1 MBONY TA FYEERI 11

Davidi avikwa mangyi ya Israeli na Yuda

(2 Sam 5:1-10)

1Llyo Vaisraeli woose vakakuumbya indekwaanannya na Davidi kulya Hebron veshaamba, “Yese mmbo lukee vammba na samu imwi-nsi na yewe. 2Kupookya kasha, llya Sauli ekee mangyi, ni yewe kwelweende, Israeli, na Nndumi Iruva wafo kakuvia, ‘Yewe mmbwe mwiisi va vandu vakwa Israeli, na mmbo kusheva mangyi ya vandu vakwa Israeli.’ 3Nalyo vasongoru va Israeli woose vakeenda Hebron kwa mangyi; Nawe Davidi kairikyana nawo kya mbony yeyo kulya Hebron mbee ya Nndumi Iruva nawe Samweli kamwaamba mafura nave mangyi ya Israeli ndesa Nndumi Iruva emmaamba.”

4Naasa Davidi na vandu va Israeli woose vakeenda Yerusalemu (mfo Yebusi). Vayebusi mmbo vandu veifo veni uruka. 5Vayebusi yewo veni uruka vakavia Davidi, “Nkushaanga kunu-fo.” Indi we Davidi katira Sayuni ikava nto muri wa Davidi. 6Naasa Davidi kaamba, “Nndu moose yeto asheva wa mbee iwaa myebusi mmbwe ashevaa nsongoru wa itorito lya fira.” Yoabu mwana wa Seruya kava wa mbee isaama, nawe kawa nsongoru wa fira. 7Naasan Davidi kakaa alya kitotin, kukava nto muri wa Davidi. 8Karingitya muri yeto taari toose kupookya Milo. Nawe yoabu kandetokopa muri ulya ungyi. 9Nawe Davidi kaengera iva na finya mmwasi; mashika Nndumi Iruva wa matorito ekee kyaalu kyakwe.

Vasikari Vatakusu va Davidi

(2 Sam 23:8-39)

10Naasa yeva mmbo vasongoru va toki Davidi etiri, vakakulunga nawe vakanniinga finya yefo umangyiny lwakwe ando amwi na Vaisraeli woose; vakammbika, nave mangyi ya israeli, ndesa irero lya Nndumi Iruva lyemmaamba. 11Na yelyi llyo yeekyena lya vandu yewo vatiri finya va mangyi Davidi. Yashobeamu, Mhakmoni, nsongoru wa vashilyi, yeu mmbo ewaa vandu mayana araru na ifumu lyakwe. 12Na yeto allatye nnang'ani ya valya vararu nndu atiri finya nnu, ni Elieser mwana wa Dodai, mhohi umwi ya valya vararu vatiri finya. 13Yeto mmbo ekee amwi na Davidi yefo Pasdamimu, mfo kundo Vafilisti vekuumbya fireny mbo wekee imungon kundo kutiri nganu, na vandu yewo vakarisha Vafilisti. 14Nawo vakakufinga kyuumi nnang'ani ya mungo vakakapana na Vafilisti vakawawaa, nawe Nndumi Iruva, kavakapannya vakavinga.

15Valya vararu nnang'ani ya valya vasongoru makumi araru vakaoloka waangeny vakalatya-fo Davidi fika mbangeny ya Adulamu, na itorito lyoose lya Vafilisti mfo kundo venkuumbya, kulya imungony lya Varefai. 16Na kyeeri kilya Davidi kulya Kitotiny ekai, na kyeeri yekyo varingyi va Vafilisti ni kulya Betilehemu vekai. 17Davidi kakummbwa kyeny, kaamba, “A le womi kukooye kyeshiidimika-dwa, nndu nashikuniingye mura weena wuuka alya kiroriny kya mwaango wa Betilehemu.” 18Naasa valya vararu vakarorova nta Vafilisti valaidimi ivalollya vakanderaa mura kulya kirorin kya Betilehemu, kilya kikee alya kufii na mwaango, vakaukamara vakaengye Davidi, indi Davidi nalakunde-se ina mura ulya kauniingya kiraso mbee ya Nndumi Iruva. 19Kaamba, “Iruva wakwa, kiite kwaasha, shilasheitana indi ndesa, shine samu ya vandu yeva vareka muu wawo, mashika mmbo vareka muu wawo vakasheengye mura yeu.” Ni indo etana nalane mura ulya. Yoo ng'u mashora a vandu valya vararu vasauwe.

