni kindo kutana, kutani kwambwaa.

Ufu lwa Mangyi Davidi

10Davidi mmbo efwa karikwa kulya muriny wakwe. 11Eshilya Israeli ando a myaaka makumi aana, myaaka mfungare kulya Herbon na makumi araru na iraaru kashillya kulya Yerusalemu. 12Solomon mmbwe ewarya kitima kya ndeye Davidi kava mangyi atiri finya shiniini nnu.

Ufu lwa Adonia

13Naasa Adonia mwana wa Hagithi, keenda kwa Bathsheba maaye wa Solomon. Bethsheba kammbesa, “nna mafoo-ro?” Adonia kammbia ee nna mafoo. 14Indi mmbo shitiri mbony imwi-nsi shikundye ikuvia. “Bathsheba kammbia amba.” 15Adonia kammbia, “Kwiishi sheelyi yeny mmbo shekeeva mangyi; nakwa Israeli shoose mmbo yeshivereye shive mangyi. Indi mbony tikaalashika na mwana-ma kashilyimba finya, mashika ni indo kilesenya Iruva-muni finya. 16Ulaalu ni mbony imwi-nsi shitiri nayo shatereva kulashilemyi-fo.” 17Nawe kammbia, “shakutereva nnu, kusheekye itereva mangyi Solomon ashiniinge muumuu shiipoo Abishaki, ulya Mshami, nave nka wakwa mashika shiishi yewe nnyakulemmya-fo.” 18Bathsheba kammbia ni, “Kisha, shirera na mangyi andu afo.” 19Naasa, Bathsheba keenda kwa mangyi Solomon kandemmbia mbony ilya ya Adonia. Mangyi ekilolya maye, kandemwaambya. Naasa mangyi kandekaya kitima kyakwe kya umangyi; nawe maye kaengywa kyakwe kakaa rembo yoo taari ya wolo usha lwa mangyi. 20Bathsheba kaamba, “shitiri kiterewo kidu woi, shakutereva kulashilemmyi-fo” Mangyi kammbia, “Kwaambaye maye-akwa mashika nshikulemmya-fo.” 21Nawe kaamba, “Niinga mwanany Adonia muumu weipoo Abishaki eto Mshuami nave nka wakwe.” 22Mngyi Solomon kavesa maaye, “A nkyiki elyi kukundye shinninge Abishaki? Ekyi ni kimwi deny na inniingya umangyi lwakwa! Kummbwa we mmbe mwanamaye-akwa na kilanya ya fyoose Abiatari nkohani na nniini wa fira Yoabu mwana wa Seruya mmbo vakee kyaalu kyakwe!” 23Mangyi kaamba ni dede kya dede kwa irina lya Iruva muni finya, “Iruva nashiwaa kwakooya Adonia alafwaa kyeendwa ni kiterewo ekyo! 24Mangyi Solomon, kaamba kwa irina lya Iruva munifinya, Iruva eefo na muu, eto ashivikye kitiminy kya umangyi lwa ndeye-akwa Davidi na yiindya kyaasa kyakwe, kashiniinga finyayeny na vana vakwa, ni dede kya dede, inu ni kuti Adonia nafwe.” 25Llyo mangyi Solomon kavia Benaya mwana wa Yehoyada nakwipoo nandewaa Adonia.

