1 MBONY TA FYEERI 18

Ivinga lya Davidi fireny

(2 Sam 8:1-18)

1Kyeeri kyaangu mangyi Davidi kakapana lyingyi na Vaf ilisti kavavinga na ivasoka muri wa Kati na fyuungo fya vayo. 2Keengera ikapa-se Vamoabi kavatira mifungwa, vakava mashinga akwe. 3Davidi kaengera-se ikapa Hadadeseri mangyi ya Soba, uruka lufiitani na Hamati, na mmbo etana indo mashika elollya nkufii nafike indeseleesa bendera kulya minyanuny ilya ifitani na Eufrate taari ya ndoo. 4Davidi katira mifungwa mitika kyiku kyimwi a frasi, vaskari vashendaa na frasi fiku mfungare, na vengyi vashendaa na marende fiku makumi avii. Mmwasi ya fyoose Davidi karummbwa mataari a frasi shoose ta mitika kuuta-fo iyana lyimwi-nsi. 5Washami na va Damesko, vakakwiipo indetarama mangyi Hadadeseri, Davidi kavalyimba finya katuula vasikari fiku makumi avii. 6Nawe Davidi kaseleesa-fo ushilyi lwakwe kulya urukeny lulya nawo vakava mashinga akwe. Nndumi Iruva kava mwiikapannya Davidi wo ando koose. 7Davidi kasoka vasikari va Hadadeseri ngao tilya ta saabu veerye katirwaa Yerusalemu. 8Na lyingyi Davidi kakamara-fo masaa meengyi a yaambo oota kulya miriny ya Tibhat na Kunia kundo Hadadeseri ekee mangyi. Na masaa yaa mfo kundo Sulemani oota findo filya fyekundikye fya yefo mmba na ngo tilya ta yaambo.

9Naasa Tou, mangyi ya Hamati keeta sheelyi mangyi Davidi antuula umangyi lwa Hadadeseri amwi na vasikari woose. 10Kweekyo karuma Joram nsero wakwe kwa mangyi Davidi inrwaaya kidikiro na ifura lyakwe kwa wiidimi lwa ivinga na ituula mangyi Hadadeseri mashika yeu mmbwe ekee nkiduva wakwe niini. Yoramu karwaaya mangyi Davidi masaa meengyi a wuuru uniini ooka kwa mangyi Tou. 11Mangyi Davidi kasanda masaa yoo na alya engyi emipoo kulya ngyurukeny tilya enkapana nato, kaallwa a kundo kwa mmba ya mwiindye; Vandu envakapa na ivatuula ni: Edomu, Moabu, Ammoni, Filistia na Ameleki.

12Abishai mwana wa Seruya, kepoo fira na Edomu katuula vandu fiku ikumi na nyanya kulya imungon lya Shumbi. 13Katira uruka loose lwa Edomu, na vandu woose vakawa mashinga a mangyi Davidi, mashika Nndumi iruva akee kyaalu kyakwe.

14Davidi kashillya uruka loose lwa Israeli, eevatannya fisha fyoose na usumanu. 15Abishai mwanamaye wa Yoabu mmbwe ekee mwiisalallya vasikari, Yosefati mwana wa Ahiludi mmbwe mwiireiya fitabu; 16Sadoki mwana wa Ahitubu na Ahimeleki mwana wa Abiatari vekee valori; Seraiya ekee mwireiya myaandu. 17Penea mwana wa Yehoyada mmbwe ekee mwiisalallya varingi va mangyi Davidi; na vana va mangyi Davidi mmbo vetiri ushilyi lwa mashora yoo maniini moose yefo umangyi lwa ndee yaawo Davidi.

Currently Selected:

1 MBONY TA FYEERI 18: MAS2

Highlight

Compare

Copy