1 MBONY TA FYEERI 10
10
Ufu lwa Mangyi Sauli
(1 Sam 31:1-13)
1Naasa Vafilisti vakakapana na Vaisraeli; nawo vandu va Israeli, vakarisha mbee ya Vafilisti, vandu vakawaawa kulya ifumbuu lya Kilboa. 2Nawo Vafilisti vakarishisa nnu Sauli na vana vakwe; Vafilisti vakawaa Yonatani, Abinadabu, na Malkishua vana va Sauli. 3Na kilanya ya fyoose fira ikaengera ing'ana Sauli karovywa nnu, na veera mife vakamwasa. Sauli kasavaa nnu, kimaruma kya veera mife yewo. 4Llyo Sauli kavia umwi wa mwintara fisha fyakwe fyeekapana sommwa upanga lwafo kwashiwaa nalo, maseka yaa nalashe ishitatala. Indi mwintara fisha filya fyakwe kalema; kimaruma eereya nnu. Naasa Sauli muni kasomwa usu lwakwe kaluwoya. 5Mwintara fisha fyakwe, ekilollya Sauli amfwa; nawe kawoya usu lwakwe kafwa. 6Sauli kafwa, na vana vakwe vararu; na va mmba yakwe voose vakafwa andu amwi.
7Naasa vandu woose va Israeli, valya vekee kulya imungon, vekilollya vanrisha, na Sauli na vana vakwe vammefwa, vakara miri yaawo vakarisha nawo Vafilisti vakeenda vakandekaa-fo. 8Yelyi lya ndesi ya vayo Vafilisti vakyeenda ivatira mifungwa valya valewaawa, vakalollya Sauli na vana vakwe ammbwa kulya ifumbuu lya Kilboa. 9Vakamuuta soori takwe, vakanrummbwa nrwe, amwi na ikurika fisha fyakwe vakandefirwaa urukeny lwa Vafilisti vandu woose amwi na mafwanu vakamanyisywa mbony yeto. 10Vakandevika fisha fyakwe kyeny kwa marua awo, na nrwe wakwe vakaununuta yefo mmba ta iruva lyawo Dakoni. 11Na vandu woose va Yabesh-kilead, vekiita yefyo fyoose Vafilisti valetannya Sauli, 12vasero vakaari woose vatiri finya vakakwipoo vakandeipoo mwiili wa Sauli, na miili ya vana vakwe, vakandeyeende Yabeshi, vakanderika maffwa awo sinden ya mwaloni kulya Yabeshi, nawo vakafinga ando a mikonu mfungare.
13Naasa Sauli ni indo efwa, kimaruma kya ilyamarya Nndumi Iruva, kya ilemwa yiindya irero lya Nndumi Iruva, elyi endelafya kwa vasavi naambo vakooye inrambuya mbony takwe, 14nalakivese mbony yeto kwa Nndumi Iruva, nkyo kammbwa na umangyi lwakwe kaalashya Davidi mwana wa Yese.
Currently Selected:
1 MBONY TA FYEERI 10: MAS2
Highlight
Share
Compare
Copy
Want to have your highlights saved across all your devices? Sign up or sign in
The Holy Bible in Kimashami © Bible Society of Tanzania, 2016.
