1 VAMANGYI 1

Kyeeri kya Ukuu lwa Mangyi Davidi

1Mangyi Davidi ulaalu ammba nndu nkuu, naakwa nyeli mashinga akwe alensikya na masullya indi keengera iita mbeo. 2Naasa vandu vakwe vakammbia, “Mangyi mmbe, irisha lundekuruyya mwana wa kyeny ashekaa na yewe neekuvavara alale yoo uvariiny lwafo naambo kukooye iita nrike.” 3Kuruuywa mwana wa kyika Israeli shoose, naakwa kulya Shuvem vakandekooya-fo mwana nsha wa kyika avangwaa Abishaki nawo vakamweengye mangyi. 4Mwana yeu mmbo ekee mwana nsha nnu, kakaa na mangyi na immbawara, lyo mangyi nyelelala nawe-fo.

Adonia akundye nave mangyi.

5Kyeeri ekyi Adoniya mwana wa Davidi na Hagithi, kapooka ikushoba na yaamba we mmbe ashevaa mangyi, kapooka ikudeesya na mitika ishomuwa ni Furasi, na vengyi makumi araanu, vesongoyaa mbee yakwe amwi na ifina, na indumisha. 6Indi ndeye Davidi nyalensakira nta imbesa nkyikyi elyi eefo etanaa indo-fo. Kya dede Adonia etiri nndu wa yuumba na ekee fwana shisha nnu, nawe mmbwe ekee mwanawo wa Absalomo. 7Adoniya kaumburana na Yoabu mwana wa Seruya amwi na Abiatari vakallatya Sadoki na vakakuluunga nawe. 8Indi Nkohani nkisuku Nathan, Shimei, Rei amwi na mashiinga a Davidi wo mmbekulunga na Adoniya-fo. 9Nkonu umwi Adoniya kaniingya kiraso kyekora kikee na moonri, ng'umbe amwi na ngashe eti shivanri ando kuvangwaa iwe lya shoka, kufii na usoka lwa Enrongel. Kavavaanga efo kirasony, vasero woose va mangyi Davidi, na taari ya Yuda. 10Indi-lyo nalakunde isanda-u, mwanamaye we Solomon, ao nkisuku Nathan, ao Beneya, nta mashinga a mangyi.

