Obumanyi 17
17
Obutini Nibukwata Abamisiri omu Kiro
1Emiramulire yawe eba y'amani
mara neguma kugishoborora;
nikyo abantu abategire bahabiire.
2Abafakare orwo batekeleize okwo
eihanga elitakatifu lili omu mani gabo,
omwilima gukabakoma, obwire bwayanga kukya,
bwabahindura mbohe bakingirainwe omu maju gabo,
baba nk'abo Ruhanga aihiiremu kimoi emikono.
3Batekelezaga okwo amafu ago bakoraga bwesheleke
hakaba hataliho alikubabona
nibalenga bati ebyo balikukora tibilikwijukwa.
Kyonkai ahanyuma bakakwatwa obutini obubi muno,
baburabuzibwa, n'enyawalinga zabatinisa ebishobeize.
4Nangu n'ekiyumba ky'omunda ekyo babaire balimu
tikyabatambire butini,
shana amaraka galikutinisa nigo gabaire nigahinda
gababunzire,
babona n'enyawalinga ezemire kubi aha maisho.
5Taliho muliro gwabaire gwina mani kubaakiza,
nangu n'enyanyinyi ezilikwaka muno
nazo tizashoboire kubaakiza omu kiro ekyo eky'enaku.
6Taliho kintu na kimoi ekyabaakiize,
shana omuliro ogulikutinisa ogwayeyakize.
Kandi omu butini obwo,
orwo balekeire bati kubona enyawalinga,
batekeleza ngu ebyo baboine bikaba nibitinisa
kukira ebyo babaire baraboine.
7Ebiroto by'abafumu babo bikaba bya bushai,
n'obumanyi obwo bayeshalingyaga nabwo bwafa bushai.
8Ababaire bashubiize kutambira abarwaire akajanja
kubaihyamu n'obutini,
bonene nibo babaire barwaire obutini obutaina ntege.
9N'orwo hatabaireho kintu kyona kyona eky'okubatinisa,
kabakangirwe ebigunju n'enjoka zilikufuha
ebyabaire nibihingura,
10bakaitwa obutini, bajugumba,
baburwa n'agaburuza amaisho,
kandi okwo bataina kwikara bagabunzire.
11Ababi bagira obutini mara beramura bonene bonkai.
Omuntu alikwehulira kubi aha njoka,
aikara nayetekeleza kubi kushaga okw'ali.
12Obutini ti kintu kindi
shana okulemwa kukoza amagezi.
13Omuntu k'ayenanuka omu mwoyo,
ekyamuletera enaku aba atakikimanya.
14Kyonkai ekiro ekyo kyonene
eky'omwilima gutaina mani kwo kwo kwo
ekyababurabulize kyemire Hadesi okuzimu ahatakigira mani,
bakarara nibahashuka omu turo.
15Aho nirwo babingirwe enyawalinga ezilikutinisa,
bayenanuka bagwa omu kamazi,
kuba bakakwatwa obutini bw'ekibwangu batabwetegeire.
16Ayakabaire aliho wene akakubintuka ahansi,
yafungirwa mabusi etakolize byoma.
17Yaba yabaire mulimi anga mushumba
anga mupakasi omw'irungu,
akakwatirwayo enaku zamulirayo,
aha rw'okuba bona bakakomwa omunyororo
gumoi ogw'omwilima elindindi.
18Yaba haizire omuyaga ogulikunywigya,
anga zilikaba nyonyi ezilikuhoyage
omu miti ey'amatagi gangi,
anga galikaba maizi agalikuhinda,
19anga amabare agalikuhilingita nigamomorangana,
anga enyamaishwa zilikukuntira
kandi okwo zitalikuboneka,
anga ebikaaka by'amani gangi muno ebilikuhinda,
anga ekizimu ky'eiraka ekilikuletwa
omu mpanga z'enshozi,
ebyo byona bikabasharaza byabatinisa muno.
20Ensi yona ekabona omushana ogwajwirege,
abantu bakorage emilimo,
21shana aba bonkai nibo ekiro kyasikiliire,
kili kamanyiso k'omwilima ogulikubabunda ahanyuma,
kyonkai kandi bonene nibo babaire nibesikilira
kushaga omwilima gwonene.
Currently Selected:
Obumanyi 17: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.