1 VAMANGYI 14

Mwana wa Yeroboamu

1Kyeeri kilya Abiya mwana wa Yeroboamu kalwaa. 2Yeroboamu kavia nka wakwe, kwiipoo shakutereva, kukwaalashe, valakumanyi sheelyi yewe ni nka wa Yeroboamu; kundefika Shilo, na kulya kundekooya-fo nkisuku Ahiya, eto aleamba yeny shisheva mangyi uwe ya vandu eva. 3Ipoo mikate ikumi, na keki, na nungu ya ukyi, kunrwaaye, nawe ashekuvia ndesa mbony takwa tishevaa. 4Nka wa Yeroboamu katana indo, kepoo kyaroo, kafika Shilo kyeny kwa Ahiya. Naasa Ahiya alaidimi ilola mashika emfwa miso kimaruma kya ukuu. 5Nndumi iruva kavia Ahiya, Lola, nka wa Yeroboamu akeesha akuvese mbony ta nsero wakwe; mashika alwee uve na uve, kummbie; mashika elyi ashangaa mmba kwafo mmbo ashekwaalwa nave nka ungyi. 6Naasa Ahiya akiita ntiri wa marende akwe, eshaanga mwaangon kaamba, “Anga mmba, nka wa Yeroboamu; nkikyi elyi kukekwallwa nshi yewe? Mashika shanrumwa marero maroo kwafo kumuni. 7Enda kwandevia Yeroboamu, Nndumi Iruva, Iruva wa Israeli, aamba indi, Kimmba shilekuitikisa nnang'ani a vandu, shakwallywa kuve nniini uwe ya vandu vakwa Israeli 8Shasoka mmba ya Davidi umangyi, shakuniinga yewe, indi yewe nkukevaka ishinga lyakwa Davidi-fo, eto aletira mavavaso akwa, na ishilatya kyeeri kyakwe kyoose. 9Indi yewe mmbo kulelyamara kweelanya vengyi woose va mbee yafo kweenda kwandekusongosikya marua engyi na mafwanu; kwashimina, kwashiipala na ishikaba mungo. 10Kimmba ni indo mmbo nshendee ngapo shiroo efo kwa mmba ya Yeroboamu shishemamita veraso, eto akee mfinge na eto alerewa efo Israeli, mmbo nshevakombaafo shivaayye sha kirashi kutani vasia-fo woose. 11Eto wa Yeroboamu ashefiyyaa muriny mmbo alyiwaa mfite, na yeto ashefiyyaa nndeny mmbo alyiwaa nndeye ta nginii-u; mashika Nndumi Iruva mmbwe aamba.”

12Naasa kwipoo kwavuya kyeny kwafo; neelyi kushefika muriny kwafo nsero ashefwaa. 13Na Israeli woose mmbo vashemfuuya, na inndika, mashika mmbwe mwana wa Yeroboamu nsi ashearwaa kifuny mashika nnang'ani yakwe kuleshelollyo-fo mbony kyeny kwa Yeroboamu ikasennya Nndumi Iruva, Iruva wa Israeli. 14Na lyingyi Nndumi Iruva ashaseleesa mangyi uwe ya Israeli nawe ashelyamara mmba ya Yeroboamu nkonu eto; a nkyoki kyasaau lyingyi? 15Kimmba Nndumi Iruva akapa Israeli sha makongye akeevivitwa mmura, nawe mmbo asheilwa Israeli kunu urukeny eliu aniingye vandeye vawo, mmbo ashevanyanyatya kwakulya ya mura, mashika ni elyi valeshesongosya mashora awo nawe Nndumi Iruva kaswa. 16Israeli nawe asheutwaafo kimaruma kya ulyamari lwa Yeroboamu lya alelyamara lukasheengye Israeli nsindara. 17Naasa nka wa Yeroboamu kashekwipoo kenda kafika Tirza, nawe ekifika alya mwaangon wa mmba nsero ulya kafwa. 18Israeli woose vakandendika iifuuya, na irero lya Nndumi Iruva lyikainukya, llya alerera na kana ka ishinga lyakwe we nkisuku Ahiya.

Ufu lwa Yeroboamu

19Na mbony tisaa-u ta Yeroboamu eto tekapana na ishilya, eto mmbo tikeshireiye efo kyitabun-kya mikonu kya vamangyi va Israeli 20Mikonu Yeroboamu aleshillya, yefikye miaka makumi avii na ivii, kalala na vandeye; na nsero wakwe Nadabu kashillya ando akwe.

Yeroboamu Mangyi wa Yuda

(2 Fye 11:5–12:15)

21Nawe mwana wa Sulemani kashillya Yuda. Rehoboamu mmbo epooka ishillya etiri myaaka makumi aana na umwi; kashillya Yerusalemu myaaka ikumi na mfungare, muri Nndumi Iruva aleusauwa nnang'ani ya mmba shoose ta Israeli, naambo nandevambisafo irina lyakwe. Na maye irina lyakwe evaangwa Naama Mwamoni. 22Naasa Yuda vakatana makasha usanguny lwa Nndumi Iruva, vakanniinga kififi kwa ulyamari valetana lukailannya makasha vandeyeawo valentana. 23Mashika naakwa ni vandu eva vakandetana kundo kwa uwe, ngo ta maashera, uwe ya kidooro kyaasha, na sumbai ya wo nri uteri mare manuru, 24Na vafiri veengyi veifo kunu urukeny elu, vakatanafo findo firavi fyeesuta uruka Nndumi Iruva kavafunafo mbee ya usangu lwa vana va Israeli. 25Naasa, mwaaka wa karaanu wa mangyi Rehoboamu, Shishaki mangyi ya Misri ikandepooka fira na Yerusalemu. 26Kaipoo-fo umasi loose lwa mmba ya Nndumi Iruva, na umasi lwa mmba ya mangyi, kakurika fyoose pin. Naakwa ni ngao tilya ta saabu tesongosyo ni mangyi Sulemani nato katikamara shoose. 27Mangyi Rehoboamu kasongosya ngao ta arera ando a tilya, kandeniingya valya veeringa yoo mwaangony wa ngiri ya mmba ya mangyi. 28Kikawa valya veeringa mmbo veshiipoo na indeviira kulya mmba ya veringa kyeeri mangyi arumanaa efo mmba ya Nndumi Iruva. 29A mbony ta Rehoboamu tilesaafo na tilya shoose aletana mmbo kulare tilereiyo efo kyitabun-kya mikonu ya vamangyi va Yuda? 30Mikonu myoose mmbo kweifo fira nnang'ani ya mangyi Rehoboamu na Yeroboamu. 31Rehoboamu kalala na vandeye karikwa ando amwi na vandeye muriny wa Davidi. Na maye avaangwa Naama, Mwamoni. Na nsero wakwe Abiya kashillya ando akwe.

Currently Selected:

1 VAMANGYI 14: MAS2

Highlight

Compare

Copy