Abiatari avikywa Ishinga na Yoabu kawaawa

26Mangyi Solomon kavia Abiatari nkohani “Kwipoo kweenda ireminy kwafo efo Anathoth; kukwaani ifwa! Indi nshikuwaa llaalu-fo, mashika mmbo kuleatarika nnu kya isanduku lya kyaasa lya Iruva munifinya kyeeri kwekee na ndeye-a-kwa Davidi, kwalyiswa ukiva ando amwi nawe.” 27Naasa mangyi Davidi kaanta Abiatari nalasheiva nkohani wa Iruva muni finy; na irero llya Iruva munifinya aleamba kulya Shilo kya Eli na Ufyari lwakwe lyikainukya. 28Yoabu ekiita indo karishya kulya ulaleny lwa Iruva kandetira ndumba ta kitara kya irasya; mashika mmbo ekulungye na Adonia ngota Absalomo. 29Mangyi Solomon ekiita sheelyi Yoabu nkulya ulale lwa Iruva akai asalalyi efo kitareny kya Irasya, karuma Beneya mwana wa Yehoyada, kammbia, “Enda kundenkapa.” 30Naasa Benaya keenda kulya ulale lwa Iruva, kavia Yoabu “Mangyi aamba somuka poo” Yoabu karouwa, “Yeny nshisomuka-fo; nnyaandi kweni shifiiya.” Beneya kawuya kwa mangyi kandemmbia kindo Yoabu alerouwa. 31Solomon kaamba, “Tana ndesa aamba;” kumbwaa na inndika. Naasa yeny na ngyeeri ya Davidi shoose, nlushekiveswa-se kya mirundye ya Yoabu llya alewaa vanduvalatiri ivara-fo. 32Iruva ashekapa Yoabu kimaruma kya iwaa vandu nta ndeye akwa aleeshi. We mmbo alewaa vandu vavii, vandu vasaari ngota we. Mmbo Abineri mwana wa Neri, nniini wa vasikari va Israeli, na Anasa mwana wa Yetkeri; nniini wa vasikari va Yuda. 33Ngapo ya ivaa yellyo mmbo isheva ya Yoabu we na ngyeri yakwe llung'anu. Indi Iruva muni finya ashevasongoyaa kyeeri kyoose we Davidi amwi na evo woose vashekaya kitima kyakwe kya umgyi. 34Naasa Beneya mwana wa Yehoyada keenda kulya ulaleny kandewaa Yoabu kandeerika ireminylyakwe kulya kasa koomu. 35Mangyi kaallwa Benaya mwana wa Yehoyada nniini wa vasiri andu a Yoabu, na Sadoki kavikwa nkohani ando a Abiatari.

Ufu lwa Shimei

36Naasa mangyi kavaanga Shimei kammbia, “Tana mmba kunu Yerusalemu, kukaa-fo kweni kulasheenda nta ando kungyi. 37Mashika nkonu kushekwipoo kunu na iruuka usoka elo lwa Kidron ni dede kya dede mmbo kushefwaa, na yewe kushekuryaa kimaruma kya ufu lwafo.” 38Shimei karouwa. “Nkisha mangyi, Ndesa kwashivia ni indo shitana.” Naasa kakaa Yerusalemu kyeeri kyaasha. 39Naasa masiiyony a mwaaka wa kararu, mashinga avii a Shimei akakwiiva akeenda fika kwa Akishi mwana wa Maaka, mangyi ya Gathi. Mbony tikiitiwa sheelyi nkwa Gathi vakai, 40Shimei kaalukya nshungu wakwe, keenda ivaruuya kwa mangyi Akishi. Naasa ekifika-fo kavakooya kavaviira kyeny. 41Mangyi Solomon ekiita sheelyi Shimei alemmuuka Yerusalemu kafika Gathi na iwuya, 42Kavaanga Shimei kammbia, a ndesa, “Nshi yewe kulaamba ni dede kya dede kwa irina lya Iruva Munifinya nshishuuka Yerusalemu, na yeny shakuvavasa sheelyi kya dede kwa karya isomuka kunu ni kuti kufwe? Na yewe kwairikya kwaamba, ‘Ni kisha ni indo kutana.’ 43A niindaany elyi kulaamba wongo mbee ya Iruva muni finya, na yiila ivavaso llya shilekuniinga?” 44Mangyi keengera ivia Shimei, kwiishi deny makasha afo yoo kuletanya ndeyeakwa we Davidi kweekyo kuti kukooye yuuka kwa Iruva Munifinya. 45Indi yeny mmbo ashivikyaa mbora, na kitima llung'anu” 46Yoo kweni mangyi kavia Benaya mwana wa Yohayada, asomuke andekapa Shimei kutani afwa. Na yoondo umangyi lwa Solomon lukaengera ivanga.

Currently Selected:

1 VAMANGYI 2: MAS2

Highlight

Compare

Copy