1 MBONY TA FYEERI 12

Vabenyaminy Vambee Ikulunga na Davidi

1Naasa yeva mmbo vandu vesheya Davidi ulya Seklai kundo ekusuruma kimaruma kya Sauli mwana wa Kishi. Vandu valya vatakusu vemweekya fira mfo kundo vekai nawe. 2Vekee vandu veeshi ilema ura, vandu verunda na maako moose, vandu vayeera mawe a ngova, na ikapa mife ya ura, vana va maye va Sauli wa Benyaminy 3Nniini waawo ekee Ahieseri, kalatya Yoashi, vana va Shemaa Mkibeati; Yesieli na Peleti, vana va Asmaweti na Baraka, na Yehu Mwanatoti 4na Ishmaya Mkibeoni shaamba ya valya makumi araru, nawe mmbwe nsongoru waawo, Yeremia, Yahasieli, Yohana, Yosabadi na Mkederati; 5Eliusai, Yerimoti, Bealia, Shemaria, Shefatia Mharufi; 6Elkana, Ishia, Asaleli, Yoeseri na Yoshabeamu Vakora, 7Yoela, na Sebadia, vana va Yerohamu, wa Kedori,

Vekulunga na Davidi va Ufyari lwa Kati

8Na Vakati vakakwaava vakalatya Davidi kulya kundo evikye kitoti kya vasikari wakwe shaamba ta vomi, vandu veshivye ikapa fira; na mafumu na ngao, vatiri fisangu fyeeresye fikavaka miiso. Vandu veeshi irisha sha sarya. 9Eseri nniini waawo, Obadia wa kavii, Eliabu wa kararu; 10Mishmana wa kaana, Yeremia wa Karaanu, 11Atai wa karindaru; Elieli wa mfungare. 12Yohana wa nyanya, Elsabadi wa kyeenda, 13Yeremia wa ikumi, Makbanai wa ikumi na lyimwi.

14Yewo mmbo vana va Kati vekee vashilyi va fira, yeto ekee n-ndu kaniingwa iyana, na yeto ekee nsongoru kaningwa kyiku. 15Yewo mmbo vekillya mura wa Yordan kwikee mwiiri wa mbee, mura ukaiwala-wala taari toose, nawo vakavarishisa woose valya va imungon, vakalla na taari ya ngama na vengyi taari ya nkwaany.

Vengyi Valeuka Benyaminy na Yuda

16Vana maata va Benyaminy na Yuda, vakeenda kutani vandefika kulya kitotiny kwa Davidi. 17Nawe Davidi kasomuka naambo avawarye, kavavia, “Kwakooya mmbo mwasha kya mafoo, ishesheekya naasa, nrima wakwa usangaa neeni, indi kwakooya mmbo mwasha kya ishikumba kwa vakiduva vakwa, na yen shilatiri ukasha na nndu, mmbo sharambikya Iruva wa vande veru nashikapannye muni.” 18Nalyo mumuyo nsha ukaolokya Abishai, nsongoru wa valya makumi araru kaamba,

“Yese mmbo lukee vafo, Ee Davidi;

Na taari yafo, E mwana wa Yese;

Urilalyi, yee, va na urilalyi,

Na urilalyi luve yefo kwa yewo vakekweekya.

Mashika mweeki wafo mmbwe Iruva wafo.

Llyo Davidi evaworya kavavika vave vashilyi va vasikari valya vakwe.”

Valekulunga Vooka Manase

19Vandu va Manase maata vekaa kyaalu kya Davidi kyeeri kilya ekapana na mangyi Sauli aryani na Vafilisti. Lyo mmbemweekya-fo mashika “Valya vaniini va Vafilisti vevika shila, vakavaumbuta vekunsara valashewafuluka vashewuya taari ya Sauli.”

