1 VAMANGYI 15

Mangyi Abiya va Yuda

(2 Fye 13:1–14:1)

1Mwaaka wa ikumi na nyanya wa mangyi Yeroboamu mwana wa Nebati, llyo Abiya epooka ishillya uruka lwa Yuda. 2Myaaka iraru mmbo eshillya Yerusalemu, na maye evaangwa Maaka mfu wa Absalomo 3Katana ngyulyamari toose tilya ndeakwe etana kulare we ammba mangyi, nrima wakwe mmbwekee nsongovisi mbee ya Nndumi Iruva, Iruva wakwe sha wa ndeye mangyi Davidi-fo. 4Indi lyo, kimaruma kya Davidi; Nndumi Iruva, Iruva wakwe, kanniinga taa kulya Yerusalemu naambo asaleese nsero wakwe ando akwe, na ivambisa Yerusalemu ive na finya. 5Mashika Davidi mmbo etana fya usumanu mbee ya usangu lwa Nndumi Iruva, nta nnyetana ulyamari nnang'ani ya filya fyoose evavaswa-fo, mikonu myoose ya muu wakwe, kulare ni fyeeri filya fye Uria, Mhiti. 6Nalyo kweifo fira nnang'ani a Rehoboamu na Yeroboamu fyeeri fya muu wakwe. 7A mbony ta shoose alerunda, ta Abiya telesaau, na tilya shoose alerunda, ntikee shireiye efo kyitabun kya-mikonu-kya mikonu ya vamangyi va Yuda? 8Abiya kafwa na vandeye vakwe vakamwaara kulya muriny wa Davidi. Asa mwana wa Abiya kashillya ando akwe.

Mangyi Asa Va Yuda

(2 Fye 15:16–16:6)

9Asa kasheshillya uruka lwa Yuda, kwiikee mwaaka wa makumi avii wa Yerooamu manyi wa Israeli. 10Kashillya Yerusalemu myaaka makumi aana na umwi; na maye irina lyakwe evaanwa Maaka, mfu wa Absalomo. 11Naasa Davidi, 12Kashefuna-fo vafiri woose kulya urukeny lulya, kootafo mafwanu myoose alya alesongosyo mmbandeeye. 13Naakwa ni Maaka ve maye kanlemya nalasesheva mwiishillya, kyeendwa ni llya ensongosya Ashera mafwanu; naasa Asa kashemanya ifwanu llya kashelyimamitya kulya kimureny kya Kidroni. 14Indilyo ando alya kwauwe nkuleutwa-u-fo lyo nrima wa Asa mbee ya Nndumi Iruva mmbo wekee nsongovisi mikonu yakwe myoose. 15Findo filya ndeye alefyeeremuta kandefyeende, na filya alefyeeremuta we muni, kulya mmba ya Nndumi Iruva, fesa, saabu na fyoombo. 16Kweifo fira nnang'ani ya Asa na Baasha mangyi wa Israeli mikonu myoose. 17Naasa Baasha mangyi ya Israeli kashekapana na Yuda, katana Rama, naambo kulave-fo nndu ashangaa ao isomuka efo kwa Asa mangyi ya Yuda. 18Naasa Asa kandepoo fesa shoose na saabu t ilya tekee efo mmba ya Nndumi Iruva na ilya ya mangyi kaniingya varundi vakwe mangyi Asa kavaruma kwa Ben-hadadi, mwana wa Tabrimoni, mwana wa Herironi, mangyi ya Shamu ulya eke Demaski, kaamba; 19Lwiirikyani yeny na yewe, na ndeye akwa na ndeye afo, llate mmbo shakweengye findo fya pya, fesa na saabu, naasa kweendeny kundefisha iirikyano lyafo na Baasha mangyi ya Israeli naambo nashuuke. 20Nawe Ben-hadadi kairikyana na mangyi Asa karuma vaniini wa fira va miri ya Israeli, kandekapa lyoni, na Dani na Abel-beth-Maaka na Kinerothi uta shoose uruka lwa Naftali. 21Naasa Baasha ekiita mbony eto, keenda kandekaa Tirza karafo itana Rama. 22Llyo mangyi Asa kaamba, Yuda kulasaafo nndu-fo, nawo vakashekamara mawe a Raman na mboshiki ta vayo, tilya etana nato Baasha; nawe mangyi Asa kashetana nafyo muri wa Geba ya Benyaminy na Mispa. 23Na mbony shoose ta Asa tilesaafo, na finya takwe shoose, llya fyose endunda, na miri ilya entana mfyereiywa efo kyitabun-kya mikonu ya vamangyi va Yuda? Indi kyeeri kya ukuu lwakwe kashelwaa ndwari ya marende. 24Asa kalala na vandeye vakwe, karikwa ando amwi na vandeye vakwe muriny wa Davidi we ndeye. Nawe nsero wakwe Yehoshafati kashillya ando akwe.

Mangyi Nadadu va Israeli

25Nadabu mwana wa Yeroboamu mmbo epooka ishillya Israeli mwaaka wa kavii wa Asa mangyi ya Yuda, kashillya Israeli myaaka ivii. 26Kashetana ulyamari mbee ya usangu lwa Nndumi Iruva. Kashetana filya ndeye etana na ulyamari lwakwe lukashetuula Israei Ulyamariny. 27Naasa, Baasha mwana wa Ahiya wa mmba ya Iskari kanriingya, Baasha kashenkapa kulya Gibethoni, ya Wafilisti, mashika Nadabu na Israeli woose mmbo vekelaaya Gibethoni. 28Naasa Baasha mwaaka wa kararu, kawaa Asa mangyi ya Yuda nawe kashillya ando akwe. 29Nalyo yeni ekitira uruka kakapa mmba ya Yeroboamu shoose. Kutani awakomba kombi kutani irero lya Nndumi Iruva lyainukya llya alerera na kana ka ishinga lyakwe ahiya Mshilom; 30Kimaruma kya makasha a Yeroboamu alya alelya mara, akasheengye Israeli ulyamari kweekyo Nndumi Iruva, Iruva wa Israeli karooyo nngoo 31Naasany mbony shoose ta Nadabu tiseeifo, na shoose alerunda, nkyo ntilereiyo efo kyitabun-kya mikonu ya vamangyi va Israeli? 32Mmbo kweifo fira kyeeri kyoose nnang'ani ya Asa na Baasha mangyi ya Israeli.

Mangyi Baasha va Israeli

33Kwikee mwaaka wa kararu wa Asa mangyi ya Yuda, Baasha mwana wa Ahiya kapooka ishillya Israeli shoose efo Tirza, kashillya myaaka makumi avii na yiina. 34Kashetana ulyamari mbee ya usangu lwa Nndumi Iruva, kalatya ngyayo ta Yeroboamu, na mitannye yakwe ikashetuula Israeli.

Currently Selected:

1 VAMANGYI 15: MAS2

Highlight

Compare

Copy