Obumanyi 16
16
1Aha rw'ekyo abantu aba bakaba baragiirwe ebitondwa
ebyab'ebi bibabonabonyie,
zikaba zili nyamaishwa ekinje ezabaisire kubi.
2Kyonkai iwe, waitu Mukama,
abantu bawe okabagilira obufura.
Okabatwekera entitiri zilikunura ez'okulya
bahwa orwoyoyo.
3Ebi byona okabikora, ababaire nibafukamira ebihuuku
kabakurumirwe enjara, baburwe agalya,
aha rw'enshonga y'ebitondwa ebyabaire nibizira.
Abantu bawe bakurumwa enjara akanya kagufi,
kandi ahanyuma balya ekyakulya ekirungi muno.
4Ababonesize abantu bawe enaku bakaba nibaragirwa
kugira obwetage obutakutantarwa,
kandi abantu bawe bonene kubona okwo
ababisha babo enaku zabalya.
5Kuba orwo ebikaaka byatabaliire kubi abantu bawe,
bakatemwa n'enjoka ezilikurabarabya,
tiwagendeleire kunigara.
6Bakashasha eibanga ligufi babone kweshubaho,
ahanyuma wabateraho akabonero k'okubakiza,
n'okubaijukya eby'Amateka gawe galikuragira.
7Ayahindukaga akaleba akabonero kalinya,
enjoka y'omulinga, yakiraga.
Akaba atalikutambirwa kyoyabona;
yatambirwaga iwe, Omurokozi w'abantu bona.
8Kandi omu kugir'otyo mwonene omwo,
okoleka ababisha baitu
okwo iwe n'iwe oihura abantu omu kabi kona.
9Enzige n'enshwera zikabaruma zabaita,
mara tihazokire kya kubakiza;
kuba bakaba baragiirwe ebitondwa nk'ebyo kubashasa.
10Kyonkai abaana bawe,
n'amaino g'enjoka ez'amashagwa gonkai tigabagobireho,
enshonga okabagilira obuganyizi wabatambira.
11Kababaire barumwa bati enjoka, bakira aho n'aho.
Ekyo kyabaijukyaga ebyo wabaire ogambire,
bataija bakabyeberwa kimoi,
kwija kubura kukusiima aha rw'obufura bwawe.
12Tibatambiirwe mibazi ya marungu,
anga kukizibwa mubazi gwona gwona
Ekigambo kyawe waitu Mukama
nikyo kitambira abantu bona.
13N'iwe ogelera oburora n'orufu.
N'iwe osongora abantu Hadesi okashuba okabaihyayo.
14Omuntu omubi aita mutahiwe,
kyonkai tashobora kumugaruramu mwoyo ogwagenzire
handiki kutaishura mwoyo ogufungiirwe omu bafu.
Misiri neterwa enkomaizi
15Tikilikushoboka omuntu kukukiraho!
16Abatakutina kabayangire kukumanya,
okababonabonyia omu bushobora bwawe,
baterwa enjura etali ya buli kiro
n'orubare n'enkomaizi ey'akasisikano,
n'omuliro gwabasilikya limoi limoi.
17Eky'okutangaza muno kubona omuliro nigwaka omu maizi,
kandi okwo amaizi nigo garaza kaishe muliro,
kuba ensi erabira abarungi.
18Haliho akanya orwo omuliro gwaraire,
gukaba gutakyokya bitondwa ebyasindikirwe
kubonabonyia ababaire batalikutina Ruhanga.
Abantu abo bakaragirwa ekyo kukibona bakamanyiraho
okwo ekibonabonyio kya Ruhanga kyabaire kibahondeire.
19Kandi orundi nangu omuliro gukakira omu maizi
n'amani kushaga okwo gwabaire gurayakire,
gwayokya emyaka ey'abantu ababi.
Abaisiraeli Nibabona Manu y'Okulya
20Norwo byagenzire bityo,
abantu bawe okabaha ebyakulya by'abamalaika,
wabaha ekyakulya kuruga omw'iguru
ekyo batajweleire mpiita,
bashemelerwa, buli muntu yanulirwa.
21Okubemera kwawe kukoleka engonzi zawe
aha bana bawe,
kandi ekyakulya ekyaigusize buli omoi ayakilire,
kikabanulira kyatambira bona orwoyoyo.
22Eseluji n'orubare bikalema omuliro tibyayagiliire,
Abaisiraeli babone kumanyiraho okwo omuliro
ogwabaire nigwakira omu rubare,
nigurabya omu njura eyabaire neshesheka n'amani,
nigwo gwayokize emyaka y'ababisha babo.
23Kandi omuliro ogwo tigwakolize mani gagwo gona,
abarungi kabashobora kubona eky'okulya.
24Ebitondwa kabiba nibikukolera
iwe kibitonda,
bikoza amani gabyo kubonabonyia ababi.
Kyonkai aha bakwesiga bikoza embabazi.
25Hakabaho ebitondwa bya buli ngeli kwoleka okwo
abakutakira obagilira ekisha n'obufura bungi.
26Waitu Mukama, kikaba kityo abantu abo wagonzaga
kabamanya okwo balikulya ebyo batalikushobora kulima.
Ekigambo kyawe nikyo kiroza abakwesiga.
27Ekyakulya ekitayokiibwe muliro,
orwo kyagobirweho kiti amaranzi g'eizoba
elyamara kushabuka kikaagilira.
28Eki kikatwegesa okwo turagiirwe kwimuka
obwire butakakeire kukusiima,
kandi eizoba kugya kushabuka tushangwe
nitukushaba.
29Kyonkai eshubi y'omuntu atasiima elihwaho nk'oruho,
eyomere nk'amaizi agataina mulimo.
Currently Selected:
Obumanyi 16: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.