Obumanyi 15
15
Ruhanga ow'amazima
1Iwe, Ruhanga waitu, oba mufura mara oba w'amazima.
Oba mwegumisiliza, kandi ensi yona ogitwaza obuganyizi.
2Kuba n'orwo tufakara rwona tuba tuli bawe,
n'obushobora bwawe nitubumanya.
Titufakare, kuba nitumanya okwo tuba bawe.
3Iwe okukumanya nibwo burungi obugobeleire;
n'okumanya obushobora bwawe
nibwo busimbizo bw'oburora obutalihaga.
4Ichwe titukahabisibwaga bintu bya katozi
eby'abantu bakoza obubuya,
anga ebishushani ebyo bafire kusiiga erangi,
ebihuuku by'amabara agatali gamoi,
5eby'abafera baleba bikabaramaiza,
bakagonza batyo ekishushani ekitaina burora ekifire.
6Abagonza ebintu bibi ebyo, bakabishubira,
ni balinya ababikora anga ababyenda anga ababifukamira.
Obufera bw'okufukamira ebihuuku by'eibumba
7Orwo omubumbi akaata eibumba likoroba,
ayegendeleza muno alibumba ebikwato ebyo tukoza.
Eibumba lyonene lyonene alibumbamu ebikwato
eby'ekitinwa n'ebitali bya kitinwa,
mara byona abikora nkora emoi.
Kyonkai omubumbi ogwo n'iwe aramura omwoga
ogw'ekikwato ekyo kirakora.
8Omu kuhendekera bushai kwe okwo,
eibumba lyonene lyonene alibumbamu ruhanga wa katozi.
Omubumbi wenene ogu muntu ti irai arugire omw'itaka,
mara ali haihi kwija kuligarukamu,
orwo araragirwa kugarurayo omwoyogwe oguhorano.
9Kyonkai okwo ali w'okufa,
anga okwo oburorabwe buli bugufi ebyo tabifireho.
Na wenene ali omu rulya rumoi
n'abahesi b'ezahabu n'efeza,
narondora abahesi b'omulinga.
Wenene ayelenga kuba muntu muhango,
ngu orwo yakora baruhanga ab'ebishuba.
10Omutimagwe gw'eijwi,
n'ebyo alikushubira nibikirwa enziro,
kandi na wenene eibumba nilimukiza omugasho,
11orwo yalemirwe kumanya ayamutonzire,
akamutamu omwoyo gw'amagezi,
akamuhuhamu n'omwoyo gw'oburora.
12Oburora bw'omuntu abulenga muzano,
abweta mujajaro kubutundiramu.
Nabona ahiga empiya okwo alikushobora,
n'orwo yakuzibonera omu mihanda mibi.
13Omuntu ogu namanya kushaga abandi bona
okwo aba nafakara,
orwo omw'ibumba aba nabumbamu ekikwato
n'ebishushani eby'okwatika.
Ekibonabonyio ky'Abamisiri
14Abafera kushaga abantu bona,
ab'okuganyira kushaga abaana bato,
n'ababisha ababonesize abantu bawe enaku.
15Batekelezaga bati ebihuuku byabo
byona by'obutakansi ni baruhanga,
n'orwo byagiraga amaisho bitalikubona,
byagiraga enyindo okwo bitalikwikya,
byagiraga amatwi okwo bitalikuhulira,
byagiraga enkumu okwo bitalikukwata,
byagiraga amaguru okwo bitalikutambuka.
16Manyasi bikakorwa omuntu.
Ow'omwoyo oguhorano n'iwe yabikozire.
Taliho muntu yakukora ruhanga alikumushusha.
17Rwona omuntu aba w'okufa,
n'eby'akoza emikonoye emibi nabyo biba bifire,
kuba wenene ebintu eby'afukamira aba nabishaga,
manya wenene aina oburora,
kyonkai byonene tibibugira n'akati!
18Bonene ababisha b'abantu bawe,
bafukamira n'enyamaishwa ezilikuzilira kimoi,
ezili zibi kushaga ezindi zona,
k'olikuzileba aha kutagira magezi kwazo.
19Nangu n'omu kuba nyamaishwa ti zirungi za kulebwa
kugir'oti omuntu yakuzigonza.
Enshonga Ruhanga tiyazisiimire mara tiyazihaire mugisha.
Currently Selected:
Obumanyi 15: RHAY01
Highlight
Copy
Compare
Share
Want to have your highlights saved across all your devices? Sign up or sign in
Ruhaya DC Bible © Bible Society of Tanzania, 2001.