1 MBONY TA FYEERI 19

Davidi Avinga Vaamoni na Vaashuru

(2 Sam 10:1-19)

1Numa ya vayo Nahashi mangyi ya Vaamoni kafwa, na mwana wakwe Hanuni katira umangyi. 2Mangyi Davidi kaamba, “Ni kuti shindesaiya Hanuni na intannya mesha, ngata ndeye Nahashi eshitannya,” Kweekyo mangyi Davidi karuma varundi vakwe ando akwe. Naasa vekifika kulya urukeny lwa Amoni na yiindikira mangyi Hanuni, 3Vasongoru va uruka lwa Vaamoni vakalatya mangyi vakammbia, “Nkyo, mmbo kukusarye sheelyi Davidi mmbo aruma vandu yeva yaandi, ishekusengera kimaruma yelyi kulefiywa ni ndeye wafo? Ni dede woode! Mmbo avaruma ishenunwa mbony ta uruka naambo naidimi ikutuula!”

4Hanuni katira varundi valya va Davidi kawoota nguyo, karanndwa soori tawo nnang'ani kupookya uwe fika kyenga kya kisouwa; kavalekeya veende kyawo. 5Kyikava ni kindo kya usutu iwuya kyeny. Kyeeri Davidi eeta kindo vetannywa, kavarummya nrumi kavavia vakaa kulya Yeriko kweni kutani nguyo tawo tammya lyingyi.

6Mangyi Hanuni ekilollya we na vandu vakwe Vaamoni ansakya na Davidi, mmbo eruuya fesa tamaa fiku makumi araru na fiina kararika nato mitika amwi na veerishisa mitika wooka taari ta Mesopotamia ya uwe, Maaka na Soban koose. 7Makari a fira, fiku makumi araru na avii a mangyi ya Maaka kasheringitya muri kufii na Nedeba. Na Vaamoni woose vakakwiipo woola yefo miriny yaawo vakakuumbye amwi ikapa Davidi.

8Kyeeri Davidi eeta mbony ngata tiketanyika, mmbo eruma Yoabu na itorito lyoose lya fira. 9Nawo Vaamoni vakakwiipo ikapa fira kupookya alya shia ya yaanga muriny waawo nniini Rabbali.

10Yoabu kalollya mmbo ammeeringityo ni matorito a vakiduva taari toose, numa na mbee, kweekyo kasauwa vasikari yeva vesha vakaari va Kiisraeli, kavavika nisha velolaa Vaaramu. 11Na vasikari valya vengyi valesaa-u vakashillywa ni mwanamaye Abishai, vakakudeesya nisha ikapa Vaamoni. 12Yoabu kammbia, “Kwanlollya Vaaramu veshilyimba finya, kushe swan ishiekya, na kwakooya Vaamoni vakulema finya mmbo na yeny shishaa ikweekya. 13Kaarya, nta kulaereye-fo! Ndifo lukapani kya vandu veru, na kya miri yei ya Iruva. Kwa wiidimi lwa Nndumi Iruva mmbo kitanyika.”

14Yoabu na vandu vakwe vakakapa fira, na Vaaramu vakarisha. 15Vaamoni vekilollya Vaaramu vanrisha nawo vakarisha Abishai; Nawe Yoabu kawuya kyakwe Yerusalemu.

16Vaaramu vekilollya vankapwa mba-Israeli vakandesangirya vasikari vengyi wooka taari ya ngama ya uruka lwawo ifitani na mura wa Eufrate, nawo vakasongoywa ni Shobaki nniini wa matorito a mangyi Hadadeseri wa Soba. 17Davidi ekiita indo kasangirya Vaisraeli woose vakaruuka mura wa Yordane indevakapa fira. 18Vaaramu vakakapwa na irishiswa deny, Davidi we na vasikari vakwe vakaidima iwaa vasikari veerishisa frasi fiku mfungare, na vashendaa na marende fiku makumi aana, Ni amwi na Shofaki nsongoru nniini wa matorito a Vaaramu. 19Mashinga alya a Hadadeseri ekilollya vankapwa ni Vaisraeeli; vakawuya itereva usari na ikulunga na Davidi vakasheva mashinga a Davidi, na kupookya yoondo Vaaramu mmbekikunda-se yeekya lyingyi Vaamoni-fo.

Currently Selected:

1 MBONY TA FYEERI 19: MAS2

Highlight

Compare

Copy