2 MBONY TA FYEERI 1
1
Mangyi Solomon Atereva Urilalyi
(1 Vam 3:1-15)
1Solomon mwana wa mangyi Davidi avangisa umangyi lwakwe, nawe Nndumi Iruva, Iruva wakwe ekee amwi nawe kamwallwa nndu nsuri kammbikya mbora niini. 2Mangyi Solomon kavaanga valya vesalallya vandu kwi makamba a fiku na mayana, valeti na vasongoru woose va ngyufyari ta Israeli. 3Kakwipoo keenda nawo fika ando kweyuutya ndumwa yefo Kibeoni. Mmbo veenda yefo, mashika mfo kundo yeema lyekwanannya na Iruva, llya lyetanwa ni Mose ishinga lya Iruva kulya kasa. 4(Indi isanduku lya Iruva ni Yerusalemu lyekai, kulya Yeemen llya mangyi Davidi eshekapya-fo kyeeri elyeende lyuuka Kiriat-yeariamu). 5Kweiyo kitara kyeerasya, kya arera, kyesongosywa ni Besaleli mwana wa Uri na nshuku wa Huri, na woose mmbo vekee kulya Kibeoni mbee ya Yeema lya Nndumi Iruva. Yoondo mangyi Solomon na vandu woose vakatereva Nndumi Iruva. 6Solomon kaalukya-uwe mbee ya kitara kyeerasya kya arera, kaniingyau kiraso kyemamitwa kyiku kimwi uwe ya kitara. 7Kio yekyo kyeni, Iruva kasheya Solomon, kammbia, “Tereva kindo kyoose, kukundye neeny shikuniinga.” 8Solomon kavia Iruva, “Mmbo koora nde-yakwa Davidi ikunda iniini, na ulaalu kwanshiseleesa shava mangyi ando akwe. 9Ulaalu woi Nndumi Iruva, inutya kyaasa kilya kweniinga nde-yakwa Davidi. Kwanshiseleesa, shava mangyi uwe ya vandu yeva vafye sha kiluulyi, 10Kweekyo mmbo shakutereva kushiniinge Urango usha na Urilaly usha, naambo shiidimi ishillya vandu yeva vafo nisha. Kilasha kya vayo, mmbo nshiidima inda ishillya vandu yeva vafo veengyi indi?” 11Iruva karouwa Solomon, “Kimmba kindo kwatereva, ni yefo nriminy wafo kikai, nta nkwatereva masaa-fo, nta umasi-fo, nta yiindywa nta nkwatereva yewo vakusuuye vamamitwo-fo, nta muu mwaasha-fo, indi mmbo kwatereva urilalyi na urango usha, naambo kwiidimi ishillya vandu yeva vakwa nisha yewo shakuniinga kuve mangyi yaawo, 12shankuniinga Urango usha na Urilalyi. Kya mmwasi shakuniinga umasi, masaa na yiindywa kilanya ya mangyi moose yeto alemmba mangyi mbee yafo, nta kulakaa nave-fo mangyi sha yewe numa yafo.”
Umasi na Wiidimi lwa Mangyi Solomon
(1 Vam 10:26-29)
13Naasa Solomon kakwipoo kulya kundo eutya nndumwa, kulya Kibeoni ulaleny lwa Nndumi Iruva lyekwaanannya, kawuya Yerusalemu. Kashillya Israeli. 14Solomon kasangirya mitika ya frasi na vesaama frasi kyiku kimwi na mayana aana, na fiku ikumi na fivii fya mitika ya frasi ta fira kulya Yerusalemu, na maata miriny ingyi. 15Mangyi Solomon kaengera fesa na saabu tikafumbuka sha mawe kulya Yerusalemu, na mbau ta mieresi tikaengereka sha makuu a shela. 16Vekapa mbusha va Solomon mbo vemweengye frasi yeto, tuuka Misri na Kilikia. 17Mmbo woora ikari lyimwi lya frasi lyuuka Misri, shekeli mayana arindaru, na frasi imwi shekeli iyana na makumi araanu.
Currently Selected:
2 MBONY TA FYEERI 1: MAS2
Highlight
Copy
Compare
Share
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