20Abishai, mwana maye wa Yoabu, ekee nsongoru wa valya vararu, mashika kwa ifumu lyakwe mmbo ekapana kawaa vandu mayana araru. Kava na irina nnang'ani ya valya vararu. 21We kaindywa mmwasi ya valya vavii, kava nniini waawo, lyo nnyekarya kava nnang'ani ya valya vararu-fo. 22Peneya mwana wa Yoyada, nndu nkaari atiri finya, wa Kabseeli, nndu atannyi mashora maniini, mmbwe yeto ewaa masiingo avii a vandu a Moabu, mmbwe yeto ewaa miiso yekee nnang'ani irininy kyeeri kya mbeo. 23Mmbwe ewaa nndu wa Misri, ekee nndu mwaasha nnu, atiri finya. Nndu etiri ifumu iroo lyilavaa ikamara wokon lwakwe kaidima insoka ifumu yelyo na immbwa na ifumu lyakwe muni. 24Mbony yeto ni Peneya mwana wa Yehoyada etana, kava nndu atiri irina iniini nnang'ani a vandu valya vasongoru vararu. 25Kava nndu atiri wiidi kailannya vandu valya makumi araru, lyo nnyekarya iva umwi wa valya vararu-fo, nawe Davidi kamwaallwa nsongoru wa vangari vakwe.

26Yeva mmbo vandu vatakusu va fira; Asheli mwanamaye wa Yoabu, Elhanani mwana wa Dodo wa Betlehemu. 27Shama Mharodi, Helesi Mpeloni, 28Ira mwana wa Ikeshi Mtekoi, Abieseri va kullya Anatoti; 29Sibekai Mhushati, Salmoni Mwahohi, 30Maharai Mnetofati, Heledi mwana wa Baana Mnetofati; 31itai mwana wa Ribai wa Kibea wa vana va Benyaminy, Peneya Mpiratoni; 32Hurai wa ngyusoka ta Kaashi. Abieli Mwaibati; 33Asmaweti Mbaharumi, Eliaba Mshaalboni. 34Vana va Yasheni Mkiloni, Yonatani mwana wa Shama Mharari, 35Ahiamu mwana wa Sharari Mharari, Elifeleti mwana wa Ahasibai, Heferi, 36Mmaakati, Ahia Mpeloni, 37Hesro Mkarmeli, Paarai mwana wa Esbai Mwaoki; 38Yoeli mwanamaye wa Natani Miihari mwana wa Hakri; 39Seleki Mwamoni Naharai Mbeoroti, yeto mwiikurika fisha wa Yoabu mwana wa Seruya, 40Ira Mwitri, Karebu Mwitri 41Uria Mhiti, Sabati mwana wa Alai, 42Adina mwana wa Shisa Mreuboni, nsongoru wa Vareubeni, na valya makumi araru amwi nawe; 43Hanani mwana wa Maaka, na Yoshafati; 44Usia mwashterati, Shama na Yeieli vana va Hotamu Mwamori; 45Yediaeli mwana wa Shimri, na Yona mwanamaye Musi 46Elieli Mmahawi na Yeribai, na Yoshavia, vana va Elnaamu, na Itma Mmoabi; 47Elieli na Obadi, na Yaasieli Mmesobai.

Currently Selected:

1 MBONY TA FYEERI 11: MAS2

Highlight

Compare

Copy