20Ndesa efo ashendaa na Siklaki, valya va Manase vakawuya taari ya Davidi: Adna, na Yosabadi, na Yediaeli, na Mikaeli, Yosabadi, Elihu, na Seletai, ngyuku ta vashilyi valya vekee na Manase. 21Vakaekya Davidi kaidima ivavinga valya veifo vekapana nawe mashika woose mmbo vekee vandu vaantu vakaari va fira. 22Mashika wo nkonu mmbo vekeesha vandu veyeekya Davidi, kutani lyava itorito iniini nnu lya fira sha itorito lya Iruva.

Matorito a Davidi

23Na elyi lyo yeekyena lya vandu vatiri fisha fya ikapana fira, yewo vesha kwa Davidi wooka Hebron, naambo vasheniingya umangyi lwa Sauli kwa Davidi, ndesa Nndumi Iruva aambaye. 24Vandu vaukye Yudaya, varye ngao na mafumu a fira vekee vandu fiku firindaru na mayana nyanya. 25Vana va Simeoni vandu vakaari vatiri finya va fira, vanndu fiku mfungare na iyana lyimwi. 26Vana va Levi, fiku fiina na mayana arindaru. 27Na Yehoyada, nsongoru wa mmba ya Haruni, amwi nawe vekee vandu, fiku firaru na mayana mfungare. 28Sandau Sadoki nsero mmbavisi, na va mmba ya ndeye, vashilyi makumi avii na vavii. 29Na vana va Benyaminy, vamwi na Sauli vandu fiku firaru; lla yelyi kyava indo vandu veengyi vekee kyaalu kya mmba ya Sauli. 30Na vana va Efraimu, fiku makumi avii na mayana nyanya, vomi vanyaasi, vandu va tokyi va yefo ufyarin lwa vandeye. 31Na va mmba ya Manase kyenga kya nnang'ani, fiku ikumi na nyanya vandu vareiye marina naambo vashivika Davidi nave mangyi. 32Na vana va Isakari, vandu vatiri urango lwa imanya fyeeri, na filya fivasumannyi itana vekee vandu mayana avii na vana va maye vawo woose mmbo vekee kwasi ya ushilyi lwawo. 33Va Sabuloni, vandu vatiri wiidimi lwa yeengya mapaleny, vandu veeshi mbony ta fira, vatiri fisha fya fira fya wo ngata; fiku makumi araanu, vandu vakaari va fira vakapye ngoo. 34Na va Naftali, vashilyi kyiku, amwi na vatiri ngao na mafumu fiku makumi araru na mfungare. 35Na va Vadani, vandu vatoki veeshi ikapa fira, fiku makumi avii na nyanya na mayana arindaru. 36Na va Aseri, vandu vatiri wiidimi lwa yeengya mapaleny, vandu veeshi mbony ta fira, fiku makumi aana. 37Kwakulya ya mura wa Yordan, vana va Ruben na va Kati, na kyenga kya vandu va mmba ya Manase, vandu valoshe ikapana kwa wo ngata vandu kyiku kyimwi na makumi avii.

38Yewo woose ni vandu vafira valoshe kisha nnu, na woose vakeenda Hebron kwa nrima umwi indevika Davidi nave mangyi ya Israeli shoose, na va Israeli valya valesaa-fo mmbo vetiri nrima umwi-nsi wa ivika Davidi nave mangyi.

39Vakakaa kulya mikonu iraru sele, valyaa na ina, amwi na Davidi mashika vana vamaye vawo vemma ivadeesya. 40Kilanya ya fyoose valya veefitani nawo, kufike kulya Iskari, Sabuloni na Naftali vakaveengye shoonga veerye na Mishungu, na ngamula, na frasi, na ng'umbe, shoonga ta miswa, mikate ya mafura, sabibu shumu, mafura mfinyu, ng'umbe, mburu na findo fingyi nkuka-den, kimaruma kya ifura iniini lyekee Israeli.

Currently Selected:

1 MBONY TA FYEERI 12: MAS2

Highlight

Compare

Copy