1 MBONY TA FYEERI 28

Mavavaso a Davidi kya mmba ya Iruva

1Mangyi Davidi mmbo esangirya vaniini woose va Israeli kulya Yerusalemu: va ngyufyari, vaitori, na maronda moose alya erunndya mangyi, vesalallya va mafiku, mayana, veelola va masaa a mangyi moose, na ng'umbe ta mangyi toose, na vana amwi na vesalallya mmba ye Kimangyi, vandu vaami na vekapana woose.

2Naasa mangyi Davidi kasalala kaamba, “Yeni vana vama vakwa, na vandu vakwa shaarannyeny. Nriminy wakwa shenkunda itannya Nndumi Iruva mmba ya ivika isanduku lya kyaasa, kyeeri kya yeekyerya marende Iruva weeru shadeesya na findo fyeetana mmba yeyo. 3Indi Iruva kashiima kimaruma shikee nndu wa fira, shilepuswa samu shiingyi. 4Indi Nndumi Iruva, Iruva wa Israeli, mmbo weshisauwa yeny nnang'ani ya vana va nde-yaakwa shive mangyi ya Israeli llung'anu. Mmbo esauwa vandu va mmba ya Yuda vashillye, kasauwa nndu ooka yefo mmba ya nde wakwa, kasennywa kashisauwa yeny, shivemangyi wa Israeli shoose. 5Nndumi Iruva kashisimba vana veengyi, na nnang'ani ya vana yewo woose kashisawuya Solomoni mwana wakwa nakaye kiri kya umangyi lwakwe Nndumi Iruva nashillye Israeli.”

6“Nndumi Iruva eshivia, Mwana wafo Solomoni mmbwe asheshitannya mmba na ndala takwa, mashika ni yeny shilensauwa nave mwana wakwa, na yeny shive nde-yakwe.” 7Mmbo shivambisa umangyi lwakwe llung'anu kwakooya aindya na ilatya mavavaso akwa shaasa eefo alatyaa ulaalu.

8Naasa ulaalu yaa mbee ya ikwaanu yelyi lya Vaisraeli woose, vandu va Nndumi Iruva, Iruva weeru, loleny nnu mutire na yiindya mavavaso moose a Nndumi Iruva, Iruva waany, naambo mweengere ishillya uruka yelu usha, na numa ya vayo mushekooya ireeya vana vany ive ding'u yaawo llung'anu.

9“Na yewe mwanakwa Solomoni, kumanye nisha Iruva wa nde-wafo, kundunndye na nrima wafo wa toki, we Nndumi Iruva, mmbo eeshi isuma na imanya mirima na makusaro a vandu. Kwamumanya-we, kullollya, indi kwammukapa mungo, mmbo ashekweera kwaasha llung'anu. 10Kwiise nnu, kumanyi sheelyi, Nndumi Iruva ankusauwa yewe naambo kushentannya mmba ya mwiindye kwiipony kurunde mashora yoo.”

11Llyoon Davidi kaniingya Solomoni mwanawakwe uramba lwa mmba yeyo shaasa ikundikye itanwa, firya fya sumbai na fya uwe, na ando kweele kwayutya nndumwa. 12Kaniingya uramba lwose shaasa enkusarya yefo nriminy wakwe. Ta firya fya numa yefo kisafu, kundo kwesuruma masaa a mmba ya Iruva, na findo fikee fivauwe. 13Kaniingya na uramba ndesa ashekooya yaata vakohani mashoreny awo, yefo mmba ya Nndumi Iruva, amwi na ilola findo fyoose fya yefo mmba ya Nndumi Iruva. 14Kaniingya saabu shoose yeyo yeekundikye ya isongosya findo fyoose fya saabu fya urundi lwa wo ngata. 15Wo taa, na ando kwavayo kwa yeekyerya. 16Kaniingya saabu yamaa isongosya, mesa ta yeekyerya mikate ilya ya firaso fya iniingya Nndumi Iruva, 17na lyingyi-se kavavia shaasa vashekooya isongosya findo fya yefo mmba ya Iruva fikee ni uma, mideeva, fideeva, maleseri kavaniingya saabu na fesa ishekooya imaa isongosya findo yefyo fyoose, 18kya mmwasi kavaniingya saabu shisangye, yesongosya kitara kyeyuutya firaso fyekora na ifwanu lya ikari lya saabu lyitiri maaru ashiindima isikya isanduku lya kyaasa lya Nndumi Iruva. 19Yefyo fyoose mangyi Davidi kavoora paa, ndesa Nndumi Iruva emmbabasya. Mashora yoo moose arundike shaasa uramba lukai.

20Naasa mangyi Davidi kavia nsero wakwe Solomoni, “Kulaereye, salala kyuumi, kurunde mashora yaa, nta kulatirwa nnyinyira-fo. Iruva munifinya, yeto Iruva wakwa, mmbo akaa na yewe kutani mashora yaandi asia yoo moose akundikye irundika kunu mmba ya Nndumi Iruva. 21Vakohani na Valevi woose vammaa-deny yaavywa mashora vashekooya irunda kunu mmba ya Iruva. Varundi vatiri ufuru lwa-wo-ngata mmbo vakee neewe-deny, ishekwekya na vandu woose amwi na vasongoru woose mmbo vashekaa kwasi ya ushilyi lwafo.”

Currently Selected:

1 MBONY TA FYEERI 28: MAS2

Highlight

Copy

Compare