Solomon Aniingwa Umangyi

11Naasa Natani keenda kwa Bethsheba, maye wa Solomon, kammbia kwammanya-se sheelyi Adoniya mwana wa Haggith akwaalwa mangyi we muni nta kulore mangyi eshi! 12Kwakooya kukundye ikira muu wafo na wa mwana wafo Solomon aranya kindo shiifo shikuvyia. 13Enda uviny kwa mangyi Davidi kundembia, ale mangyi Nndumi wakwa nshi yewe kweshilyiiya mboo, kwishaamba, “Mwana wakwa Solomon mmbwe ashekaya kiri kya Umangyiando afo? A-mmbo kyava inda lualu elyi Adoniya ankaya kiri kya umangyi?” 14“Nelyi kwiifo kureraa na mangyi na yeny shiveyaanga swany na ivangisa marero yoo afo mbee ya mangyi.” 15Naasa Bethsheba kandelolya mangyi kulya kirieny kyakwe kyelala. Mangyi mmikwa deny, na Abishaki mwana ulya wa kyika eefo nawe embavaraa. 16Bethsheba kafiiryandi mbee ya mangyi, nawe mangyi kammbesa. “Nkyokyi kukundye?” 17Bethsheba kammbia, “Nndumi wakwa, yeny ishinga lyafo, kwenshilyiiya mboo mmbe ya Nndumi Iruva wafo kwaamba, mwana wakwa Solomoni mmbwe ashiwarya kiri kyakwa kya Umangyi. 18Indi lualu Adoniya mmbe atiri uruka neewe nta kulaishi. 19Anniingya kiraso kya ikora, ng'umbe shiingyi, moori na ngashe shivanri kavaanga-u vana va kimangyi woose, Nkonu Abiatari na Yoabu nniini wa vasikari indi nalakunde ivaanga-u Solomon ishinga lyafo. 20Na ulaalu mangyi nndumi wakwa, vana va Israeli woose mmbo vakuverye yewe naambo kuidimi ivavyia eto ashekaya kiri kyafo kya umangyi. 21Kulantana indo kyeeri ekyi kuiiyo na muu, numa yeny na mwana wakwa Solomon mmbo lushevaangwa vakumbi.” 22Kyeeri Bethsheba eefo areraa na mangyi, Nkisuku Natani nawe kaveyaanga. 23Vandu nawo vakavia mangyi, “Nikisuku Natani akee yaandi.” Nawe ekifika alya mangyi ekai kafiirya-ndi kifulu-fulu mbee yakwe. 24Naasa Natani kaamba, ale mangyi nndumi wakwa mmbo kwaamba Adoniya mmbwe ashevaa mangyi ando afo? 25Nkonu wa inu mmbo anniingya kiraso kya ikora kya ng'umbe shiingyi, moonri na ngashe shivanri. Kavaanga vana vafo woose, Yoabu, nniini wa Vaisraeli, amwi na Nkohani Abiatari, na lualu indi mmbo veefo veenaa na ifina veshambaa Adonia mmbwe mangyi. 26Indi yeny alakunde ishivaanga-u, nta Sadoki mwilosha, Beneya na Solomon. 27A ndesa ni yewe Mangyi mmbe kuleniingya muumuu wa itana indo kulaifo nta ishinga lyafo lyimwi lyiishi mmbi yeto akeewarya umangyi lwafo? 28Mangyi Davidi kaamba, “shivaangyeny Bathsheba nawe keenda isalala yo mbee ya mangyi. 29Naasa mangyi kalya mboo kaamba Iruva muni finya, Iruva eefo na muu, eto aleshikira muu wakwa na ngatara shiingyi. 30Ndesa shekulyiyaa mboo mbee ya Iruva muni finya, Iruva wa Israeli shaamba mwana wafo Solomon mmbwe ashekayaa kiri kyakwa kya umangyi, mmbwe ashevaa mangyi andou akwa.” 31Bethsheba kafiirya-ndi kifulu-fulu kaamba, “Nndumi akuniinge finya llung'anu.” 32Naasa mangyi Davidi kavaanga Sadoki, Natanina Beneya. 33Vekyisha kavavia “Ibweeny varundi vakwa vamiku amwi na mwana vakwa Solomon, nsaamiseny nshunguny na mumwiimye muundera kulya usakeny llwa Kihoni. 34Naambo Nathani na Sadoki vandemwambya-fo mafura nawe Mangyi wa Israeli. Endekapeny maranda mwiishiimba ‘Mangyi Solomon nashillye llung'anu.’ 35Muvuye nawe mumfite yaandi naambo nashewarya umangyi-lwakwa. Mmbwe shilensauwa asheshillya Israeli na Yuda.” 36Beneya karouwa kaamba, “Niindo kitanyika,” nawe Nndumi Iruva wafo nakivikye ngarami. 37Ndesa Nndumi alekusongoya yewe mangyi kyiveeva indo kwa Solomon. Navikywa mbora efo ushilyiny lwakwe. 38Naasa Sadoki nkohani, nkisuku Nathani na Beneya mwana wa Yekoyada, na Vakarethi na Vapelethi woose vakamwiimya kufika usokeny lwa Gihoni esaamye frasi ya mangyi Davidi we ndeye. 39Nawe nkohani Sadoki kandeepoo mafura kulya yeemeny kaletya Solomon nave mangyi. Vandu woose vakaka mbembe veshaamba Solomon mmbwe mangyi. 40Naasa vandu woose vakallatya numa veshimbaa na ifina vetiri ifura inniini nnu. 41Naasa Adonia ando amwi na veny valya veefo nawe vakeeta kyoorongye kisiiyaa. Yoabu ekiita mbembe tiikapoo, kavesa. “A kyoorongye ekyo efo muriny mmbo kyaambakyi?” 42Eefo areraa indo, ate Yonathani mwana wa nkohani Abiatari nawe kaveyaanga;nawe Adonia kammbia, “Anga mmba, mashika yewe mmbo kukee nndu nsha, kukelweengye mbony shisha,” 43Llyo Yonathani alerouwa Adonia kammbia, “Oode,” ni kimaruma mangyi Davidi ammbika Solomon kitiminy nave mangyi; 44Nawe mangyi kasauwa nkohani Sadoki, nkisuku Nathani, Beneya mwana wa Yohayada na vakareth, na Vapelethi nawo vakamwiimya asaamyi frasi ya mangyi. 45Nalyo nkohani Sadoki na nkisuku Nathani vakamwaamba mafura nave mangyi kulya Gihoni ulaalu mfo kundo wooka vefuraa na yiimba nkyo kimaruma mwiitye kyoorongye. 46Ulaalu Solomon mmbwe Mangyi. 47Kilanya mmwasi ngyama ta mangyi ando amwi na mashinga akwe, vakeenda kwa mangyi Davidi vakafura amwi nawe. Vakankundya mesha we mangyi Solomon, Iruva ansongoye na imwiidimisya kilanya mmwasi ngota ndeye we Davidi. Mangyi Davidi kafiirya-ndi yoo kitareny kyakwe kaoshora Iruva. 48Katereva, kaamba “Nndumi Iruva wa Israeli narumishwa, eto aleidimisya mwana yeu wakwa katira umangyi ando akwa, amwi na ishiidimisya ifura elyo.” 49Naasa veny valya va Adonia vakaereeya nnu, vakanyanyaka wo nndu na shia yakwe. 50Nawe Adonia kiimba aleereya mangyi Solomon, karishya ulaleny lwa Nndumi Iruva, kandekutira na ndumba ta kitara kyeerasya. 51Mangyi Solomon keeta mbony, sheelyi Adonia anrishya ulaleny lwa Nndumi Iruva, atiri ndumba ta kitara kya irasya eshaamba, “Nshisomuka yaandi kulare mangyi Solomon ashilyisya mboo sheelyi nyashiwaa-fo.” 52Mangyi Solomon. Kaamba, “Kamba nndu nsaari nkwiifo kindo kipaana-fo. Lyo shalolya-fo uravi loose ifwa nkuti nafwe,” 53Naasa mangyi Solomon kaamba, “Navaangywa Adonia ooka kulya ulaleny. Adonia kasha kafiiryandi mbee ya mangyi, mangyi kammbia, ‘Kweengye kyeny.’”

Currently Selected:

1 VAMANGYI 1: MAS2

Highlight

Compare

Copy