1 MBONY TA FYEERI 29

Mmba yakyisya itanwa

1Mangyi Davidi kavia vandu valya woose vekuumbye-u, “Mwana wakwa Solomoni, yeto akee nsauwe ni Iruva, nnyaleng'ana-fo mmbo akee mwana-n-du, nta nnyalemanya mbony ta ushilyi-fo, na ishora yelyi ni iniini. Mmba yeyo asheitanaa, nshi mmba ya nndu-fo ni ya Nndumi Iruva. 2Mmbo shankuuta na finya shoose ideesya findo fya mmba yei ya Nndumi Iruva wakwa. Saabu kwa findo fyeesongosya na saabu, fesa na findo fyeesongosya na fesa, arera na findo fya isongosya na minya na ando kweesongosywa na minya, mbau na findo fya isongosya mbau, mawe amikaa-mikaa a wuuru uniini, na mawe meengyi a maru-maaru. 3Na kilanya ya yefyi fyoose shammaa iniingya, mmbo shaniingya-se saabu na fesa, fikee ni masaa akwa shimuni kimaruma kya ikunda iniini lya Mmba yei ya Iruva. 4Mmbo shaniingya mmwasi ya tani iyana ta saabu shimamiri tuuka Ofiri, na tani fiku mayana avii na makumi aana, a fesa shisangye nisha, a itokopa yefo mmba ya Iruva, 5na findo fingyi fyoose yefyo vafuru vakundaa irunda nafyo. Yefyo fyoose mmbo shammaa iniingya. Mmbovi nnang'ani yaany, akundye yuutya Nndumi Iruva, kya nrima wakwe muni kuleefo wiitiki kimaruma kya mmba yei ya Iruva?”

6Naasa vaniini va ngyufyari, vasongoru va masanga moose a Israeli, vesalallya va mafiku, na mayana, na vasongoru va mashora a kimangyi woose, vakaniingya kwa nrima wao moose kulaifo yiitikywa. 7Vakaniingya kya mashora a mmba ya Iruva: saabu, tani iyana na makumi mfungare, fesa, tani mayana araru na makumi aana; arera tani kufii mayana arindaru na makumi avii, minya mmwasi ya tani fiku firaru na mayana aana. 8Valya veetiri mawe a wuuru uniini, vakaniingya mwiilola masaa a mmba ya Iruva ekee ni Yehiel Nlevi wa mmba ya Kershoni. 9Vandu vakaniingya na nrima wa ifura kya mmba yei ya Nndumi Iruva, kulaifo wiitiki, vakafura nnu kya yefyo fyoose fileniingywa. Lyo mangyi Davidi kafura kailannya.

Davidi arumisha Iruva

10Llyo mbee ya ikwaanu lya vandu woose, Davidi karumisha Nndumi Iruva: Ashambaa, “Kurumishwa llung'anu na llung'anu, ee Nndumi Iruva, Iruva wa nde-weeru Israeli. 11Uniini ni lwafo, yewe Nndumi Iruva muni finya, usuri, wiidimi na ushilyi, fyoose fikee iruveeu na si ya ngina ni fyafo, Ee Nndumi Iruva, umangyi ni lwafo kurumishwa yewe kukee uwe ya findo fyoose. 12Usimba na wiidimi ni kwafo fiukye, na fyoose kwafishillya. Wiidimi na finya ni wokony lwafo fikai, na yewo kuvakundye kwavasaleesa na ivaidimisya woose. 13Woi Iruva weeru, ulaalu lwakwaana na irumisha irina lyafo yeele.

14“Indi, yeny ni-vi, na vandu vakwa mba-kyi, nta lwiidimi ikuniingya kindo? Mashika findo fyoose lutiri ni kwafo fyuukye, na yefi lwakuniinga ni fyafo yewe kumuni. 15Yese mbee yafo mmbo lukee veny na vakyaaro sha vasaawoe veru woose. Mikonu yeeru yaandi ulaniny mmbo ikeira sha kirishe, llutiri kindo luvikye nsia yaandi ulaniny-fo. 16Yewe Nndumi Iruva, Iruva weeru, nsemu wa findo yefi fyoose lwakuutya fya ikutannya mmba, ni kimaruma kya usuri lwa irina lyafo yeele, fyooka maakony afo na fyoose ni fyafo. 17Shiishi Iruva wakwa, sheelyi yewe mmbo kweesaa, kwasennywa nnyeto ukunnyiisye. Na yeny kwa nrima ukunnyiisye, mmbo shaniingya findo yefyi fyoose kuleefo wiitiki, na ulaalu mmbo shilollye vandu vafo yewo vakee yaa veekuutya kwa ifura kulaifo wiitiki. 18Woi Nndumi Iruva, Iruva wa Abrahamu, Isaki na Israeli vasaawoye veru, vangisa makusaro a ngata yeyo miriminy ya vandu vafo, itetera mirima yaawo ikulatye yewe. 19Idimisya mwanawakwa Solomoni naambo nrima wakwe wiidimi ilatya mavavaso afo, na yiindya mirumbuye na shila tafo, naambo aidimi itana mmba yei yafo ya usuri shileideesya findo fyeitana.”

20Naasa, mangyi Davidi kavia vandu woose valekuumbya-u, “Arafuminy Nndumi Iruva, Iruva waany” Na valya woose vekuumbye-u, varumishe Nndumi Iruva, Iruva wa vasawoye wao vakamwiindya na iimfiryandi, vakainndya mangyi Davidi. 21Vakaniingya nndumwa kwa Nndumi Iruva. Na nkonu yeto walatya vakaniingya firaso fyemamitwa: ngoleta kyiku kimwi, ngurana ta suva kiku kyimwi, amwi na firaso fyawo fyeena na mirumwa miingyi kimaruma kya Vaisraeli woose.

22Naasa yeto ukava ni nkonu wa ilya na ina veefuraa nnu mbee ya Nndumi Iruva. Vakavika Solomoni wa Davidi lya kavii. Vakamwaamba mafura, nave mwiishillya kwa irina lya Nndumi Iruva, na Sadoki nave kohani. 23Llyo Solomoni ekaya kiri kya ushilyi kya ndeye. Nawe kava mbora, na Isanga lya Israeli lyoose lyikamwiindya. 24Vasongoru na veshilya woose, sanda na vana va Davidi woose vakavika kyaasa kya yiindya mangyi Solomoni. 25Nndumi Iruva, kaniinga Solomo irina na ngaa shisha usanguny lwa vana va Israeli woose kanniinga umasi uniini lwa kimangyi lwiilanyi mangyi shoose ta mbee yakwe ishillya Israeli.

Ushilyi lwa Davidi kwa kifii

26Naasa Davidi, mwana wa Yese, kashillya Israeli shoose. 27Kashillya Israeli myaaka makumi aana, myaaka mfungare mmbo eshillya Ebroni, na myaaka makumi araru na iraru kashillya kulya Yerusalemu. 28Kafwa nndu nkuu, ammikwa-den etiri umasi uniini na yiindywa. Mwana wakwe Solomoni kava mangyi ando akwe. 29Mbony ta mangyi Davidi ukya mapookyony fika masiiyony mmbo tikee shireiye fitabuny fya Samweli Mwiilollya, na nkisuku Natani na Kati mwiilollya. 30Yefyo mmbo fireyye mbony ta ushilyi lwakwe, wiidimi lwakwe, na mbony takwe toose yeto ekwaanannya nato we, Israeli na mangyi toose ta uruka.

Currently Selected:

1 MBONY TA FYEERI 29: MAS2

Highlight

Copy

Compare