1 MBONY TA FYEERI 13
13
Isanduku lya Kyaasa Lyeebowo Lyuuka Kiriati Yearimu
(2 Sam 6:1-11)
1Nalyo mangyi Davidi kavika shila na veshillya matorito a vandu fiku, na matorito a vandu mayana, na wo nndu nsongoru, 2Naasa Davidi karera na vandu va Israeli woose, kavavia, “Kwakooya kyamusenya, na kwakooya mmbo kyuukye kwa Nndumi Iruva, Iruva weeru, lurume vandu kundo koose, na wo andu kutiri vandu veru valya valesaa kulya urukeny lwa Israeli, amwi na vakohani, na Valevi, yewo vakee yefo miriny yaawo naambo lukooye ikuumbya andu kumwi. 3Naambo luidimi iviira-se isanduku lya Iruva weeru, mashika kyeeri kya mangyi Sauli llwevesa mbony ta vayo-fo.” 4Na vandu woose vakairikyana itana indo, mashika kyekee kindo kisha na usumanu kwa vandu woose.
5Naasa Davidi kaumbya vandu va Israeli woose, kupookya Shihori, kimureny kya Misri, kundefika alya mwaangon weyaanga Hamati, naambo vaidimi yeende isanduku lya Iruva lyuuka Kiriati-yearimu. 6Naasa Davidi, we na Israeli, vakasaama fika Baala, mmbo Kiriati-yearimu ukee Yuda, naambo vandeonndwa-fo isanduku lya Iruva, yelyo lyikee isende irina lya Nndumi Iruva, mwitorya. 7Nalyo vakasaamisa isanduku lya Iruva, uwe ya ikari lyiiya lyuuka mmba ya Abinadabu; na Usa na Ahio mmbo eendesha ikari llya. 8Davidi we na Israeli woose, mbee ya Iruva, kwa finya tawo shoose vakafina na fiimbo na kwa finubi, na kwa finanda na kwa matari na kwa matoasi na kwa tarumbeta,
9Nawo vekifika isaareny lya Kidoni, Usa kaorrwa woko lwakwe naambo natire isanduku mashika ng'umbe tilya mmbo tekapwa urende. 10Nawe Nndumi Iruva karooywa ni ngoo kya Usa kaukapa kimaruma kya llya oorwa woko naambo napaani isanduku kutani afiyya alya mbee ya Iruva. 11Nawe Davidi kavavywa nrimin kimaruma kya Usa ifitwa makusaro, ni Nndumi Iruva; kavaanga andu alya Peres-usa fika inu. 12Nawe Davidi nkonu ulya kaereya Iruva kaamba, “A niinda shisheende isanduku lya Iruva kwakwaa?” 13Naasa Davidi katiiya isanduku lilya muriny wa Davidi, kwa nndu umwi avaangwa Obedi-edomu Mgiti. 14Isanduku lya Iruva lyikakaa mmba ya Obedi-edomu, yefo kyeny kwakwe ando a miiri iraru; Nndumi Iruva, kavikya Obedi-edomu mbora mba yakwe na findo fyoose fya mmba yakwe.
Currently Selected:
1 MBONY TA FYEERI 13: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
