1 MBONY TA FYEERI 26

Varingyi va mmba ya Iruva

1Yelu llo uramba lwa Valevi vekerunda mashora a uringyi kulya mmbo ya Iruva. Kwa ufyari lwa Kora, kweifo Meshelemia mwana wa Kore wa mmba ya Asafu. 2We etiri vana mfungare: Sekaria mwana wakwe mbee, Yediaeli wa kavii, Sebadia wa kararu, Yetinieli wa kaana 3Elamu wa karaanu, Yohanani wa karindaru na Eliehoenai wa mfungare.

4Kweifo Obed-edomu, nndu Iruva emmbikya mbora kanninga vana nyanya: Shemaya mwana wakwe wa mbee, Yehosabadi wa kavii, Yoa wa kararu, Sakari wa kaana, Netaneli wa karaanu, 5Amieli wa karindaru, Isakari wa mfungare na Peuletia wa nyanya. 6Nawe mwana wakwe Shemaya ewona vana vatiri finya wookye yefo mmba ya nde-yaawo, mashika mmbo ekee vomi, vandu vatiri wiidimi uniini nnu.

7Shemaya mwana mmbe wa Obed-edomu etiri vana varindaru: Otini, Refaeli, Obedi, Elisabadi, vana va maye vekee vandu vaami, Elihu na Semakia. 8Yewo woose vana va Obed-edomu wo na vana vawo na vana vamaye mmbo vekee vandu vaami yefo urundiny lwawo. Mmba ya Obed-edomu mmbo yetiri vandu makumi arindaru na vavii. 9Nawe Meshelemia etiri vana na vana va maye vandu vatiri wiidimi ikumi na vaana. 10Hosa umwi wa vana va Merari etiri vana vaana: Shimri (yeto ndeye emwaallwa nsongoru lla na yelyi alakee mwana mmbee) 11Hilkia wa kavii; Tebalia wa kararu na Sekaria wa kaana. Vana woose va Hosa amwi na vana va maye vekee ikumi na vararu.

12Varingyi yewo mmbo vekwava kwi-mmba ngata vekwaani, nawo vakavikwa mashoreny yefo mmba ya Nndumi Iruva sha Valevi valya vengyi-da. 13Wo mmba kukeefo ilola sheelyi yeva mbeengyi, neeva mbaangu, vakasauwa veni taari ya uringyi lwawo. 14Kwa ya isauwa uringyi taari ya ngama ikandevya Shelemia. Vakakapa-se kura ya Sekaeria mwana wa Shelemia, nndu atiri vio na seu, ikawoya taari ya ndoo. 15Obed-edomu kura yakwe ikaniinga mwaango wa taari ya sinde; na ya vana vakwe vakaringa yefo mmba ya fisike. 16Shupimu na Hosa vakawoywa ni kura ya iringa mwaango wa taari ya nkwaany, kundo kutiri myaango ya Shaleketi na sshya ya iira uwe. Uringyi mmbo lwekee yallywa makamba. 17Wo nkonu taari ya ngama mmbo yatiri varingyi varindaru, taari ya ndoo vaana, ya sinde vaana, na mmba ya fisike mbevikwa-fo vavii-vavii. 18Alya ando kwa itengo lya utore lyikee taari ya nkwaany veiyo varingyi vaana alya shia, na vavii alya itengony kweni. 19Yewo mmbo varingyi nnang'ani ya ufyari lwa Kora na mmba ya Merari valerunda mashora yoo a uringyi.

Mashora engyi a ya Iruva

20Nnang'ani ya Valevi, Ahiya mmbwe ekee mwisalallya findo fya mmba ya Iruva, na findo fivauwe fyoose. 21Ladani, umwi wa ufyari lwa Kershoni, mmbwe ekee saawoye ya vandu maata, na vana va mwana wakwe Yehieli vekee nnang'ani yaawo.

22Vana vengyi vavii va Ladani, Setamu na Yoeli, vekee velola findo fya mmba ya Nndumi Iruva. 23Kya mmwasi vandu mmbo vaavywa mashora kwa ngyufyari ta Vaasiria, Vaishari, Vahebroni na Vausieli.

24Shebueli mwana wa Kershoni mwana wa Mose, mmbwe ekee mwisalallya findo yefyo. 25Na mwanamaye ni Elieseri, ndeye wa Rehabia, yeto mwiira Yeshaya aleera Yoramu, aleera Sikri, aleera Shelomoti. 26Shelomoti na vana va maye mmbo vekee velola findo fivauwe ni mangyi Davidi fyoose, na vasongoru yewo vakwaani vaniini va fira veshilya fiku na mayana. 27Vakavauwa findo maata filya valesha nafyo wooka fireny fya isongosya mmba ya Nndumi Iruva. 28Filya fyoose nkisuku Samueli alevaavuya, na Sauli mwana wa Kishi, na Abineri, na Yoabu mwana wa Seruya, mmbo fyekee kwasi ya ushilyi lwa Shelomoti na vana va maye.

Mashora a Valevi

29Nnang'ani a Vaishari, Kenania amwi na vana vakwe mmbo veniingwa mashora a ushilyi na ileta vana va Israeli. 30Nnang'ani a Vaibroni, Hashabia na vana va maye kyiku kimwi na mayana mfungare, vandu vaami woose, mmbo veniingwa mashora a isalallya Israeli kyenga kya taari ya nkwaany kya mura wa Yordan. Mmbo vesalallya mashora moose a Nndumi Iruva, na mashora a mangyi Davidi.

31Nnang'ani ya Vaibroni, Yeria mmbwe ekee nshilyi wa ngyufyari toose na mmba tawo toose kwikee mwaaka wa makumi aana wa ushilyi lwa mangyi Davidi, veruuywa vandu vakakooywa vomi vatiri wiidimi uniini kulya Yeseri ya Kilieadi. 32Mangyi Davidi kasauwa Yeriya na vana va maye fiku fivii na mayana mfungare, vandu vaami, na vasongoru va ngyufyari isalallya mbony shoose tikwaani na mbony ta Iruva na mangyi Davidi, kulya taari ta Vareubeni, Vakati na kyenga kya isanga lya Manase, tikee taari ya ngama ya mura wa Yordan.

Currently Selected:

1 MBONY TA FYEERI 26: MAS2

Highlight

Copy

Compare