1 MBONY TA FYEERI 27

Uramba lwa veekapana

1Yeva mmbo vaniini va mmba ya vana va Israeli, yewo vekee vesalallya ndesa vekwaani, na veetori va mafiku na mayana verundyaa mangyi Davidi kwi makamba yaanga na isomuka. Wo mwiiri na wo mwaaka mbo kweifo vandu fiku makumi avii na vaana vekeyaanga mashoreny kwi makamba.

2Yeshobeamu mwana wa Sabdieli mmbwe nsongoru wa kironda kya mbee, kwikee mwiiri wa mbee; kironda kyakwe mbo kyetiri vandu fiku makumi avii na vaana. 3We mmbo ekee wa mmba ya Peresi, nawe mwiisalallya wa vaniini woose wa vekapana mwiiri ulya wa mbee. 4Davidi ekee nsongoru wa ironda lya kavii, mwiiri ulya wa kavii. Kironda kyakwe kyetiri vekapana fiku makumi avii na vaana. 5Mwisalallya ikamba lya kararu, lyitiri vekapana fiku makumi avii na vaana ekee Benaya mwana wa Yehoyada ulya ekee nkohani nniini. 6Benaya yeu ni ulya ekee nndu mwaami, nnang'ani ya ikamba llya lya vandu makumi araru nawe mmbwe ekee nsongoru waawo. Na mwana wakwe Amisabadi ekee mwisalallya. 7Asaheli, mwanamaye wa Yoabu, ekee wa kaana, nsongoru wa ikamba lya kaana lyitiri vekapana fiku makumi avii na vaana. Numa ya vayo nsongoru elatya ni mwana wakwe Sebadia. 8Mwiiri wa karaanu: Shamhuti, Mwisrahi; ekee na ikamba lya vekapana fiku makumi avii na vaana. 9Mwiiri wa Karindaru: Ira, mwana wa Ikeshi, Mtekoa; ekee na ikamba lya vekapana fiku makumi avii na vaana. 10Mwiiri wa mfungare: Helesi, Mpeloni, wa mwana wa Efraimu; ekee na ikamba lya vekapana fiku makumi avii na vaana. 11Mwiiri wa nyanya: Sibekia; Mhushhati; wa Vasera ekee na ikamba lya vekapana fiku makumi avii na vaana. 12Mwiiri wa kyeenda: Abieseri mwana va Anatoti, va uftari lwa Benyaminy; nawe ekee na ikamba lyitiri vekapana fiku makumi avii na vaana. 13Mwiiri wa ikumi: Maharai, Mnetofati wa Vasera; nawe ekee na ikamba lya vekapana fiku makumi avii na vaana. 14Mwiiri wa ikumi na lyimwi: Benaya, Mpiratoni; wa vana va Efraimu, nawe ekee na ikamba lya vekapana fiku makumi avii na vaana. 15Mwiiri wa ikumi na kavii: Heldai, Mnetofati, wa Otrieli; yeu nawe ekee na ikamba lya vekapana fiku makumi avii na vaana.

Ushilyi lwa masanga a Israeli

16Yelu llo uramba lwa vaniini va vana va Israeli: wa Vareubeni, Elieseri mwana wa Sikri; Elieseri mmbwe ekee nniini wa vetori; wa Vasimeoni, Shefatia mwana wa Maaka 17wa Levi, Hashabia mwana wa Kemueli, wa Aron, Sadoki; 18wa Yuda, Elihu, umwi wa vana va maye va mangyi Davidi; wa Isakari, Omri mwana wa Mikaeli; 19wa Sabuloni, Ishmaya mwana wa Obadia, wa Naftali, Yeromoti mwana wa Asrieli; 20wa Efraimu, Hoshea mwana wa Asasia; wa Kyenga isanga lya Manase, Yoeli mwana wa Pedaya; 21wa kyenga isanga lya Manade kulya Kiliedi, Ido mwana wa Sekaria, na Benyaminy, Yaasieli mwana wa Abineri; 22wa Dani, Asareli mwana wa Yerohamu. Ewo mmbo vaniini va masanga a Israeli. 23Mangyi Davidi nnyekyena valya vekee kwasi ya myaaka makumi avii-fo; mashika Nndumi Iruva emmbaarya kyaasa yeengera Israeli vave veengyi sha nyinyiri ta nginiiu. 24Yoabu mwana wa Seruya epooka ivaekyena indilyo nnyemaa-fo. Mbony yei nnyesenya vana va Israeli-fo mashika nta na yeekyena llyevikwa fitabuny fya mangyi Davidi-fo.

Vesalallya va masaa a kimangyi

25Yeto mwisalallya umasi lwa mangyi Davidi ni Asmaweti mwana wa Adieli. Yonatani mwana wa Usia mmbwe esalallya masaa moose ekee mareminy, miriny, na fya kulya kyeny. 26Yeto esalallya vandu vekee iremi ni Esri mwana wa Kalebi. 27Yeto esalallya marema a misabibu ekee Shimei Mramati; Mwisalallya mfinyu ekee Sabdi, Mshifmi. 28Yeto esalallya misabibu na mikuu ya Shefela ni Baal-hamani, Mkederi. Mwiisalallya mmba ta isuruma findo ni Yoashi. 29Mwiisalallya findo fya mmba ilya yekee kulya Sharoni ekee Shitrai, Msharoni mwiisalallya findo ilya yekee kulya mamungony ekee Shafati mwana wa Adilai. 30Mwiisalallya ngamula ekee Obili Mwiishmaeli. Mwisalallya mishungu ni Yasisi, Mhagri. 31Yewo woose mmbo vekee velola masaa a mangyi Davidi.

Ngyama ta mangyi Davidi

32Yonatani, mmwana wa mangyi Davidi mmbo ekee umwi waawo, na nndu asomyi nisha na mwireiya mbony. We na Yehieli mwana wa Hekmoni mmbo velosha vana va mangyi 33Ahitofeli ekee ngyama ya mangyi Hushai Mwirki, ekee mbuya ya mangyi. 34Kyeeri Ahitofeli efwa, nndu evikwa-u ando akwe ni Yehoyada mwana wa Benaya na Abiatari. Yoabu mmbo ekee mwiisalallya vekapana va mangyi.

Currently Selected:

1 MBONY TA FYEERI 27: MAS2

Highlight

Compare

Copy