1 MBONY TA FYEERI 14

Mashora a Davidi Kulya Yerusalemu

(2 Sam 5:11-16)

1Nawe Hiramu, mangyi ya Tiro, kurumya mangyi Davidi, vandu vakanrwaaya findo fyeentannya mmba fikee mbau na veepasha mawe. 2Davidi kamanya dede sheelyi ni Nndumi Iruva akeemmbangisa na inseleesa naambo nave mangyi ya Israeli mashika umangyi na ushilyi lwakwe ni kwa vandu vakwe Israeli.

3Na yefo Yerusalemu mangyi Davidi keengera yoora vaka, kaira vana va kyika na va kyuumi. 4Na yeva mmbo vana valewonikya kulya Yerusalemu: Shame Shababu, Natan na Sulemani, 5Ibhari, Eliashua, Elipeleti, 6Noga, Nefagi, Yafia. 7Elishama, Eliada na Elifeleti.

Vafilisti Vavingwa

(2 Sam 5:17-25)

8Na Vafilisti vekiita sheelyi Davidi ammaambwa mafura nave mangyi ya Israeli shoose, Vafilisti woose vakakunda innduuya vakapani na mangyi Davidi, nawe Davidi ekiita indo, kakwiipo nandekapana nawo. 9Naasa Vafilisti vakakooya vemmesha itira mifungwa imungo lilya lya Varefia. 10Llyo Davidi kavesa Iruva, “Shakapana na Vafilisti yeva? Kushiniinga wiidimi lwa ivavinga?” Na Nndumi Iruva kammbia, “Enda mashika, shikuniinga wiidimi lwa ivavinga.”

11Naasa kasaama fika Baal-perasimu, na Davidi kavakapa kavatuula; kawuya kaamba, “Kwa woko lwa Iruva annyanyata vakiduva vakwa sha mura wa kisie.” Kweekyo ando yoo mmbo kuvaangwa Baal-perasimu. 12Nawo vakaisityo-u maruva alya awo a wongo; nawe Davidi kaamba amamitwa na muro.

13Na Vafilisti vakavasheya-se lyingyi kulya imungon ivakapa. 14Nawe Davidi kavesa lyingyi Iruva, Iruva kammbia, “Kulavalatye numa-fo, varunguke kundevakapa kupookya kulya miriny ya miforsadi. 15Na elyi kusheetaa ntiri wao veshiraa yefo miriny yeyo naasany kupooke ivakapa, na yeny mmbo shishekusongoyaa naambo kwidimi ikapa Vafilisti yewo.” 16Nawe Davidi kalatya ndesa Iruva alemmbavasya; kaidima ikapa Vafilisti kupookya kulya Gibeoni fika kulya Geser. 17Finya na wiidimi lwa Davidi lukaitiwa ando koose, na vandu va masanga vakamweereya.

Currently Selected:

1 MBONY TA FYEERI 14: MAS2

Highlight

Compare

